Maragsakan ni Arjo nga Agbida iti Pelikula

NAKAAY-AYAT met ti innangaw da Vin Abrenica ken Arjo Atayde. Nakapaskil ngamin iti social media ti video a nagsanggir ni Arjo iti abaga ni Vin bayat a matmaturog ti immuna, sa adda background ti kanta ni Ed Sheeran a “Perfect”.

Maayatan dagiti nakabuya ta pagaammoda met nga agpada a pudno a lallaki dagiti dua.

Nagbiahe itay nabiit dagiti dua idiay Amerika, kadua da Maja Salvador, Pooh, ken Joseph Marco para iti serye ti pabuya.

Kabayatanna, makumikom ni Arjo iti panagsublina iti Filipinas. Asikasuenna ti promo ti pelikula a “Tol” a pagbidaanda kada Ketchup Eusebio ken Joross Gamboa, ken umadani metten ti panagsiutingda iti “Jack en Popoy: The Puliscredibles” a pagbidaan da Coco Martin ken Vic Sotto para iti 2018 Metro Manila Film Festival. Agteyping metten iti teleserye a “The General’s Daughter” a pagbidaan met da Angel Locsin, Ryza Cenon, Janice De Belen, Eula Valdez, ken Maricel Soriano.

Maisagsagana metten ti pelikula a pagbidaanna nga iprodius ti Regal Entertainment. Maragsakan ni Arjo ta arapaapna laeng ti mairaman iti pelikula. Ita, adtoy a manamnaman ti panagbidana.

* ** Awan ti nobio ita ni Vina Morales. Kalpasan dagiti padasna iti biag ken iti edad a 42, nakaan-annaden nga agpili no asino ti ayatenna.

Nupay maibaga a kompleto isunan kas babai ta addan anakna, kayatna kano met latta nga adda lalaki a makatakunaynayna iti tungpal biag.

Kabayatanna, makumikom met ni Vina iti negosiona nga Ystilo Salon a narambakanen ti maika-20 nga anibersario daytoy.—O