Dear Doc

Bannawag - - Itoy A Bilang - Da DR. GENERALDO D. MAYLEM ken DRA. LORNALYN C. COLOMA-MAYLEM (Adda tuloyna)

TULOY ti sungbat iti surat ni Mr. John De Uban ti Ramon (Isabela), 35 anios a mannursuro iti para publiko a pagadalan. Segun kenkuana, problemana ti nasapa a panagubanna a nangrugi idi agtawen iti 23. Makarikna iti pannakkel no ibagada a nasapa a nagnakem ngem makarikna met iti kasla pannakauyaw. Adda nangibaga a gapu iti stress ngem saan a mamati ta adda met dagiti am-ammona a nakarkaro pay ti pannaka- stress-da ken natataengda pay, ngem dida pay met aguban. Ita, salsaludsodenna no ania daytoy problemana ken no nadagsen kadi.

Inlawlawagtayo iti napalabas ti maipapan iti siensia ti panaguban. Itultuloytayo:

Apay nga adda nasapsapa nga aguban?

Adda dagiti mangibaga a ti panaguban ket gapu iti adu nga stress iti trabaho wenno narikut a kinaagtutubo. Ngem ad-adda ketdi a ti gene (hene) ti mangidiktar no kasano ti kasapa ti panaguban. Iti ababa a pannao, mabalin a matawid ti nasapa a panaguban.

Iti biang dagiti Puraw (Europeano), kadawyan nga aguban dagitoy manipud panagedadda iti agtengnga ti 30s. Mangrugi met kadagiti Asiano iti naladaw a 30s. Gagangay met nga aguban dagiti Aprikano ken Amerikano iti katengngaan it 40s.

Makapauban kadi ti stress?

Mabalin a gapu met iti wagas ti panagbiag ti panaguban. Mabalin a gapu iti aglawlaw ken iti nutrision. Kasta met a mabalin a gapu iti panagsigarilio, ken pannakalang-ab iti secondhand smoke. Ken stress. Nupay saan a direkta. Ngem mabalin a pakaigapuan ti panagpamarut ti buokmo mamitlo a naparpartak ngem iti normal. Inton agtuboda manen, dapuen wenno uban imbes a ti orihinal a marisna a nangisit. No ngamin agresponde ti bagi iti stress, masansan nga adda madangran a nasalun-at a selula.

Mabalin pay a pangrugian ti panaguban ti nakurang a nutrision.

Naduktalan a maysa kadagiti rason ti nasapa a panaguban ti panagkurkurang iti sumagmamano a klase ti sustansia. Segun iti panagadal, no nababa ti ferritin, calcium, ken vitamin D-3, maisapsapa ti panagubanmo. Kasta met no nababa ti copper, zinc, ken iron.

No pagbasaran dagiti nadakamat iti ngato, ken naibagam a nangrugika nga aguban idi agtawenka iti 23, mabalin ngarud a maibaga a naisapsapa ti panagubanmo. Wen, ta maibilang a nasapa a panaguban no naguban ti Europeano nga agtawen iti 20; ti Asiano nga agtawen iti 25; ti Aprikano ken Amerikano idi agtawen iti 30.

Makapauban kadi ti problema iti salun-at?

Wen. Karaman kadagitoy ti: (1) panagkurang iti Vitamin B12, (2) Anemia, (3) tinawid a kondision ti tumor, (4) Thyroid disease, (5) Vitiligo, wenno panagkuplat ti kudil, (6) Alopecia areata wenno kasla panaglabang ti buok.

Newspapers in Tagalog

Newspapers from Philippines

© PressReader. All rights reserved.