Padasem Daytoy, Kailian
…ken dadduma pay a damag manipud iti ballasiw-taaw.
NAKAAY-AYAT dagiti damag a naawattayo manipud kadagiti ganggannaet a pagilian. Kas koma iti impatulod kadakami ti Agricultural Research Service (ARS) ti US Department of Agriculture, a retrato dagiti carrot a nadumaduma ti marisda, kas kadagiti maris ti bullalayaw. Adda amarilio, ubi, naranghado, kdp. Nabaknang dagitoy, kangrunaanna ti ubi ken kaaspingna, iti antioxidant. Makatulong dagiti taraon a nabaknang iti antioxidant a pangontra iti kanser ken sakit ti puso.
Nabaknang met iti bitamina dagiti maris-amarilio ken dagiti dadduma pay ti marisda.
Adda pay baro a takuat dagiti agsuksukisok manipud iti sanga ti ARS iti Albany, California. Dagiti nagalip a carrot, iserrekda iti makina ket masilnagan iti UV-B, maysa kadagiti tallo a klase ti ultraviolet ray manipud iti init. Iti uneg ti 14 a segundo laeng, agbalin a triple ti ramen nga antioxidant dagiti carrot.
Daytoy a teknolohia, naipadas met kadagiti uong idi 2008. Nasilnagan met dagiti napirpirsay nga uong iti UV-B ket napaneknekan a ngimmato ti imet dagitoy a Vitamin V.
Kas kuna dagiti eksperto manipud iti ARS, natatalged a kanen dagiti nasilnagan iti nababa ti dosisna a UV-B radiation.
Sukog-Puso a Sandia
Impadamag met kadakami ni Omar Zaidan, maysa a konsultant iti panagpatanor kadagiti nateng ken prutas. Kunana a ti maysa a kooperatiba idiay Espania, aglaklako ita kadagiti babasit a sandia a sukog-puso iday Inglaterra.
Iti napalabas a sumagmamano a bulan, dua a tonelada a kakastoy a sandia ti ginatang ti maysa a negosiante iti London.
Apay a napanunot dagitoy a taga-Espania ti agpataud iti kastoy a sandia?
Iti panagkunami, maysa nga estratehia ti panaglako daytoy. Ti nasao a negosiante a taga-London, kankanayon nga agsapsapul kadagiti naidumduma a produkto tapno maawisna dagiti aggatang. Dagiti naidumaduma a produkto, mabalin pay nga ilaklako iti nanginngina.
Uray met dagiti mannalon (kas koma kadagiti taga-Espania), agpampanunotda met iti naidumduma a produkto a mabalin nga ilakoda iti nanginngina.
Pinia ti Thailand
Nalawa ti kapiniaan iti Thailand. Ngem adda met dagiti rehion a di agmulmula iti pinia. Tapno di agsuek ti presio ti pinia, nagsapul ti Ministry of Trade and Industry ti Thailand iti wagas tapno mailako dagitoy a pinia. Malaksid itoy, inallukoyda pay dagiti tattao a mangan iti pinia aglalo kadagiti lugar nga awan piniada. Ti met PTT, ti kadakkelan a kompania ti lana iti Thailand, linuktanna dagiti amin a gasolinaanna a paglakuan iti pinia. Libre, awan bayad ti puesto dagiti aglako iti pinia.
Kaiimasan a Saba
Kitaenyo man ti retrato dagiti 15 a bukel a saba a nadumaduma ti agpang ti luomda. Nairuar daytoy iti social media ket napagsaludsodan dagiti tattao iti nadumaduma a paset ti lubong no ania kadagitoy ti ipagarupda a kaiimasan. Ania ti resulta ti panagsaludsod? Kaaduan ti nangibaga a kaykayatda ti No. 8 agingga iti No. 10. Bassit ti nangayat iti No. 1 ken No. 11. Ngem kabassitan ti nangayat iti No. 11 agingga iti No. 15. Ngamin, kasla aglatlati ti langada.
No dakami ti pagsaludsodanyo, kaykayatmi ti No. 14 ken No. 15. Iti bukodmi a padas, naim-imas dagiti saba a kasla aglatlati ti ukisda.—O