32 Idi Un-unana a Panawen

Bannawag - - Itoy A Bilang - Ni SOLOMON V. GERNACIO

IDI un-unana a panawen, a pannakigubat ti maysa a tribu iti kalabanna a tribu, nasarakan laengen dagiti mannakigubat daytoy a tribu ti bagbagida iti langalang nga awanen ti makanda. Agingga iti nakasarak ti maysa kadagiti mannakigubat iti maysa a mannalon ket kinuna ti mannakigubat: “Apo, awan kanenmin, ket pangngaasim kadi, aya, ta ibingayannakami koma iti apitmo.”

Kinuna ti mannalon, “Wen, apo, sumurotkayo kaniak. Adu ti mulak a tugi ket mabalinyo ti agkali tapno dagiti bagasna, mabalinyo a tunuen.”

Anian a ragsak ti mannakigubat. Imbagana daytoy iti panguloda, ket kinuna met ti pangulo: “Intayo ngaruden!”

Kimmuyog ngarud dagiti mannakigubat iti mannalon. Agingga nga adda nasungadanda a bangkag a namulaan iti tugi nga iti langana, mabalinen nga apiten. “Dagitoyen a tugi ti kalienmi!” kinuna ti pangulo dagiti mannakigubat. “Saan, apo,” kinuna met ti mannalon. “Surotendak, adda pay katugian idiay.” Intudona ti pangadaywen pay.

Masmasdaaw man ti pangulo dagiti mannakigubat, imbilinna a surotenda latta ti mannalon. Adayo bassit ti pinagnada. Agingga iti nadanonda ti katugian nga intudo ti mannalon. “Dagitoy ti kalienyo, apo,” kinuna ni mannalon. “Adda nalabsantayo a katugian itay. Apay a saan pay la a daydiay ti kinalimi? Nagrigrigattayo pay la nagnagna a nakairamramanam!” kinuna ti pangulo dagiti mannakigubat a nakakita met iti bannog ti mannalon a nagnagna.

Insungbat met ti mannalon: “Gapu ta daytoy dagiti mulak a tugi, apo. Daydiay nalabsantayo, saanko a kukua.”—O

Newspapers in Tagalog

Newspapers from Philippines

© PressReader. All rights reserved.