Ading Kosinera

Itultuloytayo man a ramanan dagiti nagduduma a potahe ti kamanokan (native chicken) Ita, ti met Battered Native Chicken with Beer ti Siquijor ti idasartayo. Naggapu met laeng ti resipe daytoy a potahe iti Native Chicken Recipe Book ti Department of Agriculture Animal Products and byproducts Utilization Regional Field Office VII.

Dagiti kasapulan:

1 kilo a pitso ti kamanokan 1 tasa a serbesa 1 kutsara a tubbog ti lemon wenno kalamansi ½ kutsarita a sibuyas, nagalip ½ kutsarita a bawang, nadekdek ½ tasa nga arina 1 bukel nga itlog 1 pedaso a Knorr chicken cubes 1 tasa manteka a pagprito

Panangisagana:

1. Iw-iwaen ti manok. Itulangan. 2. Yuper ti manok iti tubbog ti kalamansi, sibuyas, ken bawang iti lima a minuto. 3. Paglalaoken a nasayaat ti serbesa, arina, itlog, ken Knorr chicken cube agingga a pumalet. 4. Ipapudot ti pariok agraman ti manteka. 5. Ideppel ti na-marinate a karne ti manok iti batter (wenno iti napaglalaok iti Addang 3. Prituen daytoy agingga nga ag-golden brown ti kolorna.

6. Idasar a napudot.

Padasentayo man met ti Sinampalokang Manok. Dagitoy dagiti ramen a kasapulan:

1 kilo a karne ti manok, naiw-iwa ½ kilo a kamatis, nagalip ½ kilo a bell pepper, nagalip iti paatiddog 1 kutsara a pimienta, nadekdek ¼ tasa a lasona, nagalip 1 bukel a sibuyas, nagalip 3 kangipen a bawang, nadekdek 1 kutsarita nga asukar 2 kutsarita nga asin 4 tasa a danum

Panangisagana:

1. Iw-iwaen ti karne ti manok iti kalalainganna iti kadadakkel. 2. Ilaok amin a ramen 3. Iluto a nasayaat daytoy. 4. Templaen iti asin. 5. Idasar a napudot.—O