No Adda Sigsigloten, Adda Met Warwaren
INAWISNAK ti Lorma Colleges Basic Education Department a kas maysa kadagiti nagsarita iti makalawas a Business Congress 2018 a para kadagiti estudiante iti Grade 12 nga adda iti Accountancy, Business and Management strand. Siak ti nadutokan a nagsarita iti Financial Literacy Forum iti umuna nga aldaw ti Congress. Ibinglayko man ngarud ditoy ti inlektiurko kadagiti nasurok-kumurang a 50 nga estudiante.
KSP. Know your why, Say ‘NO,’ ken Persevere. Iti las-ud iti dandani dua a dekada a panagsalsalimetmetko, daytoy tallo a banag ti nasursurok a kangrunaan a ramit tapno agballigi ti maysa a tao iti panggepna nga agsalimetmet.
Know Your WHY
Apay nga agsalimetmetka? Ania, aya, ti pamay-am iti dayta kuarta a kayatmo nga idulin? Kayatmo laeng a pampandagan iti kudsonmo? Ibankom kadi? Wenno y-invest-mo kadi?
Gapu ta naglaka a gastuen ti kuarta ken nakagangganas man ti rikna no magatang dagiti kayat a kas koma ti baro a cell phone, bado, wenno ania man dita nga alikamen, masapul ngarud a ti rasontayo no apay nga agsalimetmettayo ket napigpigsa ngem ti ragsak a masagraptayo no dagus a gastuentayo ti kuartatayo.
Namin-adu met a pinadasko ti nagurnong. Rugi-sardeng, rugi-sardeng met. Nasintirko a no espesipiko ti rasonko nga agurnong a kas koma no usarekto ti maurnongko iti uneg ti innem a bulan iti panagpasiarko sadiay Sydney, Australia, ay, nalaingak nga agsalimetmet! Isu nga ita ta addan anakko, addan dakkel a rasonko no apay a rumbeng nga agsalimetmetak.
Say “NO”
Tapno ngarud makapagsalimemettayo, masapul ngarud nga ammotayo ti agsaan ken adda pigsa ti pakinakemtayo a mangibalikas iti saan.
Wen, masapul met a makilangentayo kadagiti gagayyemtayo. Kunada ngarud nga ‘All work no play makes Jack a dull boy.’ Narigat met, a, no awan pagragsakan ti biagtayo. Ania ngay ti serbi ti biag no saantayo nga ammo ti agragsak? Ngem adda met dagiti banag ken taripnong a saan a masapul nga aramiden ken papanan. Saan met a nasken a dar-ayantayo amin a party dagiti gagayyemtayo wenno papanantayo amin a happenings ti barkadatayo.
Saan met ket a nasken kanayon a baro dagiti alikamentayo. Pagkedkedan wenno pagsaanantayo dagiti saan a nasken a banag.
Persevere
Ita ta adda napilimon a rason no apay nga agsalimetmetka, ken kabaelamon ti agsaan kadagiti nadumaduma a paggastosan, kanayonem ngarud dayta panagidulinmo iti paset manipud iti amin a mapastrekmo a kuarta. Kas kunada iti Hapon, gambattekudasai. Saanka a sumuko no adda man pannubok iti daytoy gandatmo nga agsalimetmet. Dika agsanud. No determinadoka nga agsalimetmet, awanto ti makalapped iti pannakagun-odmo iti arapaapmo. Wen, no kayatmo ti agsalimetmet, ag-KSP-ka. Babaen daytoy, maaddaantayo amin iti makunkuna a financial independence.—O