Saludsodem ken ni Apo Hues

SALUDSOD:

Innem a tawen itan ti napalabas, napan nagtrabaho ti asawak idiay Saudi. Manipud idi, saan pay a nagaw-awid, banag a pakariribukak la unay. Nupay kasta, agingga kadagitoy, agipawpawit met nupay saggabassit a para kadagiti tallo nga annakmi, agtawen iti sangapulo, siam, ken pito ken. Kasasaonak pay no kua iti selpon nupay manmano ket no kasanonak man, madlawko ti kinalamiisna. Adda atapko nga addan nangisukatanna kaniak. Diak met mapagdamagan da katugangak ta idi pay, saanda a pabor kaniak.

Ita, Apo Hues, iti daytoy nga ar-aramiden ti asawak kaniak, didak koma mapabasol no iti kaunggan ti pusok, in-inut met a limmamiis ti riknak iti asawak. Kinapudnona, adda mangyar-arungaing iti riknana kaniak. Ngem diak met mabalin lattan a sungbatan nupay adda met panagayatko kenkuana. Kinunak a sungbatakto laeng inton mawaswasen ti bileg ti kallaysami ken lakayko. Mabalin kadi a pawaswasko ti bileg ti kallaysami ken lakayko?

Tulongannak koma, Apo Hues.--Maribel ti Apayao

SUNGBAT:

Daytoy a parikutmo, kapada ti parikut ni Charity ti Siudad ti Vigan (“Kayatna a Pawaswas ti Kallaysada ken Lakayna,” Agosto 27, 2018). Ti panggepmo a mangpawaswas iti bileg ti kallaysayo, saan a mabalin gapu ta uray manmanokayo nga agsao, agipawpaw-it met iti sustento dagiti annakyo. Ken saan a rason ti panagpanaw ti asawam (abandonment) tapno mawaswas ti kontrata ti kasar. No awan koma ti kappia iti nagbaetanyo ta apakayo nga apa, daytoy koma ti dakkel a rason a mangpugsat iti kawar ti kallaysa. Ngem saan met.

Maipanggep iti dayta sumarsarigsig kenka, bay-am pay laeng ta narigat iti agdama a kasasaadmo. Nasayaat ketdi koma unay no makapagpatangkayo a nasayaat ken ni mistermo tapno malawlawagan ti amin. Iti panagriknak, kasla agkurangkayo iti komunikasion.—O