Nasadut nga Aso?

Bannawag - - Ti Taraken Ken Sika - Ni FRANCISCO S. ANTONIO

ADDA dagitay aso a kagurada ti agwatwat wenno masadutda a makiay-ayam. Kaykayatda ti agtalinaed lattan iti maysa a suli. No saan, iti laeng asideg nga aglawlaw ti pappapananda a naginad pay ti panaggarawgarawda.

Kinapudnona, saan a nasadut dagiti aso. Naalibtak dagitoy nga ayup. Adda kadagiti amoda no apay a nasadut ken kasla awan interesda nga aggarawgaraw.

Mabalin a saan nga al-allukoyen ti akintaraken dagiti aso tapno aglinglingay ken agwatwatda.

Ngem no agduadua no apay a kastoy ti aso, padasen nga amirisen no adda sakitna. No ngamin adda an-annayen ti aso, saan nga aggarawgaraw ken kasla awan a pulos ti interesna nga agpagnapagna.

Nasken ngarud nga ikonsultar iti beterinario no kastoy a kasla aglaladut ti taraken nga aso. Malaksid iti arthritis, anemia wenno pannakaburibor, mabalin nga adda pay sabali nga an-annayen ti aso.

Pagwatwaten wenno linglingayen ti aso depende iti edadna, kinadagsen wenno kadakkel, ken kasasaad ti salun-atna.

Nasarsaranta met laeng dagiti naubing pay nga aso nga agtaraytaray wenno makiangaw. Nagingginad ti tigtignay dagiti nataengan nga ayup. In-inuten nga allukoyen nga agwatwat ti aso depende iti reaksion ken interesna. Masapul met ti adu nga anus iti panangwatwat iti taraken nga aso. Mabalin nga allukoyen nga aglangoy, maipasiar iti kaarrubba wenno itugot kadagiti parke a paglinglingayan dagiti dadduma nga aso.

Saan a rason ti kinalakay wenno kinabaket ti maysa nga aso nga isardeng a watwaten. Pagdudumaen dagiti wagas a pangwatwat iti aso depende iti interes ken kabaelanna.

Saan met a piliten nga ipasiar ti aso no dina kayat. No saan a kayat ti aso ti agpasiar iti kagudua ti oras, ipasiar laeng iti lima a minuto agingga iti kayatna ti nabaybayag a pannakaipasiarna.

Saan guyoden lattan ti masadut a magna nga aso. Ikkan ketdi ti gunggonana a paboritona a taraon tapno maallukoy a magna.

Iturong pay ti imatang ti aso tapno malinglingay imbes a ti amona ti malinglingay kadagiti malabsanna.

Adda pay dagiti aso nga awan a pulos ti interesda a makiay-ayam wenno kadagiti maidiaya nga abalbalay.

Iti laksid ti kinasalun-at ti aso sa awan ti interesna a makiay-ayam, mabalin nga adda amak wenno adda saanna a kayat iti pannakiay-ayam wenno annakaipasiarna.

Mabalin a mabuteng nga agpagnapagna iti kalsada wenno saanna kayat ti natagari a lugar. Mabalin pay a mabuteng kadagiti sabsabali nga aso wenno kadagiti dadduma a bambanag a saanna a magustuan kabayatan ti panangay-ayam wenno pannakaipasiarna.

No kastoy ti mapaliiw iti taraken nga aso, in-inuten nga iruam kadagiti saanna a pagaayat a bambanag. Adu dagiti maisingasing ti maysa a beterinario tapno maatur daytoy a galad ti aso. Madlaw pay a saan nga aktibo dagiti kankanayon a maipupok nga aso. No nairuam nga agtaltalinaed ti aso iti uneg ti balay, padasen a paggarawgarawen babaen ti panangilemmeng iti pagaayatna a taraon sa bay-an a saepen ken birokbirokenna.

Adda pay dagiti aso a naragsakda laeng no adda makitada a sabali nga aso. Agayayamda wenno makiwinnatwatda laeng no adda sabali nga aso a makitada. Mapaliiw daytoy kadagiti pagtaengan a maymaysa ti tarakenda nga aso. No kastoy ti galad ti aso, mabalin nga mapan ibati iti kaarruba nga adda asona wenno yiskediul ti ipapan iti parke a pakasarakanna kadagiti sabsabali nga aso.—O

Newspapers in Tagalog

Newspapers from Philippines

© PressReader. All rights reserved.