Panangimaton iti Pagtaengan

Bannawag - - Itoy A Bilang - Ni JONALIZA P. CABISARES

URAY no kasano ti kinaadu ti pakakumikoman dagiti inna ti pagtaengan ken dagiti dadduma pay a nataengan, nasken unay a sursuruanda dagiti di pay agbasa nga ubbing, ken iturong ti atension dagitoy iti panangipateg iti panagbasabasa. Uray ti di pay agbasa nga ubing, mapaliiw nga adda met interesna iti panagbasabsa no tuladtuladenna ti langa dagiti agbasbasa a makitkitana. Padasenna pay nga ukraukraden dagiti makitana a babasaen wenno tuladtuladen ti panagbalikas ti makitkitana a mangipigsa iti panagbasana. Agdamagdamag pay no kua ti ubing no ania ti kayat a sawen dagiti simbolo (letra) a makitkitana kadagiti babasaen.

No mangngeg pay ti ubing ti napigsa a pannakaibasa ti maysa a pasamak iti babasaen, mabalin a mayebkasna met ti nangngegna iti bukodna a balikas.

No mapaliiw dagitoy iti ubing, mabalin metten a sanayen nga agbasa. Mabalin nga irugi kadagiti balikas a makitkitana. Nasken laeng nga ammuen dagiti pagilasinan ti panaginteres ti ubing nga agbasa.

Ngem uray no kunaen a nasayaat ti ibunga ti panangisuro kadagiti saan pay nga agbasa nga ubbing, mabalin met a makabannog ken makabusbos iti adu a kanito. No madlaw a nauman ti ubing a maisursuro nga agbasa, isardeng ti aramid ket ituloyto manen iti sumaruno nga aldaw.

Ibasa kadagiti ubbing dagiti addaan iti linia wenno patang a maulit-ulit. Babaen ti pannakaulit-ulit dagiti balikas, malagip ti ubing no ania ti sumaruno ket makipaset iti napigsa a pannakaibasa dagiti balikas.

Allukoyen pay ti ubing a mangpugto kadagiti blangko a balikas. No kastoy ti aramiden, maikabesa ti ubing ti maibasbasa kenkuana.

No maulit a yebkas ti ubing ti linaon ti libro, mabukelna met ti panagtalekna iti bukodna a bagi ket maamirisna nga adda pagsayaatan ti ammona ti agbasa.

Kabayatan pay ti panangibasa iti ubing iti baro a libro, agsardesardeng ken damagen no ania dagiti inanamaenna a sumaruno a mapasamak. Sursuruan ti ubing a mangamiris kadagiti maibasbasa kenkuana a maysa a napateg a galad a maipasagepsep kenkuana.

No ilawlawag iti ubing dagiti pasamak iti maysa nga istoria iti libro a maibasa kenkuana, bumaknang met ti bokabulariona ken maipategna ti ar-aramiden kenkuana.

Iturong ti atension ti ubing kadagiti balikas a mangiladawan kadagiti masansan a makitkitana iti inaldaw.

Mabalin a yaramidan iti karatula dagiti paset ti balay. Kas pagarigan ti agdan, mangipigket iti papel a nakaisuratan ti “Agdan.” Iti di agbayag, masursuronton ti ubing a basaen daytoy.

Mabalin pay nga idawat kadagiti gagayyem wenno kakabagian a suratanda ti ubing. Nasken laeng a nalaka a mabasa ti pannakaisurat dagiti letra tapno saan a marigatan ti ubing. Babaen daytoy, aginteres ti ubing iti surat ken igaedna met ti agsursuro nga agbasa.—O

Newspapers in Tagalog

Newspapers from Philippines

© PressReader. All rights reserved.