Adda Peggad nga Ipaay ti Panagsida iti Tilapia

Nataraken iti Pagpupokan

Bannawag - - Itoy A Bilang - Ni XELA MARI D. VILORIA

MAYSA kadagiti kalatakan a lames (ikantamnay) iti pagilian ti tilapia. No idilig iti presio dagiti sabsabali nga ikan, nalaka laeng daytoy ken mailaklako pay a sibibiag.

Kadagiti met agtartaraken iti daytoy a lames (ikan-tamnay), maragsakanda ta napardas ti panagadu ken panagdakkelda.

Agbiag ti tilapia kadagiti ababaw laeng a waig, dan-aw ken karayan. Daytoy ti rason a nalaka laeng a taraknen a nakapupok.

Kaaduan ngamin itan a matartaraken ti tilapia kadagiti pagpupokan. Naandur daytoy a lames ken kanenna amin a mabalin a maipakan. Adu ngarud ti mainut dagiti agtartaraken iti tilapia ta mapakan dagitoy a kas iti baboy wenno manok.

Ngem itay laeng nabiit, adu dagiti nairepreport a peggad iti panagsida iti tilapia a nataraken iti pagpupokan. Ngamin, kadawyan ngamin a genetically-modified ken mapakpakan dagiti pupok a tilapia iti antibiotics. Dagitoy ti rason nga adu ti agsinsintir ti tianda nga agsida iti tilapia.

Madakdakamat kadagiti report nga ikadakkel pay ti panagsida iti kakastoy a tilapia ti peggad iti panagsakit iti kanser. Gapu ta mataraken a nakapupok, maminsangapulo a daras a makaited kadagiti peggad iti kanser ngem dagiti dadduma nga ikan. Mainaig daytoy kadagiti artipisial a pagpakan a mait-ited iti tilapia. Ti dioxin ti maysa kadagiti kapepeggadan nga elemento a masarakan iti tilapia gapu kadagiti komersial a pagpakan.

Kunkuna dagiti agsuksukisok a mapukaw laeng ti dioxin iti uneg ti bagi kalpasan ti pito agingga iti sangapulo ket maysa a tawen banag a mamagpeggad iti tao.

Malaksid kadagitoy, bassit laeng met ti imet ti tilapia nga omega fatty acids. Napateg ti omega fatty acids tapno maikabassit ti peggad iti panagsagaba iti Alzheimer’s disease ken sakit ti puso.

No adda man imet ti tilapia nga omega fatty acids, bassit unay daytoy. Daytoy pay ketdi a klase ti omega fatty acids ti makaigapu tapno bumukno wenno lumteg ti sugat.

Malaksid iti panangpakaro ti tilapia iti sugat, addaan pay daytoy iti arachidonic acid. Paset daytoy ti omega fatty acids ti tilapia a mangpakaro iti Alzheimer’s disease (panagkabaw). Ikabassit ti omega fatty acids manipud iti mackerel, sardinas ken halibut ti peggad ti Alzheimer’s disease ngem pakaruen ti tilapia.

Tapno matiped dagiti sakit ken peste iti pagpupokan iti tilapia, agaramat dagiti agtartaraken iti antibiotiko ken pestisidio. Imet pay dagiti PVC plastic a maar-aramat kadagiti pagpupokan ti nangato a lebel ti dibutylin. Ti dibutin ti mangdadael iti naturalesa (immune system) dagiti agsida iti tilapia.

Ti pay dibutylin ti maysa kadagiti rason ti panagraira ti asthma, nalabes a panagngato ti timbang, alerdyi ken dadduma pay a sakit a mainaig iti nutrision.

Napeggad pay kadagiti masikog ti nangato a lebel ti mercury kadagiti mapatpatanor a tilapia kadagiti pagpupokan.

Maibatay kadagitoy a report, nasaysayaat met laeng ti panagsida iti ikan a nakalap iti atap. Adu met pay laeng ti tilapia ken dadduma nga ikan a makalkalap kadagiti karayan ken iti baybay.

Malaksid kadagiti nadakamat a peggad nga ipaay ti panagsida iti tilapia a nataraken kadagiti pagpupokan, rugitan pay ti panagtaraken iti daytoy a lames dagiti penned, karayan, alog wenno dan-aw.

Mayanud dagiti rugit iti panagtaraken iti tilapia manipud kadagiti pagpupokan iti surong a pakaigapuan ti polusion ti danum iti baba dagiti waig wenno karayan.—O

Newspapers in Tagalog

Newspapers from Philippines

© PressReader. All rights reserved.