Ti Kompositor Dagiti Kansion ti Tudo

(Para ken ni Jose Corpuz Rebolledo, 1945-2018)

Bannawag - - Itoy A Bilang - Ria Rebolledo

1

Adda gayam rupa ni limdo, adda langana. Wenno, kunak koma, adda kawaw nga agparparang, no kua, nga agsuksukog iti rupa ken langa ti anak, kabsat, ina,

ama pamilia a kunkuna dagiti masisirib nga “immun-unan.” Kawaw a kasla mantsa a saanmon a maikkat iti kararua, piglat a bagbagkatem a sibibiagka.Ta saan, aya, nga isu met laeng ti papanan ti amin?

Kalanglangam isuna.

2

No agtudo ditoy Baguio, mangngegmo ngata ‘tay nasam-it ken naleddaang nga aweng ti silindro ti kompositor, ket mariknam ti karitikit, ti kanakliing, ti kirriis, ti kanaltaak, ti kiraos, ti kanalpaak, ti kanalpiit, ti karudakid, ti rumpuog, ti kanimbasar, ti kalangukong, ti derraaw, ti talna? Sa mabirokam ti bagim a siiinayad a maregregreg a kasla arbis, amaris, kayabas, dayaas, tayudok, nepnep a makabulan, agregregreg ti liday, wen, iliw, wen, lua, wen, ngem pigsa met laeng, wen, a kidkiddawen kenka ti maysa nga agpalpalama a lakay a yaw-awengna ti biagmo iti panangtokarna kadagiti kansion ti tudo babaen ti musika ti daan a silindro iti igid ti kalsada idiay Session Road.

3

Diak nangnangngeg dagiti kansion ken daniwmo a birbirokek kadagiti kansion ken daniwko, a mabirokakto, ita, ta sika ti bubon dagiti balikas, sika ti punganay ti timekko, ti lengguahek.

Ti sukog ti lissag ket rupa ni limdo, ti kansionna, dagiti dung-aw ken bara ni babawi. Saanakon a nagpakada. Saanakon a dimmawat iti pammakawan. Bagkatek lattan iti pusok dagiti balikas a diak nayeb-ebkas, dagiti arakup a diak naisagut. Saankon a masublian dagiti dana a diak nagnagnaan. Ti ibatik laeng ket ti naganmo ken dagiti lagip a nasasaem, nararag-o. Birokenkanto, a kas kadagiti balikas, a kas kadagiti kansion ken daniw, ikarik. Birokenkanto.

Newspapers in Tagalog

Newspapers from Philippines

© PressReader. All rights reserved.