Ading Kosinera
ADTOY ti sabali pay a potahe a naipalaon iti Native Chicken Recipe Book ti Department of Agriculture Animal Products and By-Products Utilization Regional Field Office VII ken karaman kadagiti naibunong a pagbasaan iti Maika-14 nga Agriculture and Fisheries Technology Forum and Product Exhibition nga insayangkat ti Department of Agriculture-Bureau of Agricultural Research (DABAR) idi Agosto 30-Septiembre 2 itoy a tawen iti SM Megamall, Siudad ti Mandaluyong.
Dagiti kasapulan:
1 kilo a kamanokan (sangabukel), naparti
1 bukel a kalalainganna ti kadakkelna a sibuyas, nagalip
1 bukel a bawang, nadekdek
1 kutsarita a pimienta
1 bukel a carrots, kalalainganna ti kadakkel, nagalip
2 bukel a patatas, kalalainganna ti kadakkel, nagalip
2 bukel a bell pepper, kalalainganna ti kadakkel, naiwa iti paatiddog
1 bassit a latta a tomato sauce
1 bassit lata a pork and beans
½ tasa a catsup
1 kutsarita a soy sauce
1 kutsara nga asin
2 tasa a danum MSG wenno betsin (saan nga inkapitan)
2 kutsara a cornstach (saan nga inkapilitan)
Panangisagana:
1. Isagana amin dagiti ramen.
2. Yuper ti karne ti manok iti asin, soy sauce, pimienta, ken MSG iti 30 a minuto.
3. Gisaren ti bawang ken sibuyas agingga nga ag-golden brown. Inayon ti karne ti manok. Lutuen a nasayaat.
4. Inayon ti danum. Lutuen agingga a lumukneng.
5. Inayon ti patatas, carrots, ken dadduma pay a seasoning.
6. Ilimog ti cornstarch iti danum.
7. Pabureken iti lima a minuto.
8. Adawen ken idasar a napudot.—O