Ti Punay iti Sanga ti Baliti

Bannawag - - Itoy A Bilang - Ronnie E. Aguinaldo

Alimbasagen ti pul-oy a mangap-apros Kadagiti mail-iliwan a bulong ti sua, sidras, ballatinok, kupitan A nayon ti naipaburek a pinagbuggo dagiti nakipagdulin Iti bagi ti daga nga impusing ti pudot ken angin A dangdanggayan ti lua dagiti nakagangat nga esperma A nangibati’t angot a mangipalagip iti aldaw dagiti natay. Agdungdung-aw ti naulila a punay iti sanga ti baliti A nakatakder iti suli a mangal-alimon iti init, Kumitkita kadagiti padeppa dagiti naisubli iti tapok Tunggal madanon ti aldaw dagiti pimmanawen, madatonan Apagukrad a sabong dagiti nais-isu a masetas, Paggugusto ti daga idi di pay impusing ti pudot ken angin Nagduduma a taraon, mainum, aruaten... Ngem ti leddaang nga idungdung-aw ti punay iti sanga ti baliti Mawaswas ti umsi iti matangtangad a turay dagiti bambanti. Maslep dagiti bulong ti sua, kupitan, ballatinok ken sidras Iti leddaang nga idungdung-aw ti punay iti sanga ti baliti Idinto nga ikaykayab ti pul-oy ti aldaw dagiti natay Ti makapaseggar nga angot ti inyulat’ apuy a lua ti esperma. --RONNIE E. AGUINALDO

Newspapers in Tagalog

Newspapers from Philippines

© PressReader. All rights reserved.