Tips

Tarabay iti Pagtaengan, Salun-at ken Dadduma Pay

DADDUMA PAY NGA USAR TI PENCIL CASE.

Saan laeng a pagidulinan iti lapis ti pencil case. Napintas pay a pagipanan kadagiti kosmetiko, nangruna dagitay waterproof a plastic case. Saan met a nasken a gumatangka iti first aid kid no adda la ketdi pencil case. Kargaam ti pencil case iti adhesive bandages, antibiotic ointment, aspirin, ken dadduma pay a patiem a nasken a kasapulan iti emerhensia. Idulin iti pagtaengan wenno mabalin met nga itugot no agbiaheka. Napintas pay a pagikargaan iti stockings ti pencil case no agbiaheka. Lukotem sa iserrekmo iti pencil case. Nataltalgedda ditoy ngem ti iserrekmo lattan iti maleta wenno iti suitcase-mo.

TAPNO SAAN NGA UMAYAS TI LANGDET.

No umayas ti langdetmo iti pangibarabawan a baldosa iti kosina wenno iti kitchen counter, putipotam iti lastiko ti agsumbangir nga igid daytoy. Apagisu daytoy a teknik kadagitay kayo wenno plastik a langdet a naiingpis a magatang kadagiti supermarket.

TAPNO DI AGLING-ET DAGITI DAKULAPMO.

No adda dagiti dadakkel a pasken a papanam wenno adda kasinnarakmo ket mabalin nga agnerbioskanto, liklikam nga agbabasa wenno aglinget dagiti dakulapmo babaen ti panangipulagidmo iti deodorant kadagiti dakulapmo.

NAANGRAG KADI TI BUOKMO?

Gapu iti nakaro a panagkakainaran, naingel a shampoo ken blow-drying, mabalin nga umangrag ti buok. Tapno mapasublim ti kinasalun-at ti buokmo, padasem daytoy. Mangipapudot iti ½ tasa a lana ti niog (mabalin pay ti olive oil) agingga iti kabaelam ti pudotna no isagidmo ti ramaymo iti daytoy. Imasahem ti lana iti buokmo sa kalpasanna, bungonem ti buokmo iti shower cap wenno plastik. Parabawam iti tualia a kas nayon a bungonna ket bayan a kastoy iti 30 a minuto. Kalpasanna, ag-shampoo a kas iti gagangay.