Ti Tarakenmo ken Sika
TI TARAKENMO KEN SIKA
TI aso ti kadawyan a matartaraken nga ayup iti pagtaengan. Kaaduanna pay a mairugi a mataraken dagiti uken wenno babassit pay laeng nga aso. Manmano dagiti mangyawid iti nataengan wenno dakkelen nga aso.
Makaay-ayo nga ay-ayamen dagiti babassit pay nga aso. Nupay kasta, saan a maliklikan ti panagkagatkagatda wenno aglalaok dagiti ngetngetenda a bambanag. Kasla paglinglingayan dagiti uken daytoy nga aramidda.
Mabalin ketdi a sanayen dagiti uken tapno maisardeng daytoy nga aramidda.
Maysa kadagiti kasamayan a wagas a pangyaw-awan dagiti uken iti panagkagatkagatda ti panangwatwat kadagitoy. Kasapulan ti panagersisio iti panagdakkel ken salun-at dagiti aso. Kasla met ubbing dagiti uken a no matuokanda, mamalbaliw ti templadada ket paan-anawada.
No ipasiar ken ipagnapagna dagiti aso, maiturong iti positibo a banag ti imetda nga enerhia.
Napateg pay ti kaadda ti abalbalay dagiti aso no addada iti uneg ti balay. Maibilang kadagitoy dagiti bola, tulang, wenno tali. Nasken a takuaten dagiti abalbalay a pagaayat dagiti taraken nga aso tapno maiturong ti atensionda kadagitoy imbes nga agdadaelda.
No mangrugin nga agtubo dagiti ngipen dagiti uken, allukoyen ida nga mangkagatkagat iti abalbalayda a saan ketdi a ti ima ti amoda wenno dagiti nagduduma nga alikamen iti uneg ti balay.
Masapul ti adu anga anus ken panawen iti panangsursuro kadagiti uken tapno saanda nga agkagatkagat iti nagduduma a bambanag. Iti pay laeng damo, saan a ipapaayat dagiti ima wenno ramay a kagatkagatenda.
No rugian ti uken ti agkagatkagat, iparikna a biddut daytoy nga ar-aramidenna. Panawan ketdi wenno saan nga ikaskaso. No kastoy ti aramiden, inaig ti uken a saan a kayat daytoy nga aramidna.
Malaksid ti panagay-ayam ti uken nga agkagatkagat, kumagat pay dagiti aso no adda kabuteng wenno adda saanda kayat a maaramid kadakuada. Tapno maliklikan daytoy a galad ti aso, isinged ti aso kadagiti nagduduma a tattao ken padas. Mabalin a mabuteng wenno mapakigtotan ti aso kadagiti estranghero, ubbing, sabali nga aso ken dadduma nga ayup. Daytoy iti rason a yamo ti uken kadagitoy.—O