Mayor ti Sudipen, natay iti panagtambang
Natay iti panagtambang ni Mayor Alexander O. Buquing, 52, idi Oktubre 1, 2018 bayat ti panagbiahena nga agawid iti pagtaenganda iti Castro, Sudipen, La Union manipud iti maysa a necrological service ti Municipal Engineer ti Sudipen, La Union. Kadua ti mayor, bayat ti panagtambang, ti asawana, ni Vice-Mayor Wendy Joy Buquing, ken ni PO2 Rolando Juanbe, police security escort-na, ken ti drayberna a ni Bonifacio B. Depdepen.
Nakalasat ni VM Buquing ken bayat ti pannakasursurat daytoy, adda iti ICU iti maysa nga ospital, idinto a natay ti polis ken ti drayber.
Maibatay iti report ti polisia ti Bangar, La Union, ad-adalenda pay laeng ti motibo ti panagtambang a napasamak iti Brgy. Cadapli, Bangar, La Union idi 6:40 ti rabii ti Okt. 1, 2018. (Aidena L. Nuesca)