Ti Tarakenmo ken Sika

Bannawag - - Itoy A Bilang - Ni FRANCISCO S. ANTONIO

IDI pay a kalangenlangen ti tao dagiti pusa. Ngem iti laksid daytoy, adu pay laeng dagiti galad dagitoy nga ayup a di naan-anay a maipalawag.

Adda ngamin dagiti pusa a nalabes ti kinagarawda ket di pay ketdi ammo ti akintaraken no kasano a pagtalnaenna dagitoy.

Kadawyan met ketdi a mainanaig ti kinagaraw dagiti pusa iti edadda. Nagargaraw dagiti naubbing pay a pusa ngem dagiti nataengan. Normal a makitkita dagiti babassit pay laeng a pusa nga ay-ayamenda dagiti ania man a madalapusda. Naparpardas pay ti panagtaraytarayda ken nangatngato dagiti disso nga ulienda agraman pay ti diding. Kayat a sawen daytoy a nasalun-at ti bassit a pusa no kastoy ti gargarawna.

Kadagitoy a tukad ti panagbiag ti pusa a masursuruan a di mangpasakit babaen ti panangkarkaramut wenno panangipalpalabasna iti ngipenna iti saka wenno ania man a paset ti bagi ti amona. Iti daytoy pay nga edadna a masursuruan a mangay-ayam iti maited nga abalbalayna tapno agparbeng.

Saan a nasken a gumatang iti sopistikado a mekanismo tapno mapagtalna ti nagaraw a pusa. Mabalinen ti agaramid iti sinambola manipud iti usado nga aluminum foil wenno lente nga ipaspasarang iti diding a manglinglingay iti ayup.

Napateg pay a maipaayan ti pusa iti natalged nga aglawlaw. Pagaayat ngamin dagitoy nga ayup ti umuli-uli kadagiti nangangato a disso ken aglemmeng kadagiti nasulinek a suli.

Napateg ti panangsukimat kadagiti nagduduma a paset ti pagtaengan tapno mayadayo dagiti taraken a pusa iti peggad. Mairaman ditoy ti panangliklik a mangikabil iti moskitero wenno iket iti tawa ken balkonahe.

Makatawen manipud iti pannakaipasngay ti pusa, mapaliiw a makissayan ti nalabes a kinagarawigawna. Iti panagadu ti tawen ti pusa, kas koma no sangapulon ti tawenna, busbosenna ti panawenna iti pannaturog ken panaginana ken kasla saanen nga interesado nga agay-ayam wenno aggarawgaraw.

Kadawyan nga agtaraytaray ti pusa nga agturong kadagiti disso nga isu laeng ti makaammo. Kalpasan ti sumagmamano a kanito, agtalna a kasla awan ti napasamak.

Normal laeng dagitoy a mapaspasamak iti pusa ket saan nga maibilang a hyperactivity wenno nalabes a kinagaraw. Saan a rumbeng a pagdanagan daytoy.—O

Newspapers in Tagalog

Newspapers from Philippines

© PressReader. All rights reserved.