Conjugal Property Kadi ti Sanikua Dagiti Agkabbalay?

Bannawag - - Siled Ti Kararag - Ni RTC Judge JOVEN F. COSTALES (Ret.)

SALUDSOD:

Iti nasuroken a 30 a tawen a panagdennami iti kabbalayko (ka-live in), adda met napundarmi a sanikua. Saankami a nagkasar ta adda idin inkasarko ngem nakidenna met daytoy iti sabali idi nag- OFWak. Nagabrod met idi ni ka-live-in-ko kalpasan a naumaak ti biag iti abroad. Sinublatko nga inaywanan ti kakaisuna nga anakmi. Ita, ti saludsodko, Apo Hues, dagitoy kadi pundarmi a sanikua ken kabbalayko, maibilang a conjugal property wenno ania? No wen, kasano ti pannakabingayna?—Senior Citizen Ebong ti Laoag City

SUNGBAT:

Maibatay iti Artikulo 88 agingga iti Artikulo 105 ti Kodigo Sibil ti Filipinas, kunana nga amin a mapundar dagiti nagkallaysa, kukuada a dua. Isu daytoy ‘tay makuna a conjugal property. Daga, balay, kuarta a nakadeposito iti banko, pagguduaanda.

Adda met ‘tay kunami a panagsina ti kukua (separation of properties), segun iti kontrata nga aramidenda a notarioan ti abogado a no ania ti mabirokan ti tunggal maysa, bukodna, awan bibiang ti asawana. Ngem no awan ti kasta a naisurat a katulagan, conjugal property amin a mabirokanda.

Ngem no dida nagkasar ket agkabalayda, co-ownership ti naganna (Artikulo 147 ti Kodigo Sibil ti Filipinas), nga amin a mabirokanda, kukuada a dua, malaksid no adda tulagda a notarioan ti abogado a kukua ti tunggal maysa ti mabirokanda. No awan ti kasta a katulagan, agbalin a joint wenno co-ownership ti sanikua (kukuada a dua ti mabirokan ti tunggal maysa). Ania ti nagdumaan ti conjugal property ken co-ownership? Iti conjugal property, no matay ti asino man kadagiti agassawa, mabingay dagiti sanikuada ket ti kagudua, mapan iti sibibiag nga asawa; kukua met dagiti annakda ti kagudua.

Iti co-ownership, no adda matay kadagiti agkabbalay, magudua dagiti sanikuada. ‘Diay bingay ti naasawaan (pagarigan isu ti natay), mapan iti legal nga asawa ken annakna. No met ‘diay awanan iti asawa ti natay, dagiti sanikuana, mapan kadagiti sibibiag a kakabsatna.—O

Newspapers in Tagalog

Newspapers from Philippines

© PressReader. All rights reserved.