40 Padasem Daytoy, Kailian

Ubing pay idi damo a makita ti autor. Ita, mabigbigen iti tay-ak ti agribusiness.

Bannawag - - Itoy A Bilang - Ni ZAC B. SARIAN

MAKAPARAGSAK nga agpayso ti idadar-ay kadagiti trade show, kas iti Agrilink iti World Trade Center a naangay iti Siudad ti Pasay itay nabiit. Sadiay idi a naam-ammomi ti maysa nga ubing a lalaki nga agnagan iti Carlos. Anak ti nasinged a gayyemmi a ni Dr. Vic Saplala, a pimmusayen.

Mabigbig idi ni Dr. Saplala nga orchid breeder ken aktibo iti tay-ak ti komersial a hortikultura. Ket itay napalabas nga Agrilink, nagkitakami manen ken Carlos. Dakkelen ken nagturposen iti kolehio— iti Agribusiness iti UP Los Baños. Adda payen bukodna a kompania— ti SeedWorks Philippines, maysa a kompania nga agiwarwaras kadagiti kabaruan a bin-i dagiti nadumaduma a mula a pakairamanan ti pagay, mais, ken nadumaduma a nateng.

Kinapudnona, ti SeedWorks ti nangidateng iti Filipinas iti maysa a napintas a barayti ti tarong— ti Prolifica— nga immuna a nakitami a naimula iti maysa a sibubukel a barangay iti Gerona, Tarlac idi 2014. Espesial a barayti daytoy isu nga agingga ita, kaay-ayo pay laeng dagiti mannalon nga imulmula. Nalaing ngamin nga agbunga, nakired iti peste ken sakit, ken naimas (nangato ti eating quality-na). Nalaka a maibus dagiti bin-i ti Prolifica; ngamin, no naisangpeten iti Filipinas, dagus nga isu met ti gatangen dagiti mannalon a nakapadasen iti daytoy. Ngem itay Oktubre 4 a panagkitami ken Carlos, kinunana nga adda pay nabati a bin-i daytoy iti SeedWorks.

Ita met, ipampannakkel ni Carlos ti dua a baraytida ti haybrid a pagay— ti US-88 ken TH-82. Kas kunana, dakkel ti maapit iti US-88 manipud iti US Agriseeds. Atitiddog dagiti tinukelna ken nalukneng ti innapuyna. Isu a napintas a makiskis a kas brown rice.

Adda pay ketdi natudinganen nga “ambassador ti US-88”— ni celebrity chef Boy Logro a nag-demo iti Agrilink iti panagluto iti masida a maipareha iti brown rice. Nag-demo pay iti fruit carving. Impakitana ni kasano ti agaramid iti sinansabong babaen ti panangkitikitna iti bunga ti sandia.

Iti sabali a bangir, napintas met ti TH-82 ta nakired iti sakit a Bacterial Leaf Blight (BLB) ken uray iti tikag ken layus. Saan met a basta idapnas ti napigsa nga angin. Isu a napintas nga imula iti man kalgaw wenno iti panawen ti tudtudo.

Kabayatanna, kas nakunamin, adu met dagiti nateng nga iwarwaras ti SeedWorks a kas iti pipino a mabalin nga imula kadagiti man nangato ken nababa a lugar. Addaanda met iti karabasa, sili, kamatis, kdp.

Maragsakankami iti balligi a naragpat ni Carlos. Kayatna a sawen nga adda namnama ti pagilian nga ad-adda pay dumur-as babaen ti baro a henerasion.—O

Ni Carlos Saplala iti exhibit booth ti Seedworks iti Agrilink.

Ti US-88. Atitiddog ti dawana.

Ti brown rice a US-88. Brown rice, gapu ta saan unay a nabayo wenno nakiskis.

Ti bunga ti Prolifica. Baba: Ti hybrid rice a TH-82.

Naipakita iti booth ti Seedworks ti bunga dagiti nateng manipud kadagiti ipampannakkelda a bin-i.

Newspapers in Tagalog

Newspapers from Philippines

© PressReader. All rights reserved.