Kastoy, Kapid, Ditoy Hawaii

Bannawag - - Itoy A Bilang - Ni RIC AGNES

NABAYAGEN a napasamak daytoy, kapid. Ngem maipalagip ta napan manen nag-Trade Mission dagiti kameng ti Filipino Chamber of Commerce of Hawaii (FCCH) dita Filipinas. Iti uneg ti makalawas, mapanda pasiaren dagiti nadumaduma a sentro ti komersio dita Filipinas a kas iti Manila, Cebu, Palawan, kdp.

Itay napalabas a tawen, dita Ilocos Norte ti kangrunaan a pinasiarda. Pinasiar, kunami, kapid, ta saanda met a napan nakilinnako wenno nakiginnatang kadagiti nadumaduma a partuat ti Hawaii ken Filipinas a kas kayat nga ipasimudaag ti kunada a “Trade Mission.”

Idi katengngaan ti dekada 1990, maysa a taga-Asingan, Pangasinan ti presidente ti FCCH, ni Theo Butoyan. Addaan ni Theo iti restauran, ti Elena’s Restaurant. Ti Elena’s ti parupa dagiti Filipino. Tunggal adda sangsangaili manipud kadagiti dadduma nga isla ti Hawaii wenno dagiti aggapu iti kadaklan nga Amerika, ti Elena’s ti kasayaatan a pangipanganan.

Napintas ti pakasaritaan ti Elena’s a binangon da agkaingungot a Theo ken Elena. Adu a ling-et ken sakripisio ti nagpuonanda. Saan ngarud a nakakaskasdaaw nga indaydayaw ni Presidente Fidel V. Ramos daytoy a restauran ken dagiti agkaingungot nga akinkukua.

Ket idi nagpresidente ni Theo iti FCCH, naipakaammo a dagus ken ni agdama idi a Presidente Fidel V. Ramos, banag a nakaragsakan daytoy. Ket idi kiddawen ti FCCH a ti Malakanyang ti maysa kadagiti disso a pasiaren dagiti ag-trade mission a kameng, dagus a naaprobaran.

Tapno naan-anay ti balligi ti trade mission nga ipanguluan ti maysa a taga-Asingan, inawis ni Presidente Fidel V. Ramos dagiti mabigbig a higante a negosiante iti Filipinas a kas kada Gokongwei, Tan, Sy, Chan, Yap, kdp. Nupay nangina ti oras dagitoy a negosiante iti Filipinas, saanda a pinaay ti awis ti presidente ti pagilian. Malaksid iti dayta, kayat met dagitoy a negosiante a maam-ammo dagiti negosiante manipud iti Hawaii.

Naaramid ngarud ti panagsasarang dagiti kameng ti FCCH ken dagiti negosiante a Filipino iti Malakanyang. Kas namnamaen, ni Presidente Fidel V. Ramos ti kangrunaan a sangaili. Iti bitla ni Presidente Ramos, indaydayawna ti kinagaget ken progreso dagiti Filipino iti Hawaii iti lubong ti negosio. Naragsak ken nadaeg ti programa.

Kas panagkuna ni Frank Polintan, kontraktor a taga-Claveria, Cagayan, ken maysa kadagiti delegado ti trade mission, napaliiwna a dagus a saanda a katukad dagiti Filipino a negosiante. Iti tignay ken panagkawkawes, nadlawna a repinado dagitoy. Uray ti panagsaoda iti Ingles, madlaw a nangato ti nagadalan dagitoy. Ket pudno, idi yam-ammoda ti bagbagida, kaaduan kadagitoy ti nagturpos iti kolehio iti Amerika ken dadakkel dagiti kompania a tartarawidwidanda. Isu nga idi mabatangan dagiti kameng ti FCCH a mangyam-ammo iti bagbagida, awanen ti mayat nga agtimek.

Iti panagkuna ni Polintan, iti karkulona, awan apagkapat iti bunggoyda ti nakaturpos iti kolehio. Ken nupay maaw-awagan dagitoy iti manedier iti bukodda nga opisina iti Hawaii, maysa wenno dua laeng ti empleado iti babaenda. Kaaduan ngamin kadagitoy ti travel agent wenno adda iti real state wenno addaan iti carehome. Adda pay dagiti awanan bukod a negosio/pamastrekan ngem nagkamengda iti FCCH.

Adda maysa a delegado manipud iti Hawaii, awagantayo iti Patricia, ti nagimtuod no mano ti diskuento no umangkat iti tagilako a partuat iti Filipinas. Adda pagtagilakuan ni Patricia iti Waipahu. Imbes a sumungbat, sinaludsod ti maysa a negosiante a Filipino no kasano ti kaadu ti angkaten ni Patricia.

“Lima a karton a patis iti tunggal bulan,” insungbat ni Patricia.

Iti panagkuna ni Polintan, tineppelan dagiti negosiante a Filipino ti katawada.

Iti dayta a gundaway, timmakder ni Paul Salibad, maysa a travel agent ken addaan iti maysa nga empleado, ket kinunana: “Ladingitek nga ipakaammo a saan a dakami ti rumbeng a kasangoyo maipanggep iti import/export ta awan kadakami ti addaan iti negosio a katukad ti negosioyo.”

Awan ti nagtimek. Kalpasan ti sumagmamano a kanito, nagin-inut a nagpakada dagiti negosiante a Filipino.

Nasuroken a duapulo a tawen ti napalabas, kapid, ngem agpapan kadagitoy, saanen a nasunotan daydi a panagsasabat dagiti negosiante a Filipino iti Hawaii ken dagiti negosiante iti Hawaii.

Nupay agtultuloy ti tinawen a trade mission ti FCCH, kapid, panagpasiar laengen ti kaibatogan daytoy.—O

Iti maika-27 a Trade Mission ti Filipino Chamber of Commerce of Hawaii a nakaikuyogan da Consul General Gina Jamoralin ken Gob. David Ige.

Newspapers in Tagalog

Newspapers from Philippines

© PressReader. All rights reserved.