Okeyka, Apong

Doning a nakakaammo lattan a nangkarga kadagiti baso nga indissok. Intangadna ti maysa. Nganngani naibus ti linaon daytoy idi idissona.

“Ammok a kadanagmo ti kaawan ni Anita ta awan pakipangananyo,” inyayek-ek ni Ikit Monang. Diak man ammo ti pakaragragsakanna unay. “Ala, idiay balay lattan ti pangmalemantayo.”

Naipugso ni amang ti mekmekmekenna a biskuit iti kigtotna iti kinuna ni ikit. Kasla napugsuan iti angin a naggapu iti natapok a bit-ang ni Mang Narsing.

“Ama, aya… nalaingka met gayam nga agangaw, manong!” bangbangir ti isem ni Mang Narsing. Pinunasanna dagiti maregmeg ti biskuit a nagdisso iti tisertna.

“Monang, kunam, a, saan ketdi a manong!” inyatur ni ‘Tang Doning.

Nasiputak a ngimmato ti kutit ni Mang Narsing ken ti panagbullad ni ‘Tang Doning. Ammoda ti kinaimut ni Ikit Monang!

“Wen! Uray ta dadakkelen ti bunga ‘diay papayak,” inyisem ni Ikit Monang ken ni Mang Narsing. Mula ni Mang Narsing ti ibagbagana a papaya.

Nagtungtung-ed ni Mang Narsing. Tiningiganna ni Ikit Monang. “Wen, a! Uray ta adu ti pamusianyo. Bagim ti manok ta bagik ti papaya,” inrungiitna.

“Ala, bagimin ti marunggay,” insallawat ni amang ket nagkakatawakami.

“Sige, dita met yan da Monang ti panganantayo,” nainayad ti timek ni ‘Tang Doning. Nasiputak ti intakaw nga ikikitana ken ni Ikit Monang. Uray ti panaglibbi ni Mang Narsing, saan a nakalisi kadagiti matak.

APAGISU a mangrugi ti “The Cure” idi umay ibaga ni ‘Tang Doning a bumangirkamin iti yan da Mang Narsing. Gapu ta bagi ni Mang Narsing ti naparti a manok, iti yanda kano laengen ti pangananmi ta inton maminsanen iti yan da Ikit Monang. Naragsakan ni ikit. Dinagusna ti napan nangala iti papaya. Kasta unay ti ellek da amang ken Mang Narsing ta dua a nagdadakkel nga uyaoy ti innala ni Ikit Monang a papaya. Kapilitan a dua a dadakkel a pamusian ti pinarti ni Mang Narsing.

“Pakialam kano ‘diay artemyo a sili, Lilac,” kinuna ni ‘Tang Doning.

Nagtung-edak. ”Sumarunokaminton,” kinunak. Nanganen dagiti addimi agraman ni inang. Tallokami laeng ngarud kada amang ken Allison a bumangir.

“Ala, sige ngarud ta innak alaen ti pangikargaan iti kanen ni Nana Idad.” Intudona iti laud. Kayatna sawen, adda ni Nana Idad iti yan dagiti kakaanakan ni Ikit Monang.

Nakasangon da Minda, Pediong ken Ikit Monang a nasangpetanmi. Nalawa ti lamisaan da Mang Narsing. Kas iti makitkita iti ladawan a naglamisaanan da Apo Jesus ken dagiti disipulona iti maudi a pangrabii sakbay a liniputan ni Judas Iscariote ni Jesus. Nagpipintas dagiti plato ken baso nga inruarna.

“Sus, nakabutbuteng metten dagitoy, manong,” kinunak. Insungok dagiti china wares a nadisenioan iti sabong ti lotus. Indissok ti bandehado a nangikkak iti liningta a naglalaok a mataan ken talakitok.

“Ay, dayta a talaga ti us-usarenmi, ading,” inyisem ni Mang Narsing. Saan kano a kayat ni Nana Dalin ti saan a porselana a plato. “Apay, dakdakayo ngay?” Kinita ni Mang Narsing ni amang.

“Nangandan, a, ta mabaybayagkayo met nga agluto,” inkatawa ni amang. Nagtugaw iti abay ni ‘Tang Doning a mangsangsango ken ni Ikit Monang.

“Ket maibustayo ngarud dagitoy?” Kinita ni ikit dagiti naidasar iti lamisaan. Malaksid iti tinola a nagnunumuanmi, adda pay linuto ni Mang Narsing a Korean style sweet and sour pork ken beef steak Filipino style. Adda pay tinuno a liempo. Ginatang kano ni Pediong ta ti ammona, umay met makipangrabii ni kapitan. Adda met gayam nangawis a sabali.

“Ala, ket pulotanen, a, no di maibus,” inngirsi ni Pediong. Tinapis ni Minda ngem ad-addan ti ngirsina. Nagdayamudom ni Minda ngem bangbangir met ti isemna.

“Wen, kayatko dayta,” kinuna ni Mang Narsing. Napan iti bar-da. Nangala iti mainum. “Cognac Claude Chatelier VS. Fresh from France!” inngatona ti botelia.

Nagtipat da amang ken ‘Tang Doning. Nagmisuot met ni Ikit Monang.

“Manganak ketdin ta innak maturogen,” kinuna ni Allison ket naglabayen. Inyunana a rinamanan ti sweet and sour.

“Ala, ta siak ti mangyawid ken ni amang no mabartek,” kinunak met. Tiningigak ni amang.

Nagkatawa ni amang. Pinatangarna ti tanganna. “Kasta man, nenengko, ta ramanak man dayta naggapu iti France nga arak,” kinunana. Kinitana ti arak nga iggem pay laeng ni Mang Narsing.

“Ay, adda met para kadakayo a babbai,” kinuna ni Mang Narsing. Indissona ti cognac iti lamisaan sa nagsubli iti bar. Nangala iti Maria Clara Sangria. “Kasla grape juice la daytoy,” kinunana idi kusilapan ni Ikit Monang. “Arak latta dayta,” inyingar ni Ikit Monang. “Ramanam met ti nanam ti nakaparsuaan, a, anti,” inkidag ni Minda ken ni Ikit Monang. Napikar sa ni ikit ket kinemmegna ti sentro ni Minda ket kasla agimegmeg iti naingar a kappi ti namay-anna. Naggulagol ni Minda ket natipawna ti kutsara nga iggem ni Pediong. “An’a ti kunam, ulitem man?” kinuna ni ikit. “Dayta arak iti ibagbagak…” agdiwdiwig ni Minda isu a di unay naunget ti kusilapna