Da Pepe ken Ritz
ADU ti masmasdaaw no apay nga iti tawenna a 24, saan pay a napadasan ni Ritz Azul ti nakinobio. Saan kano met a pagelan dagiti nagannak kenkuana. Para iti balasang, kunana a yun-unana pay laeng ti career-na. Kabayatanna, napalalo ti yamanna ta naipaay kadakuada ken Pepe Herrera ti gundaway nga agbida iti pelikula a “The Hopeful Romantic” nga improdius ti Regal Entertainment.
Saanda pay a narigatan a nagsiuting ta romantic-comedy, ken nakallalagip dagiti eksena nangruna iti eksena ti innayat. Uray ngamin no nakaay-ayat ti situasion, kuna ni Ritz a nagpigpigerger ni Pepe.
Seksi dagiti suot ditoy ni Ritz ket awan ti problema kenkuana ta sakbay pay ti shooting, nalawagen kenkuana dagiti dawdawaten ti pelikula.
Gapu ta masansan a yangaw ni Pepe a posible nga agkursonada ken ni Ritz iti pudno a biag, kuna ni Ritz a saan met nga adayo a mapasamak a maaddaanda iti relasion, ta amin kano met, addaan iti namnama. Inyangaw pay ti balasang a ni Pepe ti ‘Pepe’ iti biagna. Iti biang ni Pepe, no ania ti kababalinna iti pelikula, agarup kasta met laeng iti pudno a biag. Itedna amin para iti ayayatenna— saan ketdi a naayat nga agited kadagiti material a bambanag, no di ket panawen ken panangikagumaanan nga agbalin a naragsak ti relasionda ken ti ay-ayatenna. Kasta met a no agayat, iti maysa laeng a babai ta mabuteng a mabalsan wenno makarma.
Kabayatanna, mabuya ti “The Hopeful Romantic” mangrugi iti daytoy Septiembre 12 iti panangidirehe ni Topel Lee.—O