Ading Kosinera

ITA a lawas, sabali manen a potahe manipud iti Native Chicken Recipe Book ti Department of Agriculture Animal Products and By-Products Utilization Regional Field Office VII ti idasartayo.

Dagiti kasapulan:

1 kilo a kamanokan (native chicken)

1 kilo a lasag ti niog (buko, nakaruy)

2 tasa a getta ti niog (umuna a napespes manipud iti getta ti 3 a niog)

5 tasa a getta ti niog (maikadua a napespes a getta) 2 tasa laya, naiw-iwa ti paatiddog 2 kutsara a sibuyas, nagalip 1 kutsarita nga asin 5 bukel, naadat a sili 2 pedaso a lemon grass 2 bukel a lasona 1 kutsarita a pimienta, nadekdek 3 kutsarit a manteka (vegetable oil)

Panangisagana:

1. Iw-iwaen ti karne ti manok iti kalalainganna ti kadadakkel. Inayon ti asin ken pimienta. Bay-an a nakauper iti lima a minuto.

2. Pespesen ti getta ti tallo a niog. Nayonan iti dua a tasa a danum ken pespesen ti umuna a getta a dua tasa. Ipaigid iti apagapaman.

3. Nayonan manen ti lima a tasa a danum. Pespesen ken alaen ti lima a tasa a napespes. Ipaigid iti apagapaman.

4. Ipapudot ti manteka. Gisaren ti laya ken sibuyas. Inayon ti karne ti manok. Ikirog a nasayaat agingga nga ag-golden brown ti kolorna.

5. Inayon ti maikadua a napespes a niog. Pabureken agingga a lumukneng ti karne ti manok.

6. Inayon ti umuna a napespes a getta ti niog. Pabureken manen iti 10 a minuto. Templaen iti asin. Inayon ti nakaruy a 1 kilo a lasag ti buko agraman ti lasona ken naadat a sili.

7. Idasar a napudot.—O