Ammuem Pay Dagitoy
Kinuna ti Malakanyang, babaen ken ni Presidential Spokesperson Harry Roque, a saan a pudno ti damag nga agkurkurang ti bagas iti pagilian; nga adda umdas a suplay ti bagas agingga a dumteng ti naangkat a bagas iti arinunos daytoy a tawen.
Kinuna ni Roque nga adda dagiti negosiante ti bagas a mangar-aramid iti artipisial a panagkurkurang iti bagas tapno adda rason a ngumina ti bagas.
Mainaig iti daytoy, imbilin ni Presidente Duterte iti Philippine National Police a sukimatenda dagiti bodega dagiti maatap a rice hoarder.
Agtultuloy ita ti pannakitinnulong ti Philippine National Police (PNP) kadagiti nadumaduma nga ahensia ti gobierno iti kampania daytoy kontra kadagiti maatap a rice hoarder wenno agiduldulin iti adu a bagas.
Kinuna ni PNP chief Director General Oscar Albayalde a katinnakunaynay ti PNP iti DTI (Department of Trade and Industry) ken iti DA (Department of Agriculture) ken NFA (National Food Authority).
Inlawlawag met ni Presidential Spokesperson Harry Roque a saan laeng a para iti PNP ti nasao a bilin no di pay ket ken iti Department of the Interior and Local Government (DILG) iti babaen ni Secretary Eduardo Año.