Siled ti Kararag

Bannawag - - Itoy A Bilang - Ni KIM SISK ti Oklahoma

Basaentayo ti Salmo 32:6-11

Dikay agbuteng— addaak kadakayo! Siak ti Diosyo— diyo ipalubos nga adda mangbutbuteng kadakayo. Papigsaen ken tulongankayo; salakniban ken isalakankayo.—Isaias 41:10

NAGTUGAWAK iti opisina ti doktor. Natalgedak a ti Dios ti makaammo kaniak kasta met a napintas ti resulta ti biopsy. Simrek ti doktor, iniggamanna ti imak, ket imbagana ti maysa a damag a diak pulos ninamnama a mangngeg. Naduktalanna nga adda nakaro a kita ti kanser ti susok ket kasapulak ti chemotherapy, lumpectomy, ken radiation. Ngem kinuna ti doktor, “Nasapa a natakuatan isu a mangnamamatayo a maagasan daytoy.”

Kasla nagtupak ti langit iti entero a biagko. Kadagiti sumaganad a lawas, situtudioak a limmasat kadagiti nagkaadu a panagpakonsultar iti doktor, nadumaduma a test iti laboratorio, pannaka-scan, panangasikaso iti insurance, ken ti panangsangok kadagiti trabahok. Kanayon a mabutbuteng ken madandanaganak. Dimteng ti aldaw a narugian ti chemotherapy.

Narigatanak kadagiti simmaruno a bulan. Ngem nakisao kaniak ti Dios babaen ti kanta. Ammok a saanak nga agmaymaysa. Kasla lumaslasatak iti nauneg a danum, ngem adda kaniak ti Dios iti tunggal addangko. Nangaramidak iti koleksion dagiti kanta nga ulit-ulitek a dengdenggen. Babaen daytoy, ti parabur ken ayat ti Dios sinuktanda dagiti panagbutengko iti ragsak. Kabayatan ti pannakaag-agas ti bagik, ag-agasan met ti musika ‘toy kararuak.

Ita, dua a tawenen nga awan ti kanserko. Ngem no mangngegko dagiti nasao a kanta, malagipko ti amin a naglasatak. Ngem kangrunaan ti amin, natalgedak nga adda kaniak ti Dios ania man ti mapasamak iti masakbayan.

Kararag: Dios ti amin a liwliwa, agyamankami iti kaaddam kadakami kadagiti narigat a panawen. Tulongannakam’ kadi a kanayon nga agpannuray iti paraburmo. Amen. Kapanunotan: Kasano man ti karigat ti paglasatak, adda kaniak ti Dios. Ikararagan: Dagiti nakalasat iti kanser.

Newspapers in Tagalog

Newspapers from Philippines

© PressReader. All rights reserved.