Nakabales Met ni Ritz iti Kinaseksina?
AD-ADDA a comedy daytoy pelikula nga “Abay Babes,” ‘bagis. Ti imasna, adda met latta ‘kinaseksi’ a naipakita.
Ta kuna ni Don Cuaresma a direktor ti pelikula: Sayang.
Wen, masayangan no awan ti maipakita a seksi ta agpapada a nagpipintas da Cristine Reyes, Meg Imperial, Kylie Versoza, Roxanne Barcelo, ken Nathalie Hart.
** * Iti maysa nga interbiu, nadakamat ni Sharon Cuneta a kalpasan ti panagsinada ken Gabby Concepcion, nagbaliw ti disposisionna iti biag ken saanen a managisem.
Iti panagriknana pay, dina naited ti aminna a nangpadakkel ken ni KC Concepcion. Makapaliday man, aya, ‘bagis, no kasta. Ngem kunada ngarud, saan met pay a kanibusanan ti amin. Maamiris koma ni Mega dayta.
* ** Masdaawkami man, ‘bagis, no apay nga adda pay laeng dagiti fans a mangsalsaludsod no addan relasion da JM de Guzman ken Barbie Imperial.
Agpareha dagitoy iti teleserye nga “Araw Gabi.” Agpadada met a single. Kunada ngarud: Automatik.
* ** Speaking of JM, adu met latta ti masdaaw, ‘bagis, nga iti laksid ti pannakaipasungalngalna kadagiti personal a parikut, kanayon a maik-ikkan iti napintas a ‘break.’
Iti biang ni Vina Morales a maysa kadagiti kadua ni JM iti “Araw Gabi,” nalaing ngamin ni JM nga aktor. Ken nasingpet. Dayta ti kuna ni Vina, ‘bagis.
* ** Adu ti naragsakan a nakabuya iti pelikula a “Hopeful Romantic,” ‘bagis.
Natural kano ngamin ti kinakomendiante ni Pepe Herrera.
Idinto a nupay medio kurang ti akting ni Ritz Azul, nakabales met iti kinaseksina. Ne!—O (Chairman ni Kabagis Eloy iti Hunta Direktiba ti FAMAS ken host-producer ti Celebrity Hour media forum.—AST)