Norberto D. Bumanglag, Jr.

Imbaklay da John dagiti paltogda. Rimmuarda. Kellaat, linayus ida ti lawag ti headlight ti uppat a lugan.

Ti Napalabas: Sinerrek ni John ti kuarto ni Edgar ta kayatna nga ikkan iti pagnakmanna. Ngem nadiskarkulona ti kabaelan ni Edgar ket naisagmak koma no saan a dimteng da Daniel ken Jerky. Dimteng ni Gloria Sarandi iti Laoag. Ginargari ni Gloria ni John ngem pinanawanna daytoy bayat ti panagdigosna. Kinasaritana da Daniel iti restauran ti hotel. Dida ammo, addan nangkidnap ken ni Gloria. Innalada ni John iti kuerpo ti polisia ket inimbestigarda. Insardengda laeng idi dumteng ni Rommel. Inawagan dagiti nangkidnap ken ni Gloria. Dumawdawatda iti sangapulo a milion a pisos a ransom. Impakammona daytoy ken ni Mr. Bosworth. Kabayatanna, napatayen da Edgar ni Eddie Quirino ken dimmanonen daytoy iti Presidente ket kayat ni Pat nga ibabawi ti Presidente ti ipapanna iti Ilokos. Napan sinabat ni John ni Ricky Ramirez iti LIA. Sinurot ida ni Craig Stewart, maysa kadagiti kameng ti CIA nga agpangpanggep a mangpatay iti Presidente. Nangiruar ni John iti pangsakana ken ni Gloria ngem sakbay a maitulodda, tinulonganda da Daniel ken Jerky a rinaut da Edgar. Nagkukuyogdan a napan nangipan iti kuarta. Idinto nga inuray ni John ti panagparang ni Gloria, sinurot da Ricky ti napanan ti nangala iti kuarta. Nagkita metten da John ken Gloria. Imbaga ni John a papatayenna dagiti nangkidnap ken ni Gloria. Nasdaaw ni John idi lumusiaw ni Gloria. Addadan iti hotel idi awagan ni Pat Coloma ni Gloria ta kayat ti Presidente nga agkitada. Inawagan met ni John ni Mr. Wong, ti cotractor iti armas ti CIA. Nagkikitada iti maysa a naiputputong a disso. Ngem nakigtotda idi adda mangpaltog kadakuada.

U(Maika-31 a Paset) RAY la nga inkurikor ni John ti tammudona iti kanawan a lapayagna gapu iti pigsa ti putok ti Barrette M-107. Kasla napukawna ti dadduma a panagdengngegna. Ngem siniripna met laeng ti scope ti paltog. Nakapuesto pay laeng ti sniper rifle ngem awanen ti tao a mangtimtimon itay.

Insapulna ti scope. Kayatna a siguraduen a napuntaan daytoy. Agingga iti nakitana ti naudatal a lalaki. Daradara. Saan nga agkutkuti. Timmakder. “All clear!” inriawna. Rimmuar da Ricky, Daniel ken Jerky manipud iti naglingedanda. Nagturongda iti yan ni John. Madamdama pay, adda metten iti likud ti van ni Mr. Wong.

“Do you want to go to the hospital, Mr. Wong?” sinaludsod ni John. Limmagto a bimmaba iti lugan.

“Saan. Amangan no agsaludsod pay dagiti polis no ania ti napasamak. Kabaelak daytoy, Mr. Villa. Damgis laeng daytoy. Ngem nasken a pilienyon no ania ti kayatyo...” Insungo ni Mr. Wong dagiti paltog a karga ti van-na. “Iti kaadu a paltog a naiputok, amangan no agresponde dagiti pannakabagi ti linteg.” Simmagpat iti van.

“Uppat nga M-4, maysa nga RPG, uppat pay a Glock .40, dua a kahon ti C-4... and four thousand assorted ammos.”

“Are you, guys, trying to blow-up the city?”

“We just want to be prepared.” “How about the Barrette M-107? I’ll give it to you for a discounted price.”

Immisem ni John. “Saanmi siguron a kasapulan, Mr. Wong. Sa dakkel unay... Umanayen dagiti imbagak.” Sinaggaysa ni Mr. Wong nga inyawat dagiti dinakamat ni John. “I’ll just bill the agency, John, is that right?” sinaludsod ni Mr. Wong. “Right,” insungbat ni John. Dimsaag ni Mr. Wong sa inrikepna ti van. “Sigud a naulimek daytoy a siudad, Mr. Villa. Ngem kas iti panagdur-as, sumursurot met dagiti nagkaadu a bisio ken krimen— prostitution, kidnapping ken no ania pay ditan. Sumagmamano nga aldaw ti napalabas, nagsasaruno dagiti pammapatay. Diak laeng ammo no adda pannakainaig daytoy iti mapaspasamak idiay Manila. Wenno gapu ngata iti ibibisita ti Presidente ditoy?”

Immisem ni John. “Dika madanagan, Mr. Wong, nairamankamin kadagita. Sika ketdi ti agan-annad. Ammodakayon, amangan no pagibalsandaka. Agpabaawka pay laeng...”

“Ammok ti ar-aramidek, Mr. Villa... and thanks for doing business with you.” Timmallikuden ti Intsik.

Binuya dagiti uppat ti ipapanaw ni Mr. Wong sa inkargada dagiti paltog ken bala iti van a ginatangda.

“Ania ti aramidentayo kadagitoy?” sinaludsod ni Ricky. Dagiti dua a naawan iti puot a kalabanda ti kayatna a sawen. “Bay-am latta idan. Makapuotdanto lattan.” “No siak la ti mapaturay, Mang John, papatayentayo idan. Isuda pay a maksay kadagiti mangsapsapul kadakami ken Jerky,” kinuna ni Daniel. “Maaladanto ngata metten ti agbuteng.” Nagwingiwing ni Daniel. “Saandanto pulos nga agbuteng dagita ta maymaysa ti pagbanaganda no saanda nga agtungpal iti maibilin kadakuada. Ni met laeng general ti mangpaipakni kadakuada.” “Nadangkok ngarud a heneral dayta.” “Nakabutbuteng... No isu ti agbalin a Presidente ket yetnagna ti Martial Law... nakabutbuteng,” kinuna ni Daniel.

“Isu nga iti uray ania a pamuspusan, nasken a mapasardengtayo ida. Nasken a saanda nga agballigi a mangpadisi iti Presidente,” kinuna ni John. “Dayta ti pakasapulak kadakayo. Ngem umuna iti amin, kayatko a rautentayo ti warehouse a kunayo a yan dagiti atapenyo nga Abu Sayyaf...”

“Nakasaganakami, Mang John. Agtignaytayo ngaruden,” indagdag ni Daniel.

“Saan pay nga ita. Urayentay’ nga agsipnget. Agsublikayo pay laeng iti hotelyo. Agawidak biit... tapno mapakaammuak met da mama ken Jay-ar a sibibiagak pay laeng...” Nagkatawa ni John. ”Iti eksakto nga alas nuebe, serkentayo ti warehouse.” S AAN a mapanawan ni Mrs. Villa ti telebision. Buybuyaenna dagiti agsasaruno a riribuk a mapaspasamak iti Manila. Umad-adun dagiti agdemdemonstrasion. Kalepleppas met ti panangipadamagda manen iti ipapatay ti maysa a nalatak a bokal ditoy probinsiada. Awan man laeng ti matiliw wenno maibaga dagiti pannakabagi ti linteg nga akin-aramid.

Ballaag ngata dayta iti Presidente? Magustuanna pay met ngarud daytoy. Manangngaasi ken salsalaknibanna dagiti babassit a tattao.

Kayatna met ti mapan iti kapitolio no bigat bareng makitana met ti Presidente uray no itinto laeng iseserrek daytoy iti kapitolio.

“Grandma, don’t you get tired watching those people demonstrating?” dina napupuotan ti yaasideg ni Jay-ar kenkuana. “I like it...” kinuna ti baket. “Grandma, they are screaming, they are yelling at each other... they are throwing rocks and bottles at those policemen... that’s not right.”

“They call it freedom of expression, apok. Nawayada a mangkritikar iti gobierno.”

“Ngem agdangranda, grandma. Paibalud koma ti presidente ida.” Immisem ti baket. “Maawatamto a nasayaat dayta inton dumakkelka, apok... Kayatmo ti sumurot kaniak no bigat?” “Papananta, grandma?” “Umay ditoy ti Presidente. Kayatmo a makita?” “Hm, kasla exciting sa, a, grandma. Makasaritakto kadi?” “Ay, ubingka, aya, a talaga. Saan, a...” “Oh, not fun ngarud, grandma. Buyaekto laengen iti TV ngarud.”

“Siakto latta ngaruden ti mapan. Uray ta adda met dagitay dua nga ubbing a kaay-ayammo.”

“Ngem no makitak, grandma, sa tarayek nga asitgan, kasaritanak no kua?” “Di ammo, a. Ngem ania koma ti ibagam kenkuana?” “Ibagak a tulonganna ni dad a mangsapul ken ni Melanie.” Napanganga ti baket. “Umayakto ngarud, grandma,” kinuna ti ubing sa timmarayen nga immadayo. “Papanam manen?” “Innak kaay-ayam da Rodell ken Simon, grandma!” Inlukat ni Jay-ar ti ridaw. Nanalbaag a nairikep. Isu met a mailukat ti ridaw iti sango. Simrek ni John. Nagkusipet dagiti mata ti baket a nangkita

ken ni John. “Ania ti napasamak kenka?” “Nothing, mom...” “Nakarugrugitka. Dagadagaka.” “Nadadaelan ti lugan, mom,” ti la addan a nakarkarawa ni John nga irason. “Sinirokko itay.”

“Hmm...” Immuneg dagiti uged iti muging ti baket.

“Innak laeng agdigos, mom.” Tumallikud koman ni John ngem inggawid ti baket. “Papanam no bigat?” “Bigat? Apay?” “Kuyogennakaminto koma ken Jay-ar. Inkami makipagsabat iti Presidente idiay kapitolio.”

Nakigtot ni John ket nakaparpardas a naisungbatna: “No, no, mom. That’s not a good idea. Adunto ti tao. Agdudumada. Dagiti supporter ti Presidente ken dagiti kalabanna.”

“Rally ken demontrasion met laeng... ken ammok met nga adu dagiti guadia no kasta nga agbiahe ti Presidente.”

“Kasanon no adda mapasamak a riribuk? Dikayo laengen mapmapan. Buyaenyonto laengen iti TV.” “Sabali laeng met, a, no makitam iti personal.” “Mom...” Agkedked ni John. “No dimo masango, dakaminto lattan ti mapan ken Jay-ar.” “Mom... Saankay’ la koman mapmapan. Delikado.” “Ay, awan ti makaitured a mangriribuk. Kabutengda ti Presidente.” Immanges iti nauneg ni John. Kasano nga ibagana a planoda a patayen ti Presidente? Amangan no kasla paggugubatanto ti Laoag inton bigat.

“Ala, inkan agdigos,” kinuna ti baket. “Dinakamin pampanunoten. Kabaelanmi ti mapan a dakdakami.”

Saanen a naguni ni John. Nagturong iti kuartona. Ngem maburiboranen. Kasano ngata a maallukoyna ni mamangna a saan laengen a mangituloy iti panggepna?

Napakidem ni John. Agpeggad ni Jay-ar ken ti inana. Saan a mabalin a mapanda. Aramidenna ti amin a pamuspusan, saan laeng a mapan dagiti agapo iti kapitolio.

Ngem kasano?

NAKAUL-ULIMEK ni Ambassador Adam Hutchison a dumdumngeg ken ni Gen. Miguel. Ibagbaga ti heneral dagiti mapaspasamak iti Ilokos agraman ti di agsarday a pannakaengkuentro dagiti tao ti heneral ken ni John Villa ken no kasano a nagbalinen daytoy a lapped iti natalinaay koma a pannakaisayangkat ti planoda a panangpapatay iti Presidente.

Saan a kayat ti heneral ti ar-aramiden ni John. “Nasken a ma-neutralize!” kinuna ti heneral.

Ngem kasano? Papatayenda? Wenno kidnapenda nga ilemmeng sa ruk-atandanto met laeng no malpas ti plano?

Uray ti ambassador, masemsem metten iti ar-aramiden ni John. Kayatna a paipakni daytoy. Ngem kailalaanna ti agkabannuag. Narayray ti masakbayanna iti ahensia. Maikidemna dagiti dadduma nga ar-aramiden daytoy a John Villa. Ngem dina met kayat nga isu ti lapped iti plamplanuenda a kudeta. “Ambassador, are you listening to me?” insinga ti heneral. “Of course, general, I’m listening.” “He has to be eliminated, ambassador,” inulit ti heneral. “He is one of us, general.” “I know that. But he is becoming a threat to our plan.” “He can’t stop us, general.” “But he can put us in danger. Diak kayat daytoy, ambassador. Diak kayat nga adda mabati a siit iti daytoy a plano. No dimo kayat a paipakni kadagiti taom, siak a mismo ti mangpaipakni.”

Immanges iti nauneg ti ambassador. “Let me first handle this, general. I’ll talk to him. Nalabit a maallukoyko pay laeng daytoy a saan a makibiang.” “Ket no saan a dumngeg kenka?” “Then you have my blessings to eliminate him.” “How soon can we do it?” “Give me a few hours. Maybe, before midnight... If I can’t convince him to back off, then, you are free to whatever you do with him.” “Roger that...” Naragsaken ti timek ti heneral. “But I’m warning you, general. John Villa is not a typical spy. He is good. As a matter of fact, he is one of our best.” “Tagtagibassitem ti kabaelak, ambassador?” “Saan, general. Diak laeng kayat a pagbabawyamto ti ania man nga aramidem. Kas nakunakon, naidumduma nga espia ni John. Adun ti nagtarigagay a mangpapatay kenkuana ngem agingga ita, sibibiag pay laeng.” Naasut ti nauneg nga anges ti heneral. “Agyamanak iti patigmaanmo, ambassador, ngem ammok ti kabaelanmi kadagiti taok. Awagannak laeng inton makasaritam ni John Villa. Kas nakunakon, diak kayat nga isu ti mangdadael iti daytoy a plano. Over and out, ambassador.” Nagdayal ti ambassador kalpasan ti panagsaritada iti heneral. “Agent Stewart, sir...” insungbat Craig Stewart, ti mangidaulo kadagiti detail iti Ilokos. “I want you to find John Villa.” “Sir... that bitch...” makasuron ti timek ni Agent Stewart. “If I ever see him again,

I’m not gonna talk anymore, I’ll just shoot him.” Nagkatawa ti ambassador. “Come on, be cool...” “He embarassed the hell out of me...” “Just warn him. Is that clear?” nakabilbileg ti bilin ti ambassador. “Just because of you, sir. What’s the message?” “Tell him not to interfere.” “That’s it?” “That’s it... and tell me his reaction, ASAP...” “10-4, sir.” “How confident are you on the mission, Agent Stewart?” sinaludsod ti ambassador. “Nothing to worry about, sir.” “With or without John’s interference?” “With or without John’s interference, sir. We will execute the plan. Trust me. We will succeed.”

“Good... because this is the easiest location to accomplish this mission. No agkibaltangkayo dita, narigrigatton. Either we do it inside Malacañan Palace or in Davao City which is the next scheduled engagement.” “We will finish it here, sir. Trust me...” “Good luck. But, first, take care of John Villa.”

NAKATAKDER ti nakaroba a Presidente a mangbuybuya iti makaalino a pammagi ni Gloria. Agwingwingiwing ta saan pay laeng a mamati a natagikuana daytoy a babai. Naidumduma daydi a panagam-ammoda. Idi maipablaak kadagiti amin a pagiwarnak iti Filipinas ken maiwaragawag kadagiti telebision ti tured ni Gloria a nakitinnulong kadagiti kameng ti Special Forces ti 72nd Infantry Batallion tapno matungday ti gagem ti ISIS a mangdangran koma manen iti Amerika, saanna a pinalabas daydi a kanito. Impagnana ti pannakaipaay ken ni Mayor Gloria Sarandi iti pammadayaw agraman ti pannakainominarna para iti Quezon Service Cross award, ti kangatuan a pammadayaw a maited iti maysa a Filipino. Naipaayan met ni Colonel Ramon Contillo iti Philippine Medal of Valor. Iti pakasaritaan ti Filipinas, lima pay laeng ti nakaipaayan ti Quezon Service Cross: ni Carlos P. Romulo, ni Emilio Aguinaldo, ni Ramon Magsaysay, ni Benigno Aquino, Jr., ken ni Jesse Robredo. No kanunonganto ti Kongreso, ni Gloria ti maikanem.

Napalaus idi ti panagyamyaman ni Gloria kenkuana. Nagtungtongda a nabayag iti ballroom ti Malakanyang. Naginumda agingga iti agpadadan a naulaw. Uray dagiti Presidential Security Group ammoda ti inaramidda. Nabatida a dudua. Naarakupna ni Gloria. Kimmayetket met daytoy. Ket gapu ngata ta agpadada a nabartek, agpadadan a nakalipat.

Wenno nagay-ayatan met ni Gloria? Kabibilegan a tao iti Filipinas ti karelasionna!

Ngem uray ania ditan ti gapuna, nangrugi ditan ti masansan a panagkitada. Tunggal mapan iti Mindanao, sililimed latta nga agkitada. Agpadada ketdi a naannad. Ken kalkaluban wenno salsalakniban dagiti kameng ti PSG agramanen ti

Chief of Staff-na.

Ngem ita, agduadua ni Pat no ania a talaga ti gagem daytoy a babai kenkuana. Bileg? Ti posibilidadna a mabalin a suportarannanto no kas pagarigan ta pilienna ti agpabotos a senador, bise presidente? Wenno presidente pay ketdi.

Intangadna ti basona a naglaon iti arak sa kinitana manen ti ladawan ni Gloria ken ti lalaki a kinainnarakup daytoy iti Laoag International Airport. Asino daytoy a lalaki? Adda ngata relasionda? Immanges iti nauneg. Agimon? Kinutina dagiti abagana. Saanna nga ammo. Adun a babbai ti naglasat iti biagna. Kas kuna ti Chief of Staff-na, nalablabes ngem ni John F. Kennedy ti kinababairona. Maikutanna ti asino man a babai a kayatna.

Nagareng-eng ni Gloria. Iti panagmulagatna, naipasabat kadagiti matana ti Presidente. Immisem daytoy. “Good morning, Mr. President...” “Good morning, Mayor... Nag-enjoy ka ba?” “Very much, Mr. President... very much.” Naginnat. “I just wanna ask you something...” “Go ahead...” Inyawat ti Presidente ti ladawan ken ni Gloria. Dimmakkel dagiti agsalsaludsod a mata ni Gloria. Ngem awan ti simngaw a timekna

“Asino dayta a lalaki?” nakatantanang ti timek ti Presidente.

MASMASDAAW dagiti uppat idi makasidegda iti warehouse. Awan ti silaw malaksid laeng kadagiti adda iti alad. Nakasipsipnget iti uneg. Nakarikep ti ruangan. Namnamaenda nga adda guardia nga agur-uray kadakuada, ngem awan.

Dimsaag ni Jerky a nagbitbit iti bolt cutter. Kasla awan aniamanna a nangpekka iti kandado. Inlukatna ti landok a rikep ti ruangan. Inserrekda ti naglugananda a van.

Rimmuar dagiti tallo a nakaiggem iti M-4 idinto nga immunan ni Jerky. Addan iti ridaw ti warehouse. Pinuersana a linuktanna ti ridaw. In-inayad nga inlukatna. Addan dagiti tallo iti likudna. Nakaiggemda amin iti M-4.

Nakaan-annadda a simrek. Impaturong ni John ti flashlightna iti uneg. Nakadaldalimanek. Nakalawlawa a kasla awan man laeng ti pagilasinan nga adda nagyan a tao ditoy. “Are we sure we got the right building?” sinaludsod ni John. “This is the warehouse, John... We are a hundred percent,” insungbat ni Ricky. “Apay nga awan tao?” kinuna latta ni John. “Talaga nga aduda itay malem. Nagtagiarmasda. Nagatapda ngata a subliantayo ida?” binagi ni Daniel.

Immanges iti nauneg ni John. Maymaysa laeng ti kayatna a sawen dayta. Ammoda nga addan nakatiktik kadakuada. Ket nasken nga aglemmengda. Ngem sadino? “Ania itan, Mang John?” kinuna ni Jerky. “Agsublitayon. Aguraytayo agingga iti bigat.” insungbat ni John. “Let’s go!”

Imbaklay dagiti uppat dagiti paltogda. Rimmuarda. Kellaat, linayus ida ti lawag ti headlight ti uppat a lugan. Nakaparpardasda a nanggunay kadagiti paltogda.

“Don’t even try it, gentlemen. Drop your weapons. Raise your hands. Or someone is gonna die tonight. And it’s not us. So guess?” nakabilbileg ti timek iti likudan dagiti makapurar a silaw.

(Maituloyto)