Saludsodem ken ni Apo Hues
Rimmayok manen ti katawada. “Lipatenyo ‘garuden dayta,” nagtimek ni Eliang. “Tumugawkay amin ta siak ti agbuya.”
Nagay-ayam da Tinang, Pitang, Marla ken Ernia. Nagbuya ni Eliang.
Pagam-ammuan, intupak ni Marla ti ‘2 balls. “Ponting!” kinunana.
Pagdaksanna, sakbay a maarikuskos ni Marla ti inabakna, adda manen dagiti polis nga ipanguluan ti hepe. Awanen ti nakataray kadagiti lima. “Tiliwenyo dagita!” kinuna ti hepe kadagiti taona. Masuron ni Eliang a simmungbat. “Adda permitmi, hepe!” inkitakitna. Impakitana ti permitda.
“Ammok nga adda, ma’am,” insungbat ti hepe. “Ngem trespassing-kayo. Immay nagreklamo ti akimbagi iti daytoy balay.”
“Kasano koma ket no nabayagen a natay ti akimbagi iti daytoy a balay? Awan kabagianna, ni Urbino Ambalusay!” inriri ni Eliang. “Siguradoka, ma’am?” kinuna ti madanagan a hepe. “Agsapsapulkan sa ketdi iti pakaisagmakam, hepe?” inkariten ni Eliang.
“Ngem adda immay nagreklamo nga agnagan iti Urbino Ambalusay. Agririkayo kano pay. Perhuisiokayo kano.”
“Sangapulo a tawenen a natay ni Lakay Urbing, hepe,” ipapilit latta ni Eliang.
Ngem dagiti kakaduana makariknadan iti buteng. Bumsag payen da Pitang ken Marla.
“Amangan no agpayso nga adda al-aliana daytoy a balay, manang,” kinuna ni Ernia ken ni Eliang.
“Ket isu ti napan nagpulong, kunam,” inyayon ni Tinang. “Dandani ngamin piesta dagiti natayen…”
Madlaw ti panagbuteng dagiti kakadua ni Eliang, kasta met dagiti dadduma a polis. Kasla bumsag metten ti naubing pay a hepe iti panagkita ni Marla.
“Kinaagpaysona, kaduami. Adda idiay ruar,” kinuna ti hepe. Nagal-alud-od nga immasideg iti nakalukat a tawa. Tinalawatawanna ti nagbatian ti kinaduada a nagreklamo. Ngem awanen daytoy. Tinaliawna dagiti polisna. “Bay-anyo idan. Intayon. Awan metten daytay nagreklamo,” kinuna ket linayawna ti dadael a tawa. Saanen a nagna iti ridaw. Simmurot dagiti polisna.
Maragsakan koma ni Eliang ta inabakna manen ti hepe. Ngem immaplaw ti angin ket inabak ti buteng. Saanen a nagpaatiw. Arintarayen a rimmuar. Sinurot dagiti kakaduana. Pinanawandan dagiti nakawara a pitsas ti madiong ket no kitaem ida iti ngato, kasla isudan a madiongera ti mangkamkamat kadagiti polis. Ngem pagammuan la ta nagsardeng ni Marla. “Tarayen, Marla!” inyikkis ni Tinang. Ngem saan a nagkir-in ni Marla. Gapu ta ap-apaen ni lakayna, intugotna amin nga urnongda ken dagiti nasisita a papelesda. Kunkunana ngamin a no saanen a patadogen ni lakayna iti balayda, adda met kenkuana ti kuartada ken papeles dagiti sanikuada. Ngem kasano ket adda amin dagitoy iti petakana— a nabatina iti daan a balay?
Inturtured ni Marla ti nagsubli iti daan a balay. Makaammo ditan, kunkunana iti bagina. Ngem anian a kigtotna idi masungadanna ti maysa a parsua iti tinalawanda a pagmamadionganda. Kasano a dina malasin dayta a lakay?
Timmaliaw ti lakay. Sa timmallikud ket kasla nagpukawen nga asuk.
Nabati ni Marla a mangkamkamat iti angesna. No agbiag, asinonto ti mamati a nakakita iti al-alia?
Kabigatanna, nasapa pay ngem naummongen dagiti madiongera.
“Makaay-ayamtayo amin ita,” kinuna ni Eliang— ngem awanen ti ganaygay ti bosesna.—O