Padasem Daytoy, Kailian

Umad-adu dagiti nauubbing a kakailiantayo a makataktakuat nga adda napintas a masakbayan nga agur-uray kadakuada iti tay-ak ti agrikultura.

Bannawag - - Itoy A Bilang -

KADAGITI panagtitipon a kas iti Agribiz Kapihan ken Agrilink Trade Show, nakaad-adu dagiti maam-ammomi a makapainspirar a kakailiantayo nga adda met iti tay-ak ti agrikultura.

Kas iti tallo nga agkakabsat a tagaBacolor, Pampanga. Agtawenda laeng iti apagsurok a 30 ngem dakkelen ti proyektoda.

Agtartaraken dagitoy nga agkakabsat (da Raymond, Robert ken Brian Chua) iti 80,000 a pugo breeders wenno dagitay agit-itlog a pugo a dagiti itlogda, papespessaanda.

Ammoyo kadi no mapapespessaanda a pugo iti inaldaw?

Mapan a 20,000. Agarup 10,000 kadagitoy ti babbai nga ilaklakoda iti P7 ti maysa a kas day-old chick. Ti sabali a 10,000 a puro lallaki, maibelleng laengen wenno mapan dawdawaten dagiti tattao tapno ipakanda kadagiti tarakenda a dingo a kas iti baboy.

Naam-ammomi dagitoy agkakabsat iti Agribiz Kapihan idi laeng Oktubre 13 iti Harbest Events Center iti Taytay, Rizal.

Sinaludsodmi: no adda agorder kadakayo ita (Oktubre) kadagiti piek ti pugo, kaano a maideliberyo? Kunada nga inton Disiembre. Kunada nga adu ngamin dagiti agtartaraken iti pugo iti Nueva Ecija, Tarlac

ken Pampanga a laklakuanda isu a masapul a maisapsapa ti panagorder.

Ket saan laeng a dagiti piek ti panguartaanda. Isuda metten ti aglako iti feeds, ken inaldaw met a makalakoda iti 500,000 nga itlog iti inaldaw.

Dakkel a kuarta, ania?

Agassawa a Taga-Zambales

Naam-ammomi met da agassawa a Gilbert ken Rachel Bugia iti Agrilink Trade Show idi Oktubre 4, 2018. Kukuada ti NV Farm iti Palauig, Zambales. Dati nga OFW si Gilbert; dati met nga empleado ti maysa a broadcasting company iti Quezon City ni Rachel.

Idi 2015, napanunotda nga aglusulosdan iti trabahoda tapno mapasayaatda ti agwalo nga ektaria a dagada iti Palauig. Ket ania dagiti tartaraknenda iti farm-da? Addaanda ita iti 500 a baka ken 2,000 a kalding. Maibilang a subfarm ti farm-da ta adda dakkel a kompania nga agpatpataraken kadakuada kadagiti baka ken kalding, ti DV Boer International. Addaan daytoy iti 85 a subfarm iti nadumaduma a paset ti pagilian.

Kaaduanna kadagiti tartaraknen da Gilbert ti pangganakan. Dagiti dadduma, palpalukmegenda para iti karneda. Naglasatda iti panagsanay tapno ammoda ti ar-aramidenda. Ti pamastrekanda? Makibingayda iti annak dagiti tarakenda.

Nalulukmeg ken nasasalun-at dagiti tarakenda a kaaduanna kadagitoy ti pakpakanenda iti corn silage. Ammoda metten ti agaramid iti corn silage. Agpampamulada kadagiti mannalon iti mais nga aramidenda a corn silage.

Pakpakanenda dagiti kaldingda iti corn silage mamitlo iti agmalem malaksid iti ruot a gapgapasenda.

Ammoyo no mano a silage ti maipakpakanda iti uneg ti makabulan? Mapan a 200 a tonelada.—O

Maysa a buya iti pagtaraknan iti pugo dagiti agkakabsat a Chua iti Bacolor, Pampanga.

Dagiti kalding iti NV Farm bayat ti pannakapakpakanda iti corn silage.

Ni Rachel Bugia ken ti maysa nga alpaca a tarakenda.

Padasem Daytoy, Kailian Ni ZAC B. SARIAN

Dagiti baka iti NV Farm a kukua da Gilbert ken Rachel Bugia.

Da agkakabsat a Robert, Raymond (nakatugaw, agpakanawan), ken Brian Chua (nakatakder).

Da agassawa a Gilbert ken Rachel Bugia iti Agrilink trade show.

Newspapers in Tagalog

Newspapers from Philippines

© PressReader. All rights reserved.