Idi Un-unana a Panawen
IDI un-unana a panawen, adda agkaarruba a Pusa ken Loro. Iti maysa nga aldaw, inawis ni Pusa ni Loro a mangaldaw iti balayna. Isu a napan ni Loro. Nangipasango ni Pusa iti sangakiddis nga ikan, sangailgat a karne ti nuang, ken sangapirit nga innapuy. Daytoy ti naglanglanganda. Nupay ammo ni Loro a bassit ti sagana, saan a nagrekreklamo.
Iti simmaruno nga aldaw, ni met Loro ti nangawis ken ni Pusa a mangaldaw iti balayna. Nangisagana ni Loro iti lima gasut a bibingka, tinuno a sangagasut a luppo ti manok, ken sangasiliasi nga innapuy.
Inibus ni Pusa ti uppat a gasut ket siam a pulo ket siam a bibingka, tinuno a sangagasut a luppo ti manok, ken sangasiliasi nga innapuy. Inalimonna amin dagitoy. “Mabisinak pay!” kinuna ni Pusa. “Awanen ti sabali nga insaganam?” “Awanen. Ngem no kayatmo daytoy bibingkak, kukuamon,” kinuna ni Loro. Isu nga inalimon ni Pusa ti agmaymaysa a bibingka a bingay ni Loro. Idi maibus ni Pusa ti bibingka, kinuna: “Ay, mangrugin a mariknak ti bisinko. Awanen ti sabali pay a saganam?” “Awanen,” kinuna ni Loro. Sa inyangawna, “No kayatmo, siakon ti sidaem.” Ket ginammatan ni Pusa ni Loro ket inalimonna metten a sibubukel! Nakita ti maysa a baket a nagsusuon iti labba ti inaramid ni Pusa ket kinunana, “Nagawan a bainmon! Pinakannaka la ngaruden, sindam pay laeng!”
“Ay, mannanao a baket!” kinuna ni Pusa. “Sidaka man laengen!” Ket inalimonnan a sibubukel ti baket.
Nakita met ti maysa a lakay a nakasakay iti nuang ti inaramid ni Pusa iti baket. “Hoy, dika la naasianen iti baket!” imbugkawna iti Pusa.
“Ay, nagloko daytoyen a lakay ta bugkawannak ketdin!” Ket inalimonnan ti lakay agraman ti nagsakayanna a nuang. Isu met a lumabas ti maysa nga agkasar a nobio ken nobia. Kinuna ti nobia, “Ay, sinda ni Pusa ni ulitegko!” Ket pinanggepna a gammatan ni Pusa.
Ngem naparpardas ni Pusa a nanggammat iti nobia. Inalimonna a sibubukel ti nobia. Inramanna pay ti nobio.
“Hay, nabsogak met laengen,” kinuna ni Pusa kalpasanna. Ngem idi makitana ti dua a kappi a magmagna iti igid ti kalsada, pinidutna pay laeng dagitoy ket insakmolnan ida a sibubukel.
Natnag dagiti dua a kappi iti tian ni Pusa. Anian a nagsipnget iti uneg. Ditoy, nakitana ti nobio ken nobia nga agin-innarakup iti butengda. Nakitana pay ti lakay ken ti nuangna, ken ti baket a nagsusuon iti labba, ti sangasiliasi nga innapuy, ti sangagasut a tinuno a luppo ti manok, ti uppat a gasut ket siam a pulo ket siam a bibingka, sa ti maysa a bibingka nga iti rabaw daytoy, adda dita ti Loro a kasta unay ti pigergerna.
“Masapul a makaruartayo amin ditoy!” kinuna ni Kappi iti kaduana. Ket in-inut, kinitkittibanda ti tian ni Pusa agingga iti nakaaramidda iti abut. Ket ditoy a rimmuar amin a nagyan ti tian ni Pusa— ti Loro ken dagiti taraon nga insaganana, ti baket a nagsusuon iti labba, ti lakay ken ti nagsakayanna a nuang, ken ti nobio ken nobia.
Ni met Pusa, natay gapu iti nakaro a sakit ti tianna.—O