Napudno ni Paulo iti Karelasionna PAULO KAS HEN. GOYO

Bannawag - - Di Pay Naluto, Naibusen - Ni REGGEE BONOAN

INAKO ni Paulo Avelino a napadasanna met gayamen ti naloko (nagoyo, kunada iti Tagalog) iti tay-ak ti kuarta ken ayat.

No kuarta, namin-adun; iti ayat, napadasanna metten, ngem pagimbaganna, ubing pay kano idi.

Bida ni Paulo iti pelikula a “Goyo: Ang Batang Heneral” a maipapan iti kabibiag ni Heneral Gregorio Del Pilar. Gapu ta am-ammo ni Heneral Goyo a tsikboy, nasaludsod ken ni Paulo no maka-relate daytoy. Kinuna ni Paulo a saan. Kinapudnona, nagbasa iti adu tapno ad-adda a maawatanna ti naubing a heneral. Sa inyangawna a masapul a kumadua ken ni Jake Cuenca tapno adu ti maadalna maipapan iti kinatsikboy.

Impaganetget ketdi ni Paulo a napudno daytoy iti asino man a karelasionna.

Kabayatanna, narugian ti pannakaipabuya ti nasao a pelikula itay Septiembre 5.

Inako ni Cavite Vice-Governor Jolo Revilla a pudno ti damag a nagsinadan ken Jodi Sta. Maria. Saan ketdi nga inlawlawag ni Jolo no ania ti makaigapu ti panagsinada.

Iti sabali a bangir, magagaran ni Jolo iti pannakaipabuya ti “Tres” a maysa nga action trilogy a pagbidaanda nga agkakabsat, karaman da Bryan ken Luigi.

Puro aksion ti tunggal paset ti trilohia ket mangnamnama ni Jolo a mapnek dagiti agbuya.

Napauluan iti “72 Hours” ti episode a pagbidaanna ken indirehe ni Dondon Santos; “Amats” met ti pagbidaan ni Luigi ken indirehe met laeng ni Dondon Santos; idinto a “Virgo” met ti paulo ti episode a pagbidaan ni Bryan ken indirehe ni Richard Somes. Manipud daytoy iti Imus Production.—O

Newspapers in Tagalog

Newspapers from Philippines

© PressReader. All rights reserved.