Panangimaton iti Pagtaengan
PANANGIMATON ITI PAGTAENGAN
KAS nagannak, nasken nga isuro kadagiti ubbing dagiti nasayaat a galad iti nagduduma a situasion. Iti amin a gundaway, rumbeng a nadayaw ken mannakigayyem ti maysa nga ubing.
Kas dakdakamaten dagiti mangyad-adal iti nasayaat a kababalin, makaay-ayo ti galad ti maysa a tao no mannakipagrikna iti sabali. Iti sabali a pannao, saan laeng a ti bukod a rikna ti panunoten; panunoten koma met ti rikna ti sabali.
Mairugi ti panangisuro kadagiti ubbing iti daytoy nasayaat a kababalin no maysa ket kagudua ti edad ti ubing. Maipasagepsep iti maysa nga ubing nga adda met rikna dagiti sabali a tattao ket maapektaranda no saan a nasayaat ti galad dagiti kalanglangenda.
Nasken nga ipaganetget dagiti nagannak kadagiti ubbing a pagbalinenda a paset ti inaldaw-aldaw a panagbiagda ti nasayaat a kababalin. Mairugi a maisuro daytoy kadakuada kadagiti nasapa a paset ti biagda iti uneg ken ruar ti pagtaengan.
Kasapulan ti nasayaat a tigtignay iti pannakilangen dagiti ubbing kadagiti padada nga ubbing ken kadagiti nataengan. Nasken masursuruanda nga agpadispensar no adda saan a nasayaat nga inaramidda. Saanda pay a bukodan ti panangay-ayam kadagiti abalbalayda. Mangipaayda met iti batang kadagiti dadduma nga ubbing nga agay-ayam.
Saan a maisuro kadagiti ubbing iti maymaysa nga aldaw dagiti nasayaat a kababalin. Adu a panagsanay ken pangpabileg ti kasapulan tapno maisuro dagitoy nasayaat a galad.
Isuro kadagiti ubing no kasano ti kumablaaw ken makisango a nasayaat kadagiti sangaili a sumangbay iti pagtaengan.
Iti panganan, no kabaelan ti ubing ti sumango iti komedor, isuro kenkuana no kasano iti agaramat iti kutsara ken tenedor ken naurnos a pannangan. Nasken pay nga isuro a 15 agingga 20 a minuto laeng ti panagtalinaed iti panganan.
Sursuruan dagiti ubbing a saggabassit laeng ti panagisubona iti taraon, ngalngalenna a nasayaat ken saan nga agsasao no adda taraon iti ngiwatna.
Kanayon nga isuro dagiti ubbing nga agyaman no adda naawatda a sagut wenno adda nasayaat a banag a nagun-odda.
Sapaen nga isuro dagiti ubbing ti panangibinglay ken saan a panangbukod kadagiti gundaway a kas iti pannakipila ken iti panagaramat kadagiti abalbalay ken dadduma a gamigam.
Sursuruan dagiti ubbing iti kinapateg ti panaganus. Igunamgunam a dida makisamsampitaw no adda madama nga agsarsarita.
Paset ti kultura dagiti Ilokano ti panangawag kadagiti nataengan wenno in-inauna iti manong, manong, tata ken nana. Saan koma a mapukaw dagitoy a tagipatgen kadagiti ubbing.
Adu pay dagiti rumbeng a maisuro kadagiti ubbing. Itugot dagitoy iti panagtaengda wenno iti sibubukel a panagbiagda.
Ad-adda nga epektibo ti panangisuro iti nasayaat galad kadagiti ubbing no dagiti mismo a nagannak ti mangipaay iti pagtuladan kadagitoy a kababalin.—O