Adu Manen ti Mayat nga Agmula iti Eskarlatina

No masursuroyo ti teknik ti panagisilpo iti nadumaduma a barayti iti maymaysa a pinuon, mabalin a mailakoyo met iti nangina.

Bannawag - - Siled Ti Kararag - Ni ZAC B. SARIAN

Paborito manen ita dagiti landscaper ken kolektor dagiti nadumaduma a masetas ti eskarlatina.

IDI dekada 60 ken 70, nakalatlatak idi ti masetas nga eskarlatina (bougainvillea). Malagipmi a nakaad-adu idi ti mayat nga agmula iti Mary Palmer a dua ti maris dagiti sabongna idinto a sangsangapuon. Adda sanga daytoy a bin-ig a puraw dagiti sabongna idinto a ti sabali a sanga, bin-ig met a nalabaga.

Iti panaglabas dagiti tawen, simmukat dagiti sabsabali a masetas a pagaayat dagiti tattao. Simmaruno ti Red Palm, idi kuan, daytoy Lasuerte wenno Aglaonama. Idi kuan, ti Euphorbia.

Ita, nagsubli ti eskarlatina a pagaayat dagiti landscaper ken dagiti kolektor dagiti masetas. Kinapudnona, adda pay “chat group” iti internet a rinugian ni Baby Spowart nga addaan itan iti 300,000 a kameng saan laeng a ditoy Filipinas no di pay ket manipud kadagiti nadumaduma a paset ti lubong. Isu daytoy ti Bougainvillea

Philippines.

Daytoy met panagsubli ti eskarlatina a kas paborito dagiti naayat iti masetas ti nangted iti napintas a gundaway a kas panguartaan. Itay laeng nabiit, iti “Agrikapihan With Zac Sarian” iti Rizal Rizal Techno Park iti Taytay, Rizal, impadamag ni Baby Spowart nga isu ti supplier ti 5,000 nga agsabsabongen nga eskarlatina a naaramat iti pannaka-landscape ti maysa a hotel a naipatakder iti Boracay.

Idi met napankami iti Garden Show iti Kadayawan iti Davao City idi Hulio 11, nainterbiumi ni Grace Belleza, agtawen iti 30 ken naasawaan, nga agpatpataud kadagiti grafted a bougainvillea. Nagturpos ni Grace iti culinary arts ket panggepna ti mapan agtrabaho iti ballasiw-taaw a kas kosinera. Ngem saan a natuloy ti planona isu a napanunotna ti nangirugi iti negosio iti panagmula iti masetas. Gapu iti pannakipartisiparna iti chat group a Bougainvillea Philippines, adu ti nagayyemna uray pay dagiti adda iti abroad a nakisinnukatanna kadagiti barayti ti eskarlatina isu nga itan, addaanen iti 200 a barayti ti eskarlatina a papaaduanna iti bukodna a nursery.

Inadal met ni Grace no kasano ti ag-graft (panamagsilpo) iti eskarlatina iti YouTube ket kunana a naglaka met gayam a sursuruen daytoy. Nadlawna met nga uso itan ti panangisilpo kadagiti nadumaduma a barayti iti maymaysa a pinuon. Kinapudnona, babaen daytoy nga inaramidna, nailakona ti maysa a pinuonna iti P35,000. Daytoy a pinuon ti sinilpuanna iti 19 nga agsasabali a barayti isu a nadumaduma met ti maris dagiti sabsabong daytoy a pinuon.

Uray pay dagitay naimula iti bassit laeng a container, mailakona met iti nangina. Kas koma iti Red Fantasy nga addaan iti nalabaga a sabong, mailaklakona iti P700 ti maysa. Iti agdama, addaanen ni Grace iti 5,000 a grafted nga eskarlatina iti nursery-na.

Adu ti mailaklakona iti puestona, ken uray pay iti online. Ideldeliberna dagiti gatangenda kenkuana babaen ti LBC. Adda pay daytay nabaknang a kustomerna iti Pangasinan a pinatulodanna iti agpateg iti P30,000 a nmadumaduma a barayti ti eskarlatina.

Kas kuna ni Grace, nalaka laeng a taripatuen ti eskarlatina ta natured iti pudot. Ket no kapudotna, isu met ti panagsabongna.

Tapno makaurnong iti adu a rootstock (daytay adda ramutna a pagisilpuanna iti sabali a barayti ti eskarlatina), adda tangtangdananna nga aguk-ukkon kadagitoy. Isu dagitoy ‘tay nalakayanen nga eskarlatina a saanen a kaykayat dagiti akinkukua. Di kad’ nakaparnuay pay iti sabali a pagsapulan.

Nasayaat no padasenyo met ti araramiden ni Grace. Di la ammo no daytoy ketdi ti mangidateng met iti suerte iti pamiliayo.—O

Ni Grace Belleza ken ti paboritona nga amarilio a grafted nga eskarlatina (kanigid), ken ti Red Fantasy nga eskarlatina (kanawan).

Ni Grace ken ti maysa a kustomerna iti puestona iti Garden Show iti Davao City itay nabiit.

Newspapers in Tagalog

Newspapers from Philippines

© PressReader. All rights reserved.