Sursorentayo Man Met ti Tuba

Dimo ipalubos nga agpatingga laeng dagiti dapanmo iti Siudad ti Baguio.

Bannawag - - Itoy A Bilang - Estela A. Bisquera- Guerrero

PAGAAYAT ti kaaduan ti agpasiar iti Siudad ti Baguio. Ngem kadagiti napalpalabas a tawen, adu dagiti madisdismaya gapu iti kinairut ti trapiko iti nasao a siudad. Gapu iti daytoy, kayatko man ti mangted iti singasing tapno saan a masayang ti bannog ken gastosyo nga umuli iti siudad ti saleng. Kayatko a sawen, saan laeng a ti siudad ti mapasiaryo no di pay ket ti aglawlawna.

Iti ipapan iti Baguio City, no aggapukayo iti abagatan, labsan ket labsanyo latta ti Tuba, Benguet— kaarrubana dagiti ili ti Sison ken San Manuel iti Pangasinan. Daytoy nga ili ti maaw-awagan iti “Gateway to Baguio City.” Ditoy ti yan ti dua kadagiti kangrunaan a kalsada nga agturong iti Baguio City— ti Kennon Road ken ti Palispis-Aspiras Road nga am-ammo ti kaaduan iti sigud a naganna a Marcos Highway. Dagiti aggapu iti amianan a paset ti Ilokos, adda met ti Naguilian Road a pagdalananda. Dagiti met aggapu iti amianan nga asideg ti Nueva Vizcaya, adda met ti Kayapa-Ambuclao Road a pagserkanda.

Iti agdama, nakaserra ti Kennon Road gapu kadagiti panaggidday ket di pay ammo no kaano a maluktan manen. Ngarud, dagiti kalsada a sumang-at iti Baguio no aggapuka iti laud, isu ti Marcos Highway ken ti Naguilian Road. Ngem saan ketdi a pudno dayta ta adda kabarbaro a kalsada a mabalin a pagdalanan— ti Anduyan-San Pascual-NangalisanAsin Road.

Buklen ti sangapulo ket tallo a barangay ti Tuba: Ansagan, Camp One, Camp 3, Camp 4, Nangalisan, Poblacion, San Pascual, Tabaan Norte, Tabaan Sur, Tadiangan Norte,

Tadiangan Sur, Taloy Norte, Taloy Sur, ken Twin Peaks.

Ti pattapattaek a rason nga agpupunipon dagiti turista iti Baguio City ken rason metten a nakatraptrapik, isu ti di pannakaammo dagiti turista iti turturongenda— aglalo dagiti adda bukodda a lugan— tapno ad-adda koma pay a maimatanganda ti kinangayed ti aglawlaw.

Isu nga iwanwankayo man sangkabassit. Padasenyo man ti rummuar ket mapanyo buyaen ti kinadaeg ti Tuba. Unorenyo man ti kabarbaro a dalan a namagsilpo iti Tuba, Benguet ken iti Tubao, La Union.

Point of reference-tayo ti Baguio City. Kadagiti awan bukodna a lugan, ti

paradaan ti jeepney a mapan iti Nangalisan/Asin Hot Spring Resorts ket iti yan ti tiendaan (palengke) iti Kayang St. Kadagiti met adda bukodna a lugan, no addakayo iti Naguilian Rd., adda nagsanga a dalan sakbay ti Cooyeesan Supermarket— iti kanigid ket ti simbaan/seminario ti Recoletos; ti agpakanawan ti mapan iti Asin Rd.

Iti panangsurotyo iti Asin Road, mangrugi metten ti adventure. Malabsanyo dagiti agkitkitikit (agar-aramid iti wood carvings). Ti kaaduan, agpatinggada laeng iti BenCab Museum a masarakan iti Km. 6. (Makita iti museum dagiti gapuanan ni Benedicto Cabrera, maysa a National Artist.) Diyo tultuladen dagitoy. No nadanonyon ti BenCab, dikay pay agsubsubli iti sentro (ti Baguio), agpababakayo latta ket danonenyo ti Km. 7, Sitio Pacac, Tadiangan, Tuba. Ditoy, masarakanyo ti Shrine of the Brown Madonna. Gukayab wenno kueba daytoy a chapel.

Manipud ditoy, danonenyo ti Irisan Bridge. Napintas ti buya ditoy ket kadagitay naayat iti “selfie,” napintas a pag-selfie-an ti amin a suli ti rangtay. Kalpasanna, umunegkayo iti umuna kadagiti dua kadagiti Asin tunnels. Paset daytoy ti railroad system a mamagsilpo koma iti Damortis, La Union ken Baguio City. Ngem iti di ammo a gapu, saan met a natuloy no di ket pinapintas laengen dagiti Amerikano ti dalan agraman dagiti usok idi aramidenda ti Mini Hydro Plant a mangpataud iti koriente a para iti Baguio City. Agingga ita, adda pay laeng daytoy a planta ket ditoy ti yan ti “turning point” dagiti jeepney nga agbibiahe iti Baguio-Nangalisan. (Isu a dagitay awan bukodda a lugan, agpatingga ditoy ti adventure-da, ngem ketdi, pagaayat dagiti maisar-ong ditoy ti agdigos iti sirok ti hanging bridge).

Agatiddog iti 96 a metro ti umuna a tunnel idinto a 158 a metro met ti maikadua. Iti nagbaetan dagitoy dua nga usok, adda dita ti Bucan Bridge. Mabalin manen ti agsardeng ditoy ket buyaen manen ti kinalaing ti Namarsua a nagaramid iti minuyongan. “Selfie time” manen daytoy para kadagiti naayat iti

ladawan.

No nakaruarkayon iti maikadua a tunnel, addakayon iti Brgy. Nangalisan. Ditoy, saan laeng a dagiti nakaberberde a bantay ti mangpabang-ar iti riknayo ta adu ti hot springs ditoy. Agpilikayo iti pagdigosanyo. Naanem-em ti danum nga aggapu iti hot spring a tibnokan ti cold spring. Siertok nga iti panagriknayo, addakayo iti paraiso no agdigoskayo ditoy ta ania man kadagitoy a resort ti mapiliyo, napalawlawankayo iti nakaberberde a buya ti nakaparsuaan.

Ketdi, saan a dagiti resort ti kapipintasan a buya iti panangtalunton iti Asin Rd.-Nangalisan-San Pascual-Anduyan Bridge a dalan. Iti biangko, kapipintasan ti buya iti Gallano River a nangbisngay iti nakabengbengbeng-dagiti kayona a bambantay. Kasla maysa a “canyon” ti Gallano River. Kalpasan a maungpotyo ti Brgy. Nangalisan ket malabsanyon ti Batuan Bridge, mangrugin ti panagdaliasat a pagarupenyo nga addakayo iti sabali a pagilian. Mabuya dagiti arigna-river canyon a nalabit nakitam laeng iti ladawan dagiti papagayammo nga adda iti ballasiwtaaw.

No madanonyo metten ti Coplo Bridge, maipasabat manen ti nagpaiduma a buya dagiti bantay a nakumotan iti kayo. Ala, selfie time manen ta apay koma a palabsem ti napintas a buya ken ti makaay-ayo a kinalit-aw ti danum? Mabalin met ti tumapog ken agdigos no kayat.

Ket tapno maganas a nalaing ti mangbuya iti nadaeg a hardin ti Namarsua, ituloy a daliasaten ti dalan. Iti Brgy San Pascual, iti Sitio Tarong, mabuya ti nalit-aw met a danum ti karayan a rinangtayan ti Anduyan Bridge. Iti agsumbangir ti karayan, nakaberberde met a bambantay.

No nadanonyon ti Anduyan Bridge, isardengyo iti tengnga, sa taliawenyo ti naggapuanyo, siertok a mapnekkayo a mangbuya iti pakabuklan ti dinaliasatyo a bantay. Paseten ti Tubao, La Union ti Anduyan Bridge.—O

Ti umuna a tunnel iti Asin.

Newspapers in Tagalog

Newspapers from Philippines

© PressReader. All rights reserved.