Agturong Dagiti Ubbingtayo iti Kinaimbag

Bannawag - - Siled Ti Kararag - Dagiti Tawid a Sirib ken Adal Ni ABERCIO VALDEZ ROTOR, Ph.D.

SARSARANGTEN dagiti annaktayo ti tiempo ti panagwaywayas ken panagtipon ti natural ken artipisial a kinasirib. Dagiti robot, taktakawenda ti karbengan ken wayawaya dagiti tao— baro a kita ti panangilupeklupek.

*Itultuloy latta met dagiti ubbingtayo a sapulen ti mapukpukaw a linas a mamagsisilpo iti siensia, historia, relihion, astronomia, ken dadduma pay ken pakairamanan ti gubuayan ti biag a mismo ken ti pannakaisilpona iti pisikal a lubong.

*Masaksian dagiti ubbingtayo iti tiempoda ti rugi ti post-capitalism (a saanen a panagpuonan ti mangpagandar iti lubong), rebolusion iti nakaparsuaan, pannakapaadu dagiti pasdek a pagpatubuan, ken panagbaliw ti kasasaad ti ekonomia a mangpabor kadagiti teknolohia a pabor iti nakaparsuaan, ken panangtakuat iti law-ang. Mabalin a modelo ditoy ti China, China, Singapore, Malaysia, Germany, ken Vietnam.

*Bayat ti panagtaeng (wenno panaglakay ken panagbaket) dagiti annaktayo, agnaedda iti gimong dagiti nataengan ket masursuroda ti tumaeng a naimbag. Nakaay-ayat a panunoten nga umat-atiddog ti biag ti tao. Ti average nga edad a pagpatingggan ti biag dagiti Hapon ket 78; mapan met a 75 wenno 76 dagiti Amerikano. Agarup kapadpadatayo ti China a mapan a 70.

*Itultuloy dagiti ubbingtayo ti wagas ti panagbiag a, “Marka ti ima, saan a marka ti saka.” Kayatna a sawen nga itultuloyda a taripatuen ti Daga (Earth). Kissayanda ti panagbiag a makadadael iti nakaparsuaan. Agmulada iti ad-adu a kayo, agin-inutda iti elektrisidad ken danum. Kontrolenda ti polusion, dalusanda ti daga, danum ken angin a rinugitan ti henerasiontayo. Agasanda ti Daga a dinadaeltayo.

*Agbiagto dagiti ubbingtayo iti gimong a sigud a nasitaksitak gapu iti maris ti kudil ken puli. Iti agdama, domdominaren dagiti nalitem ti kudilna dagiti isport ken adu metten dagiti lider iti politika ken tignay. Pagarigan da Barack Obama ti US ken Nelson Mandela ti South Africa.

*Maamiris dagiti ubbing a kinabaknanangda met ti trabahoda. Umad-adun dagiti financial analyst, computer programmer, fitness trainer, biophysicist, translator, manicurist, marriage counselor, radiologist, ken daddduma pay. No adda kayatmo a gatangen a dimo makita iti mall, kitaem ken agorderka babaen ti internet. Dagiti babassit a negosiante, inakemdan dagiti sigud nga ar-aramiden dagiti dadakkel a negosiante.

*Mabalin ketdi nga ad-adda a didigra ngem ti pagimbagan ti ipaay ti postmodernismo kadagiti ubbingtayo iti napartak a teknolohia ken kultura. Saanda a mabaelan ti makigiddan iti addang ken direksion ti panagbalbaliw.

Ngem adda met mangipetpetteng a saan a pudno daytoy. Adda nagkuna a, “Siak ti master ti naikudi kaniak a gasat, siak ti kapitan ti kararuak.“

Ket daytoy ti kayat dagiti ubbingtayo a pagbalinan. Ngem maaramidda laeng daytoy no dida tallikudan ti nakaparsuaan.—O

Newspapers in Tagalog

Newspapers from Philippines

© PressReader. All rights reserved.