Ti Gasatmo Ita a Lawas
LIBRA (Septiembre 23- Oktubre 22). Ti kinamanagsaganam ti mangpakapsut iti ania man a sumangbay a parikut. Pagimbaganna pay ta adda naisalikad iti napalabas nga isu ita ti makautmo. Gundaway pay tapno ad-adda a masuotmo ti kinapudno dagiti naruay a gagayyemmo. Nagasat a numero: 3, 5, 8.
SCORPIO (Oktubre 23- Nobiembre 22). Mabaelan ita ti umaddang manipud iti napait a padas. Siraraten ti siray ni namnama iti masanguanan. Iti tiempo ti leddaang, adda dagiti kameng ti pamilia a pagkamangan. Nagasat a numero: 2, 4, 9.
SAGITTARIUS (Nobiembre 23- Disiembre 20). Umisu ita kenka ti pagsasao a no awan ti maibagam a nasayaat, nasaysayaat a kaemen laengen ti ngiwat. Aramid ti pakakitaan, kas kunada manen. Nagasat a numero: 1, 6, 8.
CAPRICORN (Disiembre 21- Enero 19). Maaddaanka iti nalawag a disposision ket maibagam ti kayatmo nga ibaga, masaludsodmo met dagiti kayatmo a maammuan. Iti agdama a proyekto, ikagumaanam koma a nalawag amin a panggep ken nalawag ti adda a namnamaen a material ken saan a material a maganar. Nagasat a numero: 3, 4, 7.
AQUARIUS (Enero 20- Pebrero 19). Ad-adda a maipangruna ti kalidad ngem ti kantidad nga ad-adda met a mangidur-as iti kasasaad iti biag. Maamiris met a ti panagbalin a pagayam ti amin, isu ti awanan iti pudno a pagayam. Nagasat a numero: 2, 6, 8.
PISCES (Pebrero 20- Marso 20). Maaddaanka iti umdas a tiempo ken kuarta tapno maipasiar dagiti kameng ti pamilia. Siglotan ketdi a nalaing ti sanikua a nakasangrat para kadagiti masakbayan a lawas ken bulan nga ad-adda a panagkasapulam. Nagasat a numero: 1, 5, 9.
ARIES (Marso 21- Abril 20). Ti arapaapmo a dumur-as ti mamagtalinaed kenka a natibker, ket didaka magunggon dagiti parikut. Mapaksiat met dagiti parikut babaen ti kinaragsak ken pannakiummong kadagiti positibo a tattao. Nagasat a numero: 3, 4, 8.
TAURUS (Abril 21- Mayo 20). Manayonan pay ti panaganus ta adda pay laeng iti adayo ti ur-urayem. Nupay kasta, adda met parabur ti panaganus ta madlawmo dagiti babassit a parabur iti asidegmo. Nagasat a numero: 2, 5, 9.
GEMINI (Mayo 21- Hunio 20). Dumteng dagiti parabur ket ti naimbag kenka, natural ti panagyaman, saan laeng a kadagiti bambanag a simmangbay no di ket dagiti baro a pagayam. Nagasat a numero: 1, 6, 7.
CANCER (Hunio 21- Hulio 20). Maaddaanka iti naan-anay a kired tapno mayalengalengmo dagiti negatibo a sao ken aramid iti aglawlawmo. Maiturongmo ti imatangmo iti akemmo ket iti kinasigo ti pannakaileppas dagiti aramid, adda pay panawenmo para iti pagirayam iti tay-ak ti arte. Nagasat a numero: 3, 5, 8.
LEO (Hulio 21- Agosto 20). Maipaayanka iti umdas a panawen tapno maipamaysam ti pananggaw-atmo iti arapaapmo. Anusan ketdi dagiti saggabassit laeng a parabur. Nagasat a numero: 2, 4, 9.
VIRGO (Agosto 21- Septiembre 22). Kas gagangay iti biag, adda dagiti sumangbay a pannubok. Ad-adda ketdi a tumibkerka, ken matenneb ti anusmo. Adda sumangbay a gunggona iti arinunos ti lawas. Nagasat a numero: 1, 6, 7. Kasla namimpinsan a nagbaliw ti inak ket ti pirak ken sanikua lattan ti makitana.
Iggem ni Myles ti maysa a librona. Naregget daytoy nga agadal. No adda dina mabasa, agpaisuro kadagiti kakaenna. Kaay-ayona ti agbasa kadagiti istoria maipapan iti prinsesa. Immisemak ta kasla nakitak ti napintas a masakbayan ti buridekmi. Ngem kakuyog ti isemko ti sainnek ti barukongko ta nakitak ni Mulong. Diak ammo no isem wenno ngiit ti nakamalkat kadagiti bibigna.
MALAKSID ken ni inang, awan gaganaygayanmi amin a simmango a mangrabii. Makipagrikna met dagiti kakabsatko kaniak. Sayang, naimas ti taraon ta immay nagpadigo ni Nana Talin iti sinigang a pasayan ken malaga. Adda pay tinuno a liempo. Ngem kasla saan a tagiimasen dagiti kakabsatko, ken uray dakami ken amang. Ni inang ti kasta unay pamsaakanna. Dina man la madlaw a di man la kuldingen dagiti kakaduana ti makan.
“Manang, saanna gayam ammo ti agbasa ni Manong Mulong?” kasla nakalagip iti ibagana ti adingko a maysa.
Nagkinnitakami ken amang. Kimmitakami ken inang. Minulagatan ni inang dagiti kabsatko. Nagdumogkami amin. Nagiinnuna dagiti kakabsatko a nangala ti kanenmi.
“No ngay kas ken ni Mang Mulong ti agbalinto nga apokoyo, kayatyo?” dimi napakadaan ti saludsod ni Myles.
Kimmitakami amin ken inang. Immisemak iti napait. Diak sa madaeran. Agasem, ibaganto dagiti kamaestraak: ”Anak ni Madam Lilac dayta, di makabasa!” Ngem, nagpreno ti panunotko idi makitak ti ganas ni inang mangan. Nagkupit ti barukongko idi makitak dagiti maagdanagdan a babassit pay nga addik. Kimmitaak ken ni amang. Nagsig-am ni amang. Kinita ni inang ni amang. Nagpinerrengda. Naabak ni inang. Sintagari, timmakder daytoy ket napan nagugaog iti sipimi. Ammokon, sakiten met ti riknana ti gasatko. Ngem dina maitured nga agrigat pay dagiti kakabsatko ket awan sabali a kamangmi no di ni Mulong.
Maasianak unay ken ni inang. Ket diakon naterred dagiti luak.
Timmakderak. “Mangankayon,” kinunak kadagiti kakabsatko, “manipud ita, aginanan ti marunggaytayo.” Sa tinurongko ti sipimi.—O