Ti Gasatmo Ita a Lawas

Bannawag - - Itoy A Bilang -

VIRGO (Agosto 21- Septiembre 22). Nalaklaka nga amang a magun-od ti tarigagay a namunganay ken namuonan iti natarnaw a kaunggan. Napartak ti panaglangto ti pagganaran a nakayabelan ti naimbag a panggep a para kadagiti pada a tao nga agkamkamtud iti grasia ken kabaelan. Nagasat a numero: 3, 5, 8.

LIBRA (Septiembre 23- Oktubre 22). Nupay mairamanka kadagiti kunada a nayanak a nagkutsara iti balitok, matun-oyan ti pudno a ragsak babaen ti bukodmo a pamuspusan. Madagullit a nasamsam-it ti balligi no bukod a nagbannogan. Nagasat a numero: 2, 4, 9.

SCORPIO (Oktubre 23- Nobiembre 22). Adda dagiti tiempo a pumabor iti maysa a tao ket daytoy a lawas ti para kenka. Gundawayan koma daytoy ket liklikan ti agkamali iti nakaro. Naanus ken mannakaawat ni gasat ita kenka ngem adda latta met pagpatinggaanna. Nagasat a numero: 1, 6, 8.

SAGITTARIUS (Nobiembre 23- Disiembre 20). Usaren dagiti imet a talugading tapno marisut dagiti parikut ken mapaksiat dagiti umas-asibay a problema kenka. Adda dagiti sagudaymo a dimo ammo nga adda kenka ket ngarud, makatulong kenka ti panangimdeng iti makuna ti sabali a tao, nangruna dagiti pudno a mangisaksakit kenka. Nagasat a numero: 3, 4, 7.

CAPRICORN (Disiembre 21- Enero 19). Dagiti naiimbag a relasion, agpapan pay proyekto wenno nasayaat nga aramid, mangrugi iti nadarisay a panggep. No natarnaw ti kaunggan, kasla batombalani daytoy a mangallukoy kadagiti nasasayaat a bambanag a dumatag kenka. Itoy a lawas, agbalinka a pagtaengan dagiti nasusudi a darepdep ken gannuat. Nagasat a numero: 2, 6, 8.

AQUARIUS (Enero 20- Pebrero 19). Ad-adu ti maiwakas, nupay saggabassit, no agbalin a napudno iti bagi. Makabannog ken nagastos ti agpammarang sa iti kamaudiananna, sika met laeng ti maatiwan wenno agbalin a kontrabida. Abrasaen ti adda a kinatao, ket mapnek iti adda a grasia. Nagasat a numero: 1, 5, 9.

PISCES (Pebrero 20- Marso 20). Maipaayan iti tiempo ken inana ti bagi a masapulna met kalpasan ti pannakakumikommo iti uray la kadagiti kallabes a lawas. Ad-adda met a makainana ti bagi no agtalinaed iti sidong dagiti patpatgen. Agannad kadagiti nagsara nga ayup. Nagasat a numero: 3, 4, 8.

ARIES (Marso 21- Abril 20). Ti emosionmo ti mangtaginayon iti enerhiam tapno magun-od ti kalkalikagumam a balligi. Masapul laeng a bantayan ken kontrolen no maipasungalngalka iti nakarit a tao, wenno iti tiempo a masapul a salaknibam ti patiem a kinapudno. Nagasat a numero: 2, 6, 9.

TAURUS (Abril 21- Mayo 20). Ti umay kenka a grasia, ur-urayenna a pagkurriem ti kinamanagparnuaymo sa umay agpasaklot kenka. Kaaduan a balligi, masapul nga ipuonan iti tiempo ken ling-et. Ken nasamsam-it ti grasia no bukod a nagbannogan. Nagasat a numero: 1, 4, 7.

GEMINI (Mayo 21- Hunio 20). Naim-imas ti innapuy no malinay. Nasamsamit wenno naim-imas ti prutas a maluoman iti puonna. Wardiwardi ti maysa a trabaho no maidardaras. Napimpintek ti balligi no masursuro ti aguray. Nagasat a numero: 3, 5, 8.

CANCER (Hunio 21- Hulio 20). No awan ti inaramid a maikaniwas, awan ti rason tapno agari ti buteng. Kas itay kunadan, kinapudno ti mangwayawaya ken mangpapigsa ken mamagtignay kenka a mangitultuloy kadagiti naimbag nga aramid. Nagasat a numero: 2, 4, 9.

LEO (Hulio 21- Agosto 20). Makapabang-ar, saan a makabannog, ti agaramid iti naimbag. Iti kamaudiananna, atiwen latta ti kinaimbag ti kinadakes. Nataltalinaay ti pannaturog no nadarisay ti kaunggan. Nagasat a numero: 1, 6, 7.

Newspapers in Tagalog

Newspapers from Philippines

© PressReader. All rights reserved.