Kastoy, Kapid, Ditoy Hawaii
MANEN? Nayesngaw dagiti nakangngeg iti reklamo kontra ken ni Diputado Romy Cachola ti Distrito 30 (Honolulu) itay napalabas nga eleksion primaria. Napabasol ngamin ni Cachola a nagipakamakam iti naiboson a botos a nangabakanna iti 51 a botos kontra iti kinabalubalna. (Imbasura ti Korte Suprema ti Hawaii ti pammabasol.)
Saan ngamin a daytoy ti immuna a darum kontra ken ni Dip. Cachola. Adda pay idi daytoy pammabasol a saan nga umno a panangaramatna iti lugan (SUV Nissan Pathfinder) a nairanta a maaramat laeng kadagiti bambanag nga adda pannakainaigna iti panagkampania (ni Cachola). Nagatang dayta a lugan iti $30,000.00 manipud iti campaign fund idi 2008.
Kinuna ni Cachola a kasapulanna ti dakkel a lugan a kas iti Pathfinder tapno maikargana dagiti aramatenna a pagkampania a kas iti karatula ken dadduma pay a ramit isu a nagatang dayta a lugan manipud iti pondo ti kampania (campaign fund). Kinunana pay a kadagiti personal a bambanag, ti kotseda a Lexus, maysa a bassit a lugan, ti aramatenna ken ti pamiliana.
Kalpasan a kinuna dayta ni Cachola iti Watchdog.org, nangiwayat ti State Campaign Spending Commission iti
bukodda nga imbestigasion ken nangalada iti imbestigador manipud iti opisina ti state attorney general a mangsiim ken ni Cachola iti makalawas.
Iti dayta a lawas ti Enero 2014, inaramat ni Cachola ti Pathfinder iti bukodna a pakaseknan, iti ipapanna iti simbaan, iti golf course ken iti Kapitolio. Amin dagitoy, maisalungasing iti pannakaaramat ti lugan a nagatang manipud iti pondo ti kampania. Maibilang ti pondo ti kampania a kuarta ti publiko ta mapataud ti kuarta babaen ti donasion dagiti umili.
Nainayon pay iti darum kontra ken ni Cachola iti Honolulu Ethics Commission ti panangaramatna iti saadna a kas konsehal babaen ti panangsingirna iti Siudad ti Honolulu iti agdagup iti $9,450.00 para iti gasolina ken pannakairehistro ti luganna a Nissan Pathfinder idinto a masingsingir dagita a paggastosan ti Pathfinder iti Friends of Romy Cachola, ti mangtartarawidwid iti pondo ti kampania iti politika.
Malaksid iti lugan, pinabasol pay ti Ethics Commission ni Cachola a manipud idi 2008 agingga idi 2012, inawatna ti saan a nainkalintegan a sagut manipud kadagiti lobbyist (mangimpluensia iti konsehal wenno agpampanday iti linteg a para iti personal a pagimbagan) a kas koma iti pannangan kadagiti nangingina a restauran, panagay-ayam iti golf nga agpateg iti $3,820.00.
Mainaig iti daytoy, kinuna ti Ethics Commission a saan nga inag-agapad ni Cachola iti konseho dagiti saan a nainkalintegan a sagut idi nagbotos iti 100 a gakat ken resolusion a mainaig iti rail transit, kadagiti konstruksion, kdp.
Tapno maisardeng ti kaso iti Ethics Commission, pinili ni Cachola ti makiareglo babaen ti panagmultana iti $50,000.00. Kinuna ni Cachola a babaen ti patigmaan ti abogadona, nasaysayaat laengen a makiareglo ngem ti aggasto iti nasursurok ngem $125,000.00 a para iti abogado a mangdepensa kenkuana.
Saan laeng a ni Cachola ti kameng ti konseho ti siudad ti naidarum iti Ethics Commission.
Napabasol ni Rene Mansho a binaonna dagiti empleado ti opisinana a mangikampania kenkuana iti panagpailayonna bayat ti opisial nga orasda iti opisina. Nabalud ni Mansho iti maysa a tawen.
Napabasol met ni Rod Tam iti saan a nainkalintegan a pananggastona iti pondona iti kampania, kas koma iti pannangan ken dadduma pay a bambanag. Nabalud ni Tam iti 2 nga aldaw ken 324 nga oras ti panagserbina iti kumunidad.
Napabasol ni Nestor Garcia a naggasto iti pondo ti kampaniana. Namulta ni Garcia iti $6,500.00 idi 2012 ken $8,100.00 idi 2015.
Kinuna ni University of Hawaii Political Science Professor Colin Moore a gapu kadagitoy nga aramid dagiti dadduma a politiko, marugrugnay ti panagtalek dagiti umili iti gobierno. Ket dayta ti makaigapu a bumasbassit ti bilang dagiti agbotbotos.—O