Kastoy, Kapid, Ditoy Hawaii
ITAY napalabas nga eleksion primaria iti para representante iti akimbaba a benneg ti Kongreso ti Hawaii iti Distrito 30, dua a Filipino ti nagpaidasig a mangibagi iti Partido Demokrata iti daytoy umay nga eleksion heneral. Ti mangabak kadagitoy dua, da Romy Cachola, agdama a representante ti nasao a distrito, ken Ernesto “Sonny” Ganaden, agdadamo a timmapog iti politika, ti makibalubal iti mangibagi iti Partido Republikano.
Sakbay ti eleksion, awan madlaw a risiris iti kandidatura da Cachola ken Ganaden. Ngem iti karabiyan ti eleksion a pannakabilang dagiti botos, agin-innuna dagiti dua. Iti immuna a dua a pannakaiwaragawag ti bilang dagiti botos, mangab-abak ni Cachola. Ngem idi sakbay ti tengnga ti rabii, naiwaragawag a rimmingbaw ni Ganaden iti 10 a botos.
Naturog a nakaisem dagiti nangsuportar ken ni Ganaden. Ngem iti kabigatanna, nariinganda laengen a nangabak ni Cachola iti 51 a botos.
Gapu iti daytoy kellaat a panagbaliw ti resulta ti eleksion, kinuna dagiti nangtapaya iti kandidatura ni Ganaden nga adda “naipakamakam” a balota— banag a makaigapu a nangabak ni Cachola.
Iti sumaruno a lawas, nangyuli ti bunggoy ni Ganaden iti darum iti Korte Suprema. Iti darum, napabasol ni Cachola a nangallilaw, nangipig ken nangipangta kadagiti botante. Kinuna pay ti darum nga inadaw ni Cachola ti nagan dagiti botante manipud iti listaan dagiti pasiente iti klinika ti doktora a kaingungot ni Cachola. Adda iti puseg ti Kalihi, maysa a distrito ti Honolulu ken pagtaengan dagiti adu a Filipino/Ilokano. Daytoy ti makaigapu nga adu ti naibuson a botos a nagbanag iti panangabak ni Cachola.
Nakiddaw iti darum ti pannakabilang manen dagiti balota, ti pannakaikkat ti nagan ni Cachola iti balota ti eleksion heneral, ken ti panagimbestigar ti Federal Bureau of Investigation.
Malaksid ken ni Romy Cachola, nairaman pay a naidarum ni Hawaii Election Chief Scott Nago gapu ta “napaay a nangatipa iti pannakairaman dagiti adu a naibuson a balota a maipagarup a palso.”
Iti sungbat ni Diputado Cachola, kinunana nga awan kinapudno dagiti pammabasol dagiti kinasalipna iti politika. Kinunana pay a saanna a maukag ti listaan dagiti pasiente ni Dr. Erlinda Cachola, ti kaingungotna. Kinuna met ni Scott Nago nga awan kinapudno a namindua ti pannakabilang dagiti naibuson a balota ken adda dua nga election official, wenno nasursurok pay, a nangbambantay ken nangsalsaluad kadagiti balota.
Kiniddaw dagiti dua a naidarum ti pannakaiwaksi ti darum kadakuada.
Napardas ti pannakataming dagiti darum iti protesta iti eleksion. Sagudayen ti linteg ti Hawaii, uppat laeng nga aldaw kalpasan ti pannakaawat iti sungbat dagiti naidarum ti pawayway ti korte a mangrisut iti protesta.
Itay Agosto 25, inyetnag ti Korte nga awan natibker a pammaneknek nga adda kinukusit a naaramid itay napalabas nga eleksion. Kinuna ti korte nga awan nailanad a nainagan iti darum a mabalin a mangipaneknek iti kinapudno dagiti pammabasol.
“Saan a mabalin a maibasar ti maysa a darum iti eleksion babaen ti “panangipagarup wenno awan kapkapnekan nga impormasion.” Pinirmaan dagiti lima a hues ti Korte Suprema ti nasao a decision.
“Nadalus ti panagkampaniak manipud pay idi,” kinuna ni Cachola.
Agarup tallopulon a tawen ni Romy Cachola, 70, nga agserserbi iti pagilian. Sigud a nagpapaay a Diputado iti Hawaii, sa nagkonsehal iti City & County of Honolulu, sa nagsubli manen a reprensentante ti Kalihi.
No mangabak iti eleksion heneral, daytoy ti maikatlo a terminona iti Kongreso iti maikadua a gundaway.—O