Okeyka, Apong

Bannawag - - Itoy A Bilang - Ni ABERCIO VALDEZ ROTOR, Ph.D.

ADTOY ti sabali manen nga ummong dagiti pammati da apong a mabalin nga arisiten a nalaing bayat ti panangam-amiristayo iti kaipapanan ken anagda iti agdama a panawen:

• No kaiddam dagiti librom, maaddaanka iti nasidap a memoria. Adda dagiti mamati a kalpasan ti panagadalda iti rabii, ikabilda ti libro nga ad-adalenda iti tukot ti punganda tapno mabati iti uloda ti binasa wenno inadalda.

• Saanka nga agsagsagaysay iti rabii, tapno saanka nga agkalbo, maulila wenno mabalo. Ngem no di maliklikan ti agsagaysay, kagatem nga umuna ti murdong ti sagaysay.

• No agammusay ti pusa, pagilasinan nga adda sumangbay a sangaili. No agtaguob ti aso iti rabii, kaipapananna nga agraira dagiti dakes a di katatawan.

• Dimo ipadpadawat ti sapatosmo ta dakes. Mabalin ketdi nga ipallangatokmo ta kukua ‘diay makasippaw, wenno ilakom iti nalaka— ‘tay kasla impadawatmo met laengen ti kalakana.

• Saanka nga agsagsagawisiw wenno agkankanta iti kabakiran, amangan no tuladendaka dagiti di katatawan wenno makabatbatika. Ti met agsagawisiw iti rabii, agaw-awis kadagiti dakes nga espiritu.

• No adda agbaeng no kasta nga agrubrubatka a pumanaw iti balayyo, yalud-odmo ti biahem tapno maliklikam ti dakes a mapasamak kenka.

• Ti addaan siding iti sakana, nayanak a managbiahe wenno mannakigasanggasat. Ti addaan siding iti rupa, agballigi iti tay-ak ti negosio. Ti addaan iti siding iti tengnga ti agongna, bumaknang ngem saan a naragsak. Ti addaan iti siding iti asideg ti matana, nalaka a makaawis iti agrukbab wenno agayat kenkuana. Ti addaan siding iti imana, kaipapanan ti kinabaknang wenno kinalaing nga agtakaw. Ti addaan siding iti bukot, kaipapanan ti kinasadut. Ti addaan siding iti pagayusan ti lua, babaluen. Ti siding iti yan ti mabagbagi, kaipapanan ti kinaaktibo iti seks.

• No makasabat wenno makakitaka iti amarilio a kulibangbang, kaipapanan daytoy ti suerte. No sumrek ti kayumanggi wenno maris-daga a kulibangbang iti balay, agpukawka iti kuarta; no met nangisit, adda matay a kabagian.

• Nasayat a kapanunotan ti mangsukat iti nagan ti managsakit nga ubing. Iti daytoy a wagas, matikawmo dagiti dakes nga espiritu a mangipapaay iti sakit iti ubing.

• Ti bilang dagiti pangal ti agdan, saan koma nga umisu a mabingay iti apagkatlo. Bilangen dagitoy kas oro (balitok), plata (silver), ken mata (patay). Ti maudi a pangal, saan koma nga apagisu iti mata.—O

Newspapers in Tagalog

Newspapers from Philippines

© PressReader. All rights reserved.