Intayon Idiay Tanap-Avis Falls Aileen R. Rambaud
NO Burgos, Ilocos Norte, kunam, adu ti malagip maipanggep iti daytoy nga ili. Kas iti Kapurpurawan Rock Formation iti igid ti baybay, ti Cape Bojeador Lighthouse nga am-ammo pay a kas Burgos Lighthouse a naipasdek idi pay panawen dagiti Kastila ken maibilang itan a tawid a pasdek ti pagilian. Siempre, adda pay dita dagiti higante a windmill, ken ti REFMAD Dragon Fruit Plantation and Resort.
Ngem no adda dagiti napintas a sarungkaran iti Burgos iti panawen ti tudtudo isu dagiti dissuorna— ti Kaangrian Falls iti Brgy. Agaga ken ti Tanap-Avis Falls iti Sitio Avis, Brgy. Tanap.
Itay laeng nabiit, pinasiarmi ti TanapAvis Falls iti Brgy. Tanap.
Manipud iti Barangay Tanap, naglugankami iti bagon agingga iti mismo a pagnaem nga agturong sadiay. Mabalin met ti iti “kurongkurong”— sangagasut a pisos ti para iti 2-3 a tao. Medio nagalis ti dalan. Ngem maay-ayoka met kadagiti agruar a babassit a kulibangbang nga agtatayab iti pagnaam.
Agpatingga laeng ti lugan wenno kurongkurong iti yan ti marker a pakabasaam iti: WELCOME TO AVIS FALLS. Manipud ditoy, magnaka a mapan iti dissuor— mapan a 30-45 a minuto ti kaadayona. Sakbayna, ibagam met iti pagluganam nga urayennaka tapno addanto manen pagluganam nga agsubli iti baba. (Napimpintas no alaem ti numero ti selponna.)
Iti panagturong iti dissuor, adda dagiti paset a nagalis ken nabato isu a maibalakad ti panagan-annad. Adda metten dagiti sementado a paset a naisangrat a pagnaan ken dagiti lanut a pagkaptan. Iti pagnaan, adda dagiti sementado a kanal a pagayusan ti danum a segun kadagiti kakaduami, daytoy ti mangpaspasayak kadagiti talonda iti baba.
Uray medio adayoka pay, mangngegmon ti daranudor ti papanam a dissuor. Ket no madanonmon ti yan ti dissuor, dimo la ketdi magawidan ti bagim a mangdayaw iti kinapintasna. Mabalin ti agdigos ditoy. Kunada nga iti laeng pagrusodan ti danum ti nauneg. Saan iti aglawlawna a kunam no nairanta a “swimming pool.”
Inulimi pay ti tuktok ti dissuor ta adda met naisangrat nga agdan a landok a mapan sadiay. Ditoy, mabuyam ti nakapampanayag nga aglawlaw.
Kasano ti Mapan?
No addaka iti Siudad ti Laoag ken awan iti bukodmo a lugan, mapanka iti Burgos terminal. Agluganka iti dyipni a para Burgos. Agdissaagka a mismo iti sentro ti ili. Makitamto iti sango ti munisipio ti karatula a mangitunda no yan ti Avis Falls. Adda dagiti agur-uray a traysikelan sadiay. Ibagam laeng a mapanka iti Avis Falls. Sangagasut a pisos ti arkila ti dua laeng a tao agingga iti Barangay Tanap.
Iti Brgy. Tanap, adda met dagiti kurongkurong a mangitunda kenka iti pagserkan ti Tanap-Avis Falls.—O