Idi Un-unana a Panawen
IDI UN-UNANA A PANAWEN
IDI un-unana a panawen, iti kabatuan a kabambantayan iti maysa a desierto, adda agnanaed nga ermitanio. Agdindinamag ti kinasayaat daytoy nga ermitanio. Dagiti mayaw-awan iti kabambantayan, pagdagusen, pakanen ken painumenna ida iti pagnaedanna a gukayab, nga iti uneg daytoy, adda nabiag nga ubbog. Kuna dagiti nakakitkitan iti ermitanio a nadlawda ti kinaraniag ti rupada daytoy ken ti kinaragsakna iti laksid ti kasasaad ti lugar a pagnaedanna ken iti kaawan a makuna a sanikuana.
Iti dayta met laeng a desierto, adda agnanaed a managdakdakes. Adda pasurot daytoy nga agdagup iti lima gasut. Nakakabalioda amin ket masansan nga arangenda dagiti komersiante.
Nadamag met daytoy a managdakdakes ti kaadda ti nasao nga ermitanio nga agnanaed iti gukayab. Nadamagna pay ti kinalatak daytoy ken ti panangraraem kenkuana ti adu a tattao. Kangrunaanna, ti kinaragsak daytoy.
Iti maysa nga aldaw, rinanta ti managdakdakes ti ermitanio iti pagnanaedan daytoy a gukayab.
“Apo Lakay,” kinuna ti managdakdakes. “Addaanak iti lima gasut a pasurot a sisasagana a mangtungpal iti ania man nga ibilinko. Adu ti kinabaknangko. Ngem pangngaasim man ta balakadannak no kasano nga agbalinak met a naragsak a kas kenka.”
Inawis ti ermitanio ti managdakdakes a mapanda iti arsadanan ti maysa a nangato a rangkis.
“Mapanta idiay tuktok,” kinuna ti ermitanio. “Ngem makitam dagitoy tallo a dadakkel a bato iti sakaanam? Bagkatem dagitoy ta inta idiay tuktok.”
Pinadas a binagkat ti managdakdakes dagiti tallo a bato. “Diak la ketdi kabaelan a yuli dagitoy!” inreklamona. “Nagdadagsen!” “Idissom ngarud ‘ta maysa,” imbilin ti ermitanio. Kasta ti inaramid ti managdakdakes ket sinarunona ti ermitanio a kasla awan aniamanna nga umul-uli iti rangkis nga agturong iti tuktok.
“Apo Lakay, talaga diak kabaelan ti umuli no adda dagitoy a bato!” impukkaw ti managdakdakes iti lakay a sarsarunuenna. “Nadagsen latta!” “Idissom ‘ta sabali pay!” imbilin met ti ermitanio. Indisso ti managdakdakes ti bato ket inkarigatanna a sinurot ti lakay. Ngem iti di nagbayag, impukkaw manen ti managdakdakes. “Uray daytoy la a bato ti kargaek, diak makadanon iti ngato!” “Ay, ket idissomon, a!” imbilin ti ermitanio. Isu nga indisson ti managdakdakes ti maudi a bato. Ket awan sawsawirnan a nakadanon iti tuktok. Nagabayda iti ermitanio a nangbuya iti nadaeg nga aglawlaw.
“Anak,” kinuna ti ermitanio iti managdakdakes. “idissomon dagiti bato a mangigawgawid kenka a makadanon iti lubong a kalkalikagumam. Itedmon kadagiti pasurotmo ti wayawaya a kalkalikagumanda. Isublimon dagiti sinamsammo a kinabaknang kadagiti pudno nga agtagikua kadagitoy. Idissomon ti awan patinggana a panagkalkalikagummo iti kinabaknang ken kinabileg ta dikanto pulos mapnek uray magun-odmonto dagitoy. Dagitoy ti bato a mangigawgawid kenka tapno magun-odmo ti kalkalikagumam a kinaragsak ken kinatalinaay ti panunot.” “Dimo ammo ti sasawem, Apo Lakay,” kinuna ti managdakdakes. “Ammok,” inyisem ti ermitanio. “Ubingka pay idi ngem iti adayo a pagarian manipud ditoy, siak idi ti agdindinamag nga agaarang ken addaan iti lima ribu a pasurot.”—O