Kudeta (27) Norberto D. Bumanglag, Jr.

Masmasdaaw ni Ricky a nangawat iti largabista. Simmirip. Dimmakkel dagiti matana.

Bannawag - - Itoy A Bilang - Nobela ni NORBERTO D. BUMANGLAG, JR.

Ti Napalabas: Pinanggep da Edgar a butbutngen ni John ngem pinarmek ni John dagitoy. Kayat ni John nga ikkan iti pagnakmanna ni Edgar. Sinerrekna iti kuarto daytoy iti hotel. Nadiskarkulona ti kabaelan ni Edgar ket naisagmak koma no saan a dimteng da Daniel. Nabuya ni Loida ti naiparang a ladawan dagiti nangbomba iti Luneta ket nagapada ken Daniel. Pinagpanaw ni Loida ni Daniel. Napan sinabat ni John ni Gloria Sarandi iti LIA. Intarusna iti hotel. Nadlawna a gargarien ni Gloria isu a bimmaba ket kinasaritana da Daniel ken Jerky. Impudno dagiti dua nga isuda ti nangbomba iti Luneta. Dida ammo, addan nangkidnap ken ni Gloria. Innalada ni John iti kuerpo ti polisia ket inimbestigarda. Insardengda laeng idi dumteng ni Rommel. Inawagan dagiti nangkidnap ken ni Gloria. Dumawdawatda iti sangapulo a milion a pisos a ransom. Impakammona daytoy ken ni Mr. Bosworth ket imbilin daytoy ti panangiruarna iti pangsakana ken ni Gloria iti pundo ti CIA. Kabayatanna, napatayen da Edgar ni Eddie Quirino ken dimmanonen daytoy iti Presidente ket kayat ni Pat nga ibabawina ti ipapanna iti Ilokos. Napan sinabat ni John ni Ricky Ramirez iti LIA. Sinurot ida ni Craig Stewart, maysa kadagiti kameng ti CIA nga agpangpanggep a mangpatay iti Presidente. Napan da John iti banko tapno mangiruarda iti kuarta ngem agkedked ti manedier a mangted. Iti met hotel da Daniel ken Jerky, pinanggep ida a serken dagiti armado a lallaki.

S(Maika-27 a Paset) AAN a makaidna ni Edgar. No agbayagda pay, amangan no addanton agresponde a guardia, wenno polis. Ngem saanda a makastrek iti kuarto. No agpilitda, dina ammo no mano pay ti maipusing a taona. Naksayandan iti maysa ket dina kayat a manayonan pay. Ngem ania ti aramidenna? “Edgar, addaka pay laeng dita?” pagammuan la ta impukkaw ni Daniel.

“‘Panagkunam, panawandakayo? Aramidenmi laeng daytan inton mapataydakayon!” inkiraud nga insungbat ni Edgar.

“Kasta? Ngem madamdama laeng, sumangpeten dagiti pannakabagi ti linteg. Ania ti aramidentayo? Siempre, agtataraytayo a mapan aglemmeng. Ngem mabati daytoy natay a taom. Maammuan dagiti pannakabagi ti linteg ti kinaasinona. Maammuanda no asino dagiti tao a nakadkaduana. Mairamanka. Sapulendaka dagiti pannakabagi ti linteg. Ket no agmamalaska ket mairaman ni general, sal-itenkan!”

Nakapigpigsa ti katawa ni Daniel. Manglalalais. Ket makasuron la unay ni Edgar. “Sumardengka, animalka!” “Ammok nga adda dakdakkel a banag a nangibaonan ni general kadakayo, Edgar! No siak ti sika, agsanudakon. Awan pagsayaatan a maalam iti panangpapataymo kadakami!”

“Dinak allilawen!” inriaw ni Edgar. Iti nalaus a pungtotna, rimkuas iti nagpideganna sa pinaltopaltoganna iti namnamaenna a yan ni Edgar. “Mintis!” Naggarakgak ni Daniel. “Dimo ammo ti yanmi!” Nagkatawa metten ni Jerky. Ket addan ti pungtot ni Edgar. Nastreken dagiti aggayyem ti ulona ket no addada laeng iti sangona, rungrungduenna ida. Liningayna dagiti taona. “Pumaltogkayo latta uray awan masnop a puntiriayo,” imbilinna. “Mapaspasarakantayto latta ida.“Pimmaltog manen. Timmulad dagiti tao. Nagtudo iti bala ti kuarto. Kumanakraas dagiti mabuong a sarming ken dagiti matiltilkiapan a kayo nga alikamen. Inseniasna ti panagsardeng dagiti taona nga agpaltog. Simngat ti ulimek. Makakitileng. Napaisem ni Edgar. “Napatay sa idan,” kinunana kadagiti kakaduana. Inseniasna ken ni Nick ti iseserrek daytoy iti kuarto. Naganninaw ti buteng iti rupa ti taona. Ngem awan naaramidan daytoy ta immapuy dagiti matana.

Nagin-inayad a timmakder ni Nick. Sinimpana ti nangpetpet iti putan ti paltogna. Agarup naggiddan ti yaaddangna ken ti panaguni ti elevator a saan unay nga adayo iti yanda. Napataliaw ni Edgar. Simgar iti nakitana ken iti pannakaibuang ti maysa a kanalbuong.

Ni John Villa! Adda kaduana a lalaki a mangpalpaltogen kadagiti taona.

Naparasaw ni Edgar. Natikaw. Kimmita iti uneg ti kuarto. Agililus ni Nick iti datar. Nabuslon ti agsaysayasay a dara iti barukong daytoy.

Ad-addan ti panagrasawna. Dinan ammo ti aramidenna. Agilunlunod. Kayatna a mapan alaen dagiti dua a taona a napasag ngem awanen ti panawenna.

“Intayon!” kinunana kadagiti kakaduana. Saan a nasken a sarangtenda ni John Villa. Saan a napintas ti nagplastaranda. Isu a nasaysayaat no agsanuddan.

Nagnada iti sabali a pasilio. Ngem tinurongda met laeng ti agdan.

UMANANGSAB da John ken Ricky a nakagteng iti Room 326. Namurumoran iti lussok dagiti diding. Nadadael met dagiti tugaw kada lamisaan. Dua katao ti naudatal iti datar ken nadigosdan iti bukodda a dara. “Daniel! Jerky!” inyawag ni John. Naguni ni Daniel sa timmakderda ken Jerky a nagpakita. “Napanan da Edgar?” sinaludsod ni Daniel. “Timmarayda!” kinuna ni John. “Tenkiu iti isasaranaymo, Mang John,” kinuna ni Jerky. Sakbay a nakasungbat ni John, nagkiriring ti selpon nga awawagan dagiti nangkidnap ken ni Gloria. Nakaparpardas ni John a nangiruar iti selpon manipud iti bolsana.

“Apay a dinak sungsungbatan?” indil-ag ti lalaki nga immawag. Kasta unay a pungtotna.

“Saan a nagkiriring ti selpon... Siguro awan signal. Ammom metten ditoy Filipinas, agpugsapugsat ti signal,” inrason ni John.

“Diak masapul ti palawagmo, langgong!” inkilga latta ti lalaki. “Adda kadin ti kuarta kenka? Rineppetmo kadi a kas iti kayatko?” “Wen.” “Yanmo?” Imbaga ni John ti hotel a yanna.

Newspapers in Tagalog

Newspapers from Philippines

© PressReader. All rights reserved.