Kinabil ni Elmo ni Janella?
INAKO ni Janella Salvador a kinabil ni Elmo Magalona iti naminsan a nabartek ti naud-udi.
Dimmawat kano metten iti pammakawan ni Elmo ken kuna daytoy a dina malagip ti inaramidna, isu nga inikkan ni Janella iti maikadua a gundaway.
Ania daytoy a maikadua a gundaway?
Mabalin a ‘sinsinan’ ta adda serye ti pabuya dagitoy iti Nobiembre idiay abrod a kaduada da Kathryn Bernardo ken Daniel Padilla.
* * * Nadakamatmi a ‘sinsinan’ laeng ta kinapudnona, adu ti mangibalbalakad iti balasang a liklikanna ti tao nga agkabil.
Apagisu met ken ni Janella ta iti sumaruno a proyektona a pelikula, saannan a kadua ni Elmo.
* * * Kablaawantayo ti pelikula a “Signal Rock” ni Direk Chito Rono ta karaman daytoy kadagiti nominado iti Best Foreign Language Film 2019 ti Oscars.
Wen, ‘bagis, Oscars!
* * * Mangabak man wenno maabak, naragsaken dagiti adda iti likudan ti “Signal Rock” nangruna ken ni Christian Babels a kangrunaan a bida.
Ad-adda met a maragsakan ni Direk Chito ta daytoy ti kaunaan nga adda Filipino a pelikula a mainominado iti Oscars. Kunada ngarud dagiti gagayyemtayo a Tagalog: Bongga!
* * * Agkandidato gayam a diputado ni Edu Manzano iti San Juan City.
Adu ti naklaat, ‘bagis, ta nagkandidato idi ni Edu a bise mayor iti Makati City idi 1998 (malaksid a Bise-Presidente idi 2010). Ita, adda gayamen iti San Juan City ni Edu. Kalabanna ni Guia Gomez a sigud a mayor ti nasao a siudad.
* * * Para internasional kano ti baro nga album ni Lani Misalucha, ‘bagis. Apay a para internasional? Nalabit puro Ingles dagiti kantana. Joke. Pudno met a para internasional ti timek ni Lani Misalucha. Ala, gudlak iti international career-mo, Lani!—O (Chairman ni Kabagis Eloy iti Hunta Direktiba ti FAMAS ken host-producer ti Celebrity Hour media forum.—AST)