22 Okeyka, Apong

Bannawag - - Itoy A Bilang -

Nagin-inayadda a pimmideg iti diding iti banio. Nabatbataden dagiti sao ken katkatawa. Simmirip ni Anwar. Adda tallo iti uneg. Dua a babbai ken maysa a lalaki. Iti panagkitana, dianitor dagitoy. Immanges iti nauneg. Ania ti aramidenna kadagitoy? Papatayenda kadi met ida?

TOKTOKEN koman ni John ti ridaw ti kuarto ni Gloria ngem nagbabawi ta mariknana a kasla adda mangsisiim kenkuana. Awan matatao ngem iti kaadun a nakaipasungalngalanna a peggad, napatademnan ti panagriknana ket manmano nga agbiddut.

Kinellaatna ti nangtaliaw iti pasilio. Naparaipusanna ti likudan ti maysa a lalaki. Nagtaray a nagturong iti pasilio a naglikuan daytoy. Maysa a lalaki a nakaiggem iti adu a tualia ti nakitana.

Napaanges iti nalukay ni John. Nagsubli met laeng iti ridaw. Nagtoktok. Nadagdagus a nailukat ti ridaw a kasla agur-uray ti tao nga adda iti ridaw. Naibaskag ni Gloria a nakaparpardas a nangguyod kenkuana iti uneg sa dinagdagus daytoy nga inrikep ti ridaw. Nadlawna a naka-negligee ni Gloria. “Agyamanak ta immayka,” kinuna ni Gloria. “Kunam a napapateg unay ti ibagam isu nga immayak.” “Drinks?” sinaludsod ni Gloria. “San Miguel light.” Agturong koman ni Gloria iti bassit a refrigerator ngem iniggaman ni John ti ima daytoy. “Siakon ti mangala,” kinunana. Nagturong iti bassit a refrigerator sa nangala iti serbesa. “Sika?” sinaludsodna. “Kasta met...” Rinapit ni John a tinengnged ti dua a botelia ti San Miguel Light. Linukatanna dagitoy sa inyawatna ti maysa ken ni Gloria.

Inawat ni Gloria ti botelia sa miningminganna ni John iti napaut.

“Something wrong with me?” alusiisen ni John iti panangmatmat ti babai kenkuana.

“No... not you... there’s something wrong with me. “Nagsao met... ita pay ta senadorkanton?” Napaisem ni Gloria. Ngem iti kaungganna, nakunana: “It’s even better than what you think, John...” ngem dina naitured nga insawang dayta.

“Ket, ania ti nakapatpateg nga ibagam kaniak?” inderetson a sinaludsod ni John.

Ngem sakbay a nakasungbat ni Gloria, nakangngeg ni John iti karasakas iti ridaw. Dina ammo ngem nagtibbayo. Inasutna ti paltogna.

Nakuy-os pay ti rusok ni Gloria. “Adda manen problema?” sinaludsodna.

“Ditoyka laeng... dika agkutkuti,” kinuna ni John idinto a nagturong iti ridaw. Saanen a simmirip ti peephole. Kellaat ketdi nga inlukatna ti ridaw sa impaturongna ti paltogna. Nakadakdakkel ti mulagat ti naklaat a lalaki nga adda dita. (Maituloyto)

Newspapers in Tagalog

Newspapers from Philippines

© PressReader. All rights reserved.