Saan koma nga ilaklako ti historia, kuna ni Tolentino

Bannawag - - Iti Pagadalan -

Inggunamgunam ni Presidential Adviser for Political Affairs Francis Tolentino a saan koma a mainegosio dagiti pakalaglagipan iti pakasaritaan ti Filipinas ta “kukua dagiti Filipino dagitoy.”

Inggunamgunam daytoy ni Tolentino, dati a chairman ti Metropolitan Manila Development Authority (MMDA), kalpasan ti panangilako ti Leon Gallery itay Septiembre 8 ti “bukod a wagayway” ni Andres Bonifacio, pundador ti Katipunan, iti P9.3-milion.

“Daytoy a wagayway ni Bonifacio nga adda markana nga 1896, dara dagiti kakailiantayo ti naaramat tapno magun-odtayo ti wayawaya,” kinuna ni Tolentino. “No pagbalinentayo a kasla produkto iti tiendaan ti wagayway a paset ti pakasaritaantayo, kasla kaawan metten ti panangraem iti inlablaban ni Andres Bonifacio,” innayonna.

Mainaig itoy, kiniddaw ni Tolentino ti panangipila ti National Commission for Culture and the Arts iti darum tapno maibabawi ti pannakailako ti nasao a wagayway.

Iti isu met laeng a panaglako a naaramid iti Leon Gallery a masarakan iti Siudad ti Makati, nailako ti kakaisuna a nabati a ladawan ni Bonifacio iti P2.7-milion, dagiti dokumento iti panagkameng iti Katipunan iti P818,000; ken dagiti dadduma pay nga aruaten agraman ti maysa a bronse a medalion nga us-usaren idi dagiti kameng ti Katipunan iti P876,000.

Newspapers in Tagalog

Newspapers from Philippines

© PressReader. All rights reserved.