Dear Doc

Bannawag - - Itoy A Bilang - (Adda tuloyna) Da DR. GENERALDO D. MAYLEM ken DRA. LORNALYN C. COLOMA-MAYLEM

TULOY ti sungbat iti surat ni Mr. Heartbeat, 48 anios, naasawaan ken executive secretary iti maysa a kompania. Kunana a naunget ti boss-na. Ita, problemana ti kinanerbiosona ket nadakamatna a liman a tawen nga adda sakitna a hypertension. Adda tiempo a saan a makaturturog iti rabii. Agtomtomar iti Amlodipine 10 mg iti inaldaw. Damdamagenna no ania ti gapu ti kinanerbiosona. Dadduma pay a makaigapu iti palpitasion: • Sobra nga impauneg a makan, wenno naadat a taraon. • Medisina. Adda dagiti maireseta ken awanan resetana nga agas ti makaigapu iti palpitasion a kas side effect, kas iti: (1) Antibiotiko, (2) Medisina a kontra fungus, (3) Agas a pangontra iti psychotic, (4) Asthma inhalers, (5) Agas iti uyek ken panateng, (6) Pildoras a pagdieta, (7) Agas para iti nangato a presion ti dara, (8) Pildoras a para iti thyroid, (9) Suplemento a pagpakuttong.

• Dehaydrasion. Gapu iti kondision a kas iti adda bayagna a panagsarua wenno panagtakki a makaigapu iti kinaabnormal dagiti lebel ti electrolyte a kas iti potassium, magnesium, ken calcium iti dara. Apektaran dagitoy ti puso nga agresulta iti palpitasion.

• Pheochromocytoma ket tumor iti glandula nga adrenal, nga agimulsit iti adrenaline. Ti sobra nga adrenaline iti dara, papartakenna ti bitek ti puso nga agresulta iti arrhythmia.

• Ti sobra a level ti thyroid hormone, papartakenna ti bitek ti puso nga agresulta iti palpitasion.

• Ti maiparit a droga a kas iti amphetamines, cocaine, ken ecstasy ket delikado iti puso. Ti cocaine, pangatuenna ti presion ti dara, papartakenna ti bitek ti puso, ken dadaelenna ti masel ti puso. Ti amphetamine, tignayenna ti sistema ti nerbios (nervous system) a mangpapartak iti bitek ti puso.

• Alkohol (arak). No mayadum ti uminum, papartakenna ti bitek ti pusom.

• Caffeine. Ti caffeine ket stimulant a mangpapartak iti bitek ti puso, a maala iti kape, soda (kas iti Coke), energy drink, tsa, ken tsokolate.

• Nikotina, agraman ti manipud iti vape ken awanan asuk a sigarilio. Ipangato ti nikotina ti presion ti dara ken papartakenna ti bitek ti puso.

• Gurigor. No adda gurigor, agusar ti bagi iti enerhia a naparpartak ngem iti kadawyan. Pakaigapuan daytoy ti palpitasion.

• Panagbaliw ti hormone bayat ti panag-menopause wenno panagsikog. Madlaw dagiti babbai a naparpartak ti bitek ti pusoda no agreglada, masikogda, asidegdan nga ag-menopause, wenno ag-menopause-dan.

• Sikolohikal a makagapu. Ti panagdadanag ken panic disorder, mangitunda iti palpitasion. Ti panic disorder ket ababa a tiempo ti sobra a panag-panic wenno panagbubuteng nga agpaut iti sumagmamano a segundo wenno minuto a buyogan ti palpitasion, panangkamat iti anges, ken panagulaw. Ti palpitasion iti kastoy a kasasaad ket resulta ti nayon a pannakaiparuar ti adrenaline iti bagi.

Newspapers in Tagalog

Newspapers from Philippines

© PressReader. All rights reserved.