No Adda Sigsigloten, Adda Met Warwaren

Bannawag - - Itoy A Bilang - Ni ANNA LIZA MADAYAG GASPAR, CPA

DAYTA man ti sungbat ‘tay maysa nga am-ammok idi napagsaritaanmi ti seguro (insurance). Kalkalpasko a nagbayad iti premium ‘diay insurance-na, kuna met ti maysa a gayyemko idi napankami nakimansayag nga agkaka-batch idi natay ni tatangna.

Ngem agpayso kadi daytoy insurance? Nasken kadi a mamatika iti daytoy? Saan met la a balbalatong, a kas kunada?

Para kaniak, maysa koma ti insurance kadagiti kangrunaan a kasapulan ti tao (basic necessities) a kas iti makan, bado, ken balay (shelter). No nasken ti makan, bado ken balay tapno agbiagtayo (ala, iramantayo man daytoy edukasion tapno mabalintayo ti agbiag a kas produktibo nga umili), daytoy met insurance, kasapulan tapno dagiti mabati, agbiagda a natalinaay.

Ditoy ilimi a Piddig (Ilocos Norte), adda maidiaydiaya nga insurance a para kadagiti mula a kas koma iti pagay. Masansan ngamin a basnoten ti bagyo ti ilimi no kasta a dandanin panagaani. No adda insurance ni mannalon ket mabagyo dagiti pagayna, adda maawatna manipud iti insurance company a kas sukat ti gatad ti maapitna koma no saan a nabagyo.

No ni mannalon, isegurona ti apitna, daytoyto la ketdin bagitayo a kangrunaan a gamengtayo ti saan? Kas kanayon nga ibagbagak, kaykayatko ti matay nga adda maibatik a kinabaknang kadagiti ay-ayatek iti biag. Isu a saan a balbalatong ti seguro no di ketdi maysa kadagiti kangrunaan a kasapulan iti biag. Masapul a siglotantayo ti seguro, tapno no dumteng ti patay, addanto warwaren dagiti ay-ayatentayo iti biag.

Mano Ngarud?

Mano ngarud ti alaem a seguro. Depende iti kasasaadtayo iti biag. No siak, dagiti sumaganad ti inaramatko iti panangkuentak no mano ti kasapulak nga insurance. 1. Tawen ni Juan Silver nga anakko. 2. Binulan a pagbiag ni Juan Silver. 3. Gatad ti sigsiglotak wenno investment ken savings-ko. Yad-adayo ni Apo, ngem no kas pagarigan matayak ita, masapul ngarud nga adda mabati nga umanay a pagbiag ni Uno agingga a dumteng iti umno a tawen (edad a 21 ta addanto metten pagsapulanna) ken pagbasananto iti kolehio.

Iti kuentak, no mangalaak iti seguro ken kayatko nga adda mabati a kuarta nga umanay a pagbasa ken pagbiagto ni Uno, masapul a P1,276,000 ti balorna wenno ‘tay makunkuna a face value-na.

Adda maysa nga insurance policy-k ngem saan nga umanay daytoy. Isu a yururnongak ita ti alaek a maikadua a policy tapno mayanay a P1,276,000 amin dagiti insurance policy-k.

Ala, no kayatmo, kaka, a saan a marigatan dagiti ay-ayatem iti biag no awankanton iti dennada, mamatika man wenno saan iti insurance, masapul ngarud a maysa daytoy kadagiti sigsiglotam.

No adda kayatyo a damagen wenno adda komentoyo, ag-PM-kayo ken ni Anna Liza iti www.facebook.com/annalizamgaspar.—Editor

Newspapers in Tagalog

Newspapers from Philippines

© PressReader. All rights reserved.