Kudeta (34)

Saan a nakauni ni John iti nangngegna a kidkiddawen ni Gloria. Kasanon ti pananglappedda kadagiti mayat a mangisikat iti Presidente?

Bannawag - - Itoy A Bilang - Norberto D. Bumanglag, Jr.

Ti Napalabas: Kinidnapda ni Gloria ket dawdawatanda ni John iti sangapulo a milion a pisos a ransom. Impakammo ni John daytoy ken ni Mr. Bosworth. Kabayatanna, napatayen da Edgar ni Eddie Quirino ken dimmanonen daytoy iti Presidente ket kayat ni Pat nga ibabawi ti Presidente ti ipapanna iti Ilokos. Napan sinabat ni John ni Ricky Ramirez iti LIA. Sinurot ida ni Craig Stewart, maysa kadagiti kameng ti CIA nga agpangpanggep a mangpatay iti Presidente. Nangiruar ni John iti pangsakana ken ni Gloria ngem sakbayna, tinulonganna da Daniel ken Jerky a rinaut da Edgar. Nagkukuyogdan a napan nangipan iti kuarta. Sinurot da Ricky ti nangala iti kuarta agingga iti maysa a warehouse. Addadan ken Gloria iti hotel idi awagan ni Pat Coloma ni Gloria ta kayat ti Presidente nga agkitada. Inawagan met ni John ni Mr. Wong, ti cotractor iti armas ti CIA. Iti rabii, rinautda ti warehouse ngem awanen tao. Pumanawda koman idi kellaat a malayusda iti lawag. Da gayam Agent Stewart. Imballaag ti ambassador a saanda a makibiang iti planoda iti Presidente ta no saan, mapilitanda a mangipakni kadakuada. Iti rabii, nagkutin da Anwar. Rinugianda a pinatay dagiti guardia iti kapitolio ket simrekda iti pasdek. Adda metten sa John ken Gloria iti hotel idi adda agtoktok iti ridaw.

K(Maika-34 a Paset) EMKEMKEMEN ni Anwar dagiti sangina, nagsanggir iti diding a kumamang iti restroom. Tinarimaanna ti panangiggemna iti nakatangad a paltogna a nakaptan iti silencer. Agparparisipis latta ti danum iti uneg ti banio. Kumaradakad ti panagsukat dagiti dianitor kadagiti tissue paper ken mangngeg ti uni dagiti sellepen ken bugguanda a mop. Ania ti aramidenna kadagitoy? Saanda a kabusor dagitoy! Ngem pagpeggadanda met. Ken no dida pagulimeken ida, mabalin a maikompromiso ti misionda. Masapul nga agballigida.

Ammona a pannakisugal ti pannakikappeng ti Abu Sayyaf iti daytoy a kudeta. Agduadua no matungpalto ni Dir. Gen. Miguel ti karina a maikkanda iti autonomous government iti isla ti Jolo. Ti pannakairaman ti CIA ti ad-adda a namagbalin iti daytoy a komplikado. Inyetnag a mismo ti Amerika a maibilangda, isuda nga Abu Sayyaf, a terorista. Ngem saan met a ti Amerika ti mangeddeng iti dawdawatenda a wayawaya. Isu a nasken nga aramidenda latta ti naited nga akemda. Nasken a mulaanda iti adu a bomba ti conference room a pagsaritaan ti Presidente. Ngem ania ti aramidenna kadagitoy a dianitor? Agpampanunot pay laeng iti aramidenna idi kellaat nga agparang ti maysa a lalaki a nakaiggem iti trash bag. No kasano ti pannakakigtotna, ad-adda pay ti lalaki aglalo idi agsabat dagiti matada ken nakita daytoy ti paltogna. Nagtaray daytoy a nagsubli iti banio. Awanen ti pagpilian ni Anwar. Impaturongna ti paltogna iti lalaki. Kinalbitna ti gatilio. Nadaleb ti lalaki iti uneg ti CR. Nagiikkis dagiti adda iti uneg ti banio.

Insenias ni Anwar ti iserserrek dagiti dua a kaduana iti CR. “Patayenyo ti asino man a nabati a sibibiag,” imbilinna.

Nabati ni Anwar a nakasanggir pay laeng iti diding. Nagkidem ta pimmigsan ti ikkis dagiti adda iti uneg. Sinaruno ti karibuso, sa asug. Sa nagsardeng dagiti ikkis. Kellaat nga immulimek ti aglawlaw.

Simrek ni Anwar iti banio. Nakitana ti tallo katao, dua a babbai ken maysa a lalaki, a naudatal iti suelo. Nadigosdan iti bukodda a dara.

Nagluloken dagiti tumengna a nakakita kadagiti bangkay. Ita laeng a makarikna iti kastoy. “Agdaluskayo,” imbilinna kadagiti taona. Nagkuti a dagus dagiti nabilin. Rimmuar iti CR ni Anwar nga iggemna latta ti paltogna. Ngem napasanud idi makasabat iti dua a polis. Nakigtot. Nakigtot met dagiti polis. “Apay a nakaasutka?” insita ti maysa kadagiti polis. “Boss! Sibibiag pay laeng ti maysa!” kellaat nga impukkaw ti maysa a taona iti uneg ti CR.

Nagkinnita dagiti dua a polis. Nakaparpardasda a nangasut kadagiti paltogda. Ngem linaklaka ni Anwar a pinaltogan ida. Naarinuknok dagiti polis. Saan pay a napnek ni Anwar. Inasitganna dagiti dua sa pinaltoganna dagitoy tapno masiguradona a nataydan.

Nagsubli ni Anwar iti uneg ti CR. Agsusuron nga immasideg iti taona a nangipukkaw nga adda pay laeng sibibiag a dianitor. Babai ti sibibiag. Nakaudatalen ngem agkiremkirem pay laeng. Impaturong ni Anwar ti paltogna iti daytoy sa kinalbitna. Iti pigsa ti paltog, kasla bimtak ti ulo ti babai.

Iti suron ni Anwar iti taona, pinaturonganna daytoy. Kinalbitna ti gatilio ngem naglitek laeng. Inulitna, naglitek latta. Pinagsasaruno a kinalbit, ngem kaskasdi a asaan a limmitog. Awanen ti balana.

Tininnag ni Anwar ti magasin ti paltogna sa sinukatanna. Inkasana ti paltog sa impaturongna manen iti taona. “Inton maminsan, saanka a makaringgor, maawatam?” Agtigtigerger ti taona a nagtungtung-ed. “W-wen, boss...” Makalulua payen daytoy iti panagpakaasina.

Napakidem ni Anwar. Dina ammo ngem adda naalut-ot nga asi iti kaungganna. Imbabana ti paltogna sa timmallikud nga awan tagtagarina. Ngem kinarurodna ti bagina iti dayta nga inaramidna. Saan a kasta ti kinarasi ti pusona. Nabibinegen iti adu a pammapatay nga insayangkatna. Inkakaubinganna dayta nga aramid. Awanan iti puso. Awanan asi. Bassit laeng a biddut, pumatay. No makaritda, aglalo no saan a mangipangpangag dagiti partido dagiti pasakada, saan nga agaripapa a mangpugot iti ulo dagiti hostage-da. Isu a pagbutbutnganda ida.

Ngem no kasapulanda a bigbigento idan ti sabali a lubong iti pannakaipaay ti autonomous government a kidkiddawenda, nasken nga agbalbaliwda.

Pagammuan ta naguni ti radiona. “Delta One to Alpha, all guards have been eliminated... We have secured the outside perimeter and inside the building...”

“Good job, people,” kinunana. “Masapul nga agdaluskayon. Ilemmengyo a nasayaat dagiti bangkay.” “Copy, Alpha...” Immisem ni Anwar. Naisawangna: “Allahu Akbar!” “Allahu Akbar!” dandani naggigiddan dagiti taona a simmungbat.

“INSPECTOR!” nayesngaw ni John. Nakigtot a nakalasin iti pinaturonganna iti paltog. Ni Senior Inspector Salvador ti Criminal Investigation Division ti Ilokos. “Agtoktokak koma ngem naunaannak,” kinuna ti imbestigador. Awan iisemanna.

“Ania ti maipaayko kenka, inspector?” sinaludsod ni John. Insalikadna ti paltogna. “Nakitaka itay sumrekka ditoy isu a sinurotka.” “Still investigating the kidnapping of Miss Gloria Sarandi... and I’m still a suspect, is that right?”

“Saan a kasta... Immayak ta kayatko ti dumawat iti dispensar. Nalabes ti panagatapko kenka idi.”

“Agyamanak, inspector. Magustuanka. Manmano ti pannakabagi ti linteg a mangaklon a nagbiddut.”

“An honest mistake, Mr. Villa. Ken maysa pay, kayatko a makasarita ni Miss Sarandi.” “Miss Sarandi!” impukkaw ni John. “Adda bisitam!” Rimmuar ni Gloria. Saanen a naka-negligee. Nakapantalonen iti maong ken nakatisert iti asul a kumepkep. Kasla nasulnot dagiti mata ti imbestigador a nakakita iti balasang. “Good evening, Miss Sarandi... a... mayor...” Immisem ni Gloria. “Okey lang... Miss wenno mayor, mayat latta kaniak. Ania kadi ti masapulyo?” “Siak ni Senior Inspector Salvador, mayor...” “Inspector Salvador, what can I do for you?”

“Umuna unay, agyamanak ta awan met laeng ti dakes a napasamak kadakayo, mayor. Pinalusotandakayo dagiti nangkidnap kadakayo nga awan ti sugat wenno dunggiaryo...”

“Sangkabassit laeng, inspector.”

“Ngem diak kayat ti inaramidmo, Mr. Villa...”

Napamuregreg ni John. “Ania nga inaramidko, inspector?” sinaludsodna.

“Ti panangsakam iti maysa a hostage a saanmo man laeng nga impakaammo kadakami. Saan a nasken nga agbayadtayo iti ransom.”

“How did you even know about this ransom, inspector?” kinuna ni John a masmasdaaw.

“Adda met intel-mi ditoy... ken seriosokami iti trabahomi.” Adda inuyosna manipud iti bolsa ti polo shirt-na. Inyawatna ken ni John.

Kinita ni John daytoy. Ladawanna a rumrummuar iti banko ken adda guyguyodenna a maleta. Malasinna a surveillance camera ti banko ti nakaadawan ti ladawan.

“Inawagannakami ti manedier ti banko. Sinayangmo ti sangapulo a milion a pisos nga imbayadmo...” “Dimo ammo no asino dagiti kasarsaritami, inspector...” “Saan kadi a ti Abu Sayyaf? Ti liderda a ni Anwar Kalifa, wanted.”

Nakigtot ni Gloria, ngem saan a nagtimek. Uray ni John, saan a nakatimek.

“Iti kaano man, saankami a maki-negotiate kadagiti terorista... ket diak kayat ti panagbayadmo iti minilion kadakuada,” malasinen ti suron ti inspector. “Ita, ad-addan a tumangken ti uloda ta ipapandan a tunggal adda kidnapenda, makaalada iti ransom.” “Inspector, dimo am-ammo dagitoy a terorista,” kinuna ni John. “I have dealt with them long before you came to my country! Naidestinoak met idiay Mindanao ken nakilabanak kadagiti terorista. Sumagmamano a gayyemko ti napapatayda ket ammok no kasano ti kinaulpitda. Ngem saan a masapul nga agparintumengka kadakuada... masapul a labanam ida.” “Isardengyon dayta,” imballaet ni Gloria. Napataliaw dagiti dua. “Saan a tagtagibassiten ni Mr. Villa ti autoridadmo, inspector... Nalawag ti bilin ti grupo a nangkidnap kaniak: saan a pakaammuan ni John dagiti pannakabagi ti linteg ta no saan...” “Kunada laeng dayta, mayor...” “Ngem diak kayat ti makigasanggasat, inspector.” Kinita ni John ni Gloria. “Wen, ta adda pagsakam.” “Gapu ta naragsakak a makasalbar iti maysa a biag. Ket nalpasen ti amin, inspector. Sibibiag ni Miss Sarandi. Lipatemon ti inaramidko...”

“Obstructing justice dayta.”

“Nawayaka a mangkemmeg kaniak, inspector.” “Inspector,” insalingbat ni Gloria. “Diak mangipila iti ania man a report. Saanak nga intresado a mangsapul pay kadagiti nangkidnap kaniak. Awan ti am-ammok kadakuada. Awan ti nakitak kadakuada gapu ta kanayonak a nakaapiring. Isu a lipatentayon daytoy a kaso. Ngem no kayatmo a tuntonen ida, makaammoka. Ngem awan kadi nasnasken a sanguem a saan a daytoy?”

Immanges iti nauneg ti imbestigador. “At least, okeyka, mayor. Diyo met la ngamin impakaammo ti kaddayo ditoy tapno naipaayandakayo koma iti seguridad.”

“Gapu ta personal trip koma laeng daytoy, inspector. Kayatko nga awan ti makaammo a sabali. Ngem nagtinnag met a kastoy... Inton umayak manen, ikarik a pakaammuankanto...”

“Agyamanak, mayor... Kayatmi laeng a salakniban ti reputasion ti Ilokos... kayatmi nga awanto mapasamak a panagkidnap ditoy. Isu a maysa laeng ti kiddawek kadakayo, saanyon nga agapaden pay daytoy iti prensa.”

“Namnamaem dayta, inspector. Kas nakunak, kasla awan napasamak...”

“Agyamanak. Saanak ngaruden nga agbaybayag.” Timmallikud sa met laeng timmaliaw. “John, sakbay a pumanawka iti Filipinas , kayatko nga agkitata...”

“Pakaammuankanto, inspector...”

NAKAUL-ULIMEK ti rabii a kankantaan dagiti kuriat ken dagiti dina ammo nga insekto iti kataltalonan ket ad-addan a saan a makaidna ti nakemna. Maburiboran. Dina ammo no mano nga aldawnan iti balay ti baket a nangisalakan kano kenkuana. Manmano ti makitkitana a tao ta kaykayatna ti agtalinaed iti uneg ti balay no kasta nga adda kasarsarita ti baket iti ruar. Dina ammo ngem kasla saan nga interesado iti mapaspasamak iti ruar, wenno kasla adda likliklikanna a dina met ammo no ania.

Medio nalawag ti rabii gapu iti pisi a bulan. Makitana ti aglawlaw. Awan ti matagtagitao. Nagpakada itay iti baket a mapan ag-jogging. Kasla sapsapulen ti bagina ti ehersisio. Isu nga aginaldaw nga agtaray ngem iti laeng rabii. Dina kayat nga adda makakita kenkuana. Banag a dina mailawlawag.

Ganggannaet pay laeng iti bukodna bagi. Dina ammo ti naganna. Dina ammo no ania ti napasamak kenkuana, malaksid laeng kadagiti naibaga ti baket kenkuana. Sa nakarigrigatda nga agkaawatan iti baket. Marigatan iti English ti baket.

Ngem nakasaysayaat ti baket kenkuana. Nadungngo. Adda kano annak daytoy ngem awan pay ti nakitana a simmarungkar.

Makirinrinnimbaw ti karadakad dagiti bato ken darat a mabaddekan dagiti lamolamo a sakana iti karasakas ti ayus ti karayan. Nakalaglag-an ti bagina nga agtaray. Kasla inar-aramidna idin. Kasla isu ti sapsapulen ti bagina.

Dina ammo no manon a kilometro ti natarayna ngem idinto nga umat-atiddog ti matarayna, ad-adda met a sumaranta ti bagina. Agingga iti matuparna ti maysa a warehouse. Nakasilaw daytoy. Nakaranraniag. Kadagiti immun-una a rabii a panagtartarayna ken idadanonna iti asideg ti warehouse, kankanayon a nakapatay dagiti silaw, malaksid dagiti adda kadagiti poste iti aglawlaw.

Naginayad. Inturongna ti panagkitana ti warehouse. Mangngegnan ti ariwawa ti sumagmamamano a tao. Ngem saanna nga inkaso. Intuloyna manen ti timmaray. Agarup duapulo a metro laengen ti kaasidegna iti warehouse idi mapanunotna ti saanen nga agtuloy. Nagpusipos tapno agsublin. Ngem pinagsardeng ti napigsa a timek.

Nakigtot. Dina ammo no agsardeng wenno tumaray. Iti

panagriknana, iti pardasna a tumaray, saan a makamatan ti lalaki a nagtimek.

Pinilina ti nagsardeng. Ngem saan a timmaliaw. Nangngegna ti danapeg ti umas-asideg a lalaki. “Ania ti ar-aramidem ditoy?” sinaludsod ti lalaki. Dina naawatan ti imbaga ti lalaki isu a sinangona daytoy. Nakaiggem iti paltog! “Excuse me...” kinunana, “I didn’t understand what you said.” Nakapungtot ti lalaki. “Kasano koma a dimo maawatan? Aginiingles ispikingka, laglag!” Kellaat a timmayab ti dakulapna.

IMMARAKUP a dagus ni Gloria ken ni John idi makapanaw ti imbestigador. Kasla nailiwan nga ania a nangimudumod iti rupana iti barukong ti lalaki sa timmangad, gumawgawawa dagiti matana ken agur-uray dagiti bibigna.

Simmari ti bara ti anges ni Gloria iti bagi ni John ket nagkuy-os ti tianna. Ngem tepteppelanna ti bagina. Saan a nainkalintegan ti ar-aramidenna.

Nalagipna ni Melanie. Isu ti ay-ayatenna. Isu ti idatagna iti altar. Immanges iti nauneg.

“Sorry,” inyarasaas ni Gloria. “Ammok a mariribukanka. Basolko daytoy. Diak ammo no apay a kastoy ti marikriknak kenka. Damo pay laeng a makitaka, ammokon nga ay-ayatenka...” Nagsennaay manen ni John. “Dika madanagan, ammok nga adda beddeng ti relasionta. Awatek ken silalagipak iti dayta. Makaanayen a ragsakko no maikkanak iti sangkabassit a gundaway.” “I’m really sorry, Gloria...” “Don’t be sorry... naragsakak.” “Mano ngarud nga aldaw ti kaaddam ditoy?” “Dua nga aldaw siguro... Ammok nga agsublikanton idiay Amerika... nga agur-uray ni Melanie kenka...”

Napakidem ni John. Agur-uray ni Melanie? Dimmagsen ti barukongna. Nalagipna ti gapuna nga immay iti hotel ni Gloria. “Di met adda napateg nga ibagam?” “Ay, wen,” kasla nakalagip nga ania ni Gloria. “Dandani nalipatakon.” “Ania kadi dayta?” “Inawisnata ti Presidente a mapan iti komperensia dagiti mayor ti Ilocos Norte inton bigat.” Saan a nakauni ni John. “Personal guest-nata kano ti Presidente.” Nagmuregreg ni John. “Ti Presidente, aw-awisennata?” inulitna ti kinuna ni Gloria. Kasla saan a mamati. “Data?” intudona ti bagina. Nagtung-ed ni Gloria. “Imposible!” Saan pay laeng a mamati ni John. “Kasano koma? Dinak am-ammo...” “Imbagak a boyfriend-ka.” “Ang-angawennnak laeng...” kinuna ni John a nagkatawan. “Aginkukunata laeng... Mabalin? Uray daytoy laeng?” Ngem agduadua latta ni John. “Kasano a naam-ammonaka ti Presidente?”

“Diak kadi naibaga nga naikkanak iti award idi ket inawatko idiay Malakanyang?” Nagmuregreg ni John.

“Gapu iti pananglappedmo iti plano ti ISIS a mangdangran iti Amerika ken ti pananglabanmo kadagiti Abu Sayyaf... Siak ti nangawat iti pammadayaw a para koma kenka!” Nagkatawa ni Gloria. Nagtungtung-ed ni John. “Wow...” kinunana. “Ania, mayatkan?” Saan a nakauni ni John. No mapan, kasanon ti pananglappedda kadagiti mayat a mangisikat iti Presidente?

Newspapers in Tagalog

Newspapers from Philippines

© PressReader. All rights reserved.