Happy Teachers’ Day, Ma’am!
No napudno ti maysa a mannursuro iti propesionna, mayarig iti maysa a kandela nga in-inut a marunrunot tapno makaited iti silaw iti kasipngetan.
NO madanonan ti Teachers’ Day iti Oktubre 5, adu a mensahe ken regalo ti maaw-awat dagiti mannursuro manipud kadagiti adalanda kasta met kadagiti nagannak dagiti adalanda. Agkakapintas a rosas, agkakangina a bangbanglo, agkakasamit a tsokolate ken dadduma pay. Mangisaganada pay iti simple a programa tapno padayawanda dagiti mannursuro. Adda met sangkabassit a pagsasanguanda kalpasanna.
Makapaisem man daytoy nga aramid dagiti ubbing. Numan pay gayam adda dagiti natangken ti uloda, nasutil, ken naalikuteg no dadduma, adda met latta nabatbati a nasayaat a riknada a para kadagiti mannursuroda. Dagiti kastoy a gannuatda, makaikkat iti bannog iti maysa a mannursuro.
Padasentayo man a taldiapan ti biag ti mannursuro iti uneg ti maysa nga aldaw— manipud panangimulagatna kadagiti matana iti bigat agingga nga ikidemna iti rabii.
4:30 iti bigat. Agriingen ta isagananan dagiti masapulna iti eskuela. 5:30, manganen ken agidalimanek iti uneg ti balay. 6:00, agsaganan a mapan iti eskuela. 7:00, addan iti eskuela. Idissona dagiti awitna a mangisuro. Awirisenna dagiti ubbing a sumrek iti klasrum. Kitaenna ti uneg ti kuartoda ken ti aglawlawna. Baonenna dagiti ubbingna nga agdalus, agidalimanek ken agpunas iti uneg ti klasrum. Kalpasanna, kuyogenna ida nga agdalus iti aglawlaw. Sirpatenna no umno met laeng ti inaramid dagiti ubbing ket kitaenna no naisubli met laeng a nasayaat dagiti pinagdalusda. 7:15, agbatingting ti kampana ti eskuela. Kuyogenna dagiti ubbingna iti ground wenno lugar a pakaangayan ti flag raising ceremony. Pagliniaenna ida ket pagtalnaenna dagiti makaringgor ken dagiti sabali pay laeng ti ar-aramidenda.
7:30, mangrugin a mangklase. Mangrugin nga aganawa kadagiti ubbing a makaringgor, agisuro kadagiti saan a makasurot, mangted iti sabali nga obraen dagiti makasuroten, mangdisiplina kadagiti nasutil, mammagbaga kadagiti saan nga agdengdengngeg, mangsolbar kadagiti problema dagiti aburido ken kasta met a mangted iti masapul dagiti ubbing. 8:30, mapan manen iti sumaruno a klase. Itultuloyna dagiti obrana itay umuna a klasena. 9:30, agdardaras a mapan iti kantina tapno makapangan bassit a pangsilpo iti angesna iti sumaruno manen a klasena. Saanna pay a maibus ti sangkabassit nga snack-na, mapanto manen iti maikatlo a klasena iti 9:45. 10:45, daytoy ti maikapat a klasena. Kas itay immuna a klase, kasta manen ti aramidenna. 11:45, mapan iti kantina tapno makapangaldaw. Kalpasanna, agsubli iti klasrumna tapno bilinenna dagiti ubbing nga agdalus. Agtugaw ket pagandarenna ti laptop-na. Irekordna dagiti naaramidan dagiti ubbing iti uppat a klasena iti bigat. Kalpasanna, isaganana manen dagiti masapulna a para iti klasena iti malem.
1:00, mangrugi manen nga aglako iti angin tapno in
inut a maparangpaya ti masakbayan dagiti ubbing. Kasta manen ti aramidenna— kas itay napalabas a klasena iti bigat. 2:00, mapan iti sumaruno a klasena. 3:00, mapan iti maikatlo a klasena. Iraprapinnan ti mangisakmol iti pamedped iti bisinna tapno saan a maladaw iti klasena. 4:00, agsubli iti klasrumna ket kitaenna dagiti ubbingna. Kitaenna no nadalus ken naurnos met laeng ti klasrumna. Agtugaw ket lukibenna dagiti inobra dagiti ubbingna. Iruarna ti bolpenna ket agtsek kadagitoy.
5:00, agawiden iti balayda. 7:00, kalpasanna a mangan, lukibenna manen ti notebook-na a nakaisuratan ti aramidenna kadagiti klasena iti kabigatanna. Kalpasanna, pagandarenna manen ti laptop-na ket rugianna ti agaramid ti presentations dagiti leksionna.
Manayonan pay ti inaldaw nga aramidna no mapaayaban iti opisina ti guidance counselor tapno solbarenda dagiti parikut a pinarnuay dagiti ubbingna. Kasta met a manayonan pay ti obrana no mapaayaban iti opisina ti prinsipal ta adda maited a sabali pay nga obraenna. Kasta met a sabali pay no adda umay a nagannak nga adda pakaseknanda maipapan kadagiti annakda.
Naestaduan man wenno saan, kastoy ti aramid ti mannursuro a mangipateg iti trabahona. Itugtugotna iti pagtaenganna a panunoten ken obraen dagiti aramid iti pagadalan.
Kasta a kanayon ti inaldaw nga aramid ti maysa a mannursuro. Maitutop ‘tay kunada a no napudno ti maysa a mannursuro iti propesionna, mayarig iti maysa a kandela nga in-inut a marunrunot tapno makaited iti silaw iti kasipngetan. Kasta ti maysa a mannursuro, busbosenna ti pigsana iti inaldaw-aldaw tapno makaited lawag iti masakbayan dagiti ubbing.
Ngarud, rumbeng laeng nga ited ti naan-anay a respeto, ayat ken pammadayaw kadagiti mannursuro ta isuda ti agpatpatanor kadagiti bannuar ti pagilian. Isuda ti inna ken amma nga addaan anus, ayat ken sirib nga agserbi iti nasursurok pay ngem iti sinapataanda. Ipategtayo ngarud ida saan laeng a no tiempo ti Teachers’ Day iti Oktubre 5 no di ket iti inaldaw-aldaw a kas iti panangipateg dagiti mannursuro iti propesionda iti inaldawaldaw.—O